NOITI mi o frigiti a munde mamanten fu 22 augustus 2005 di mi nanga mi krosibei famiri kon na makandra fu nyan. Mi no ben sabi efu mi ben o tan na libi, fu di mi ben abi wan bigi takru sweri na mi edetonton. Mi masra Krishna begi èn baka dati mi taki nanga mi famiri.

Mi taigi den: „Mi o go na ati-oso fu du wan bigi oparâsi. Sobun, un alamala musu sreka unsrefi fu di a kan taki na oparâsi no o waka bun. Efu mi dede, dan un musu sabi taki mi sreka sani gi a beri fu mi kaba. Mi e begi unu, di e dini Yehovah, fu tan horidoro. Mi wani aksi den trawan fu teki wan Bijbelstudie èn fu go na wi Kresten konmakandra. Dan unu o kon bribi tu na ini a nyun grontapu pe den trutru anbegiman fu Gado o libi na ini wan paradijs na grontapu pe den no o siki moro.”

Fosi mi taigi unu fa na oparâsi waka, dan meki mi fruteri fa mi kweki èn fa mi kon sabi a tru Gado.

Mi famiri ben libi na ini wan bigi oso di ben meki fu udu nanga isri. A ben de na tapu wan pikin bergi na ini Durban, wan foto fu Zuid-Afrika di de krosibei fu a syoro. Te wi ben komoto na a bigi pasi di ben de na ini a lagipresi na ondrosei fu a bergi, dan wi ben musu kren wan trapu di ben abi 125 trei fu man doro na a portu fu wi oso. A trapu disi ben e tyari wi go na wan syatu busibusi pasi di ben e doro na wan isri portu. Na wán sei fu a portu yu ben abi a gado-oso fu mi granmama di ben lai nanga prenki èn nanga popki fu Hindu gado. Mi owma taigi mi taki mi ben de wan „tempel pikin” (mandir kī baccā na ini Hinditongo) fu di den gado di wi ben e anbegi ben meki taki mi kon gebore. Na abrasei fu a gado-oso yu ben abi wan trapu nanga redi trei pe yu ben kan waka go na a fesidoro. Na oso ben bigi èn a ben abi wan langa gadri, wan bigi kukru nanga wan krofaya onfu, seibi sribikamra, nanga wan tra sribikamra di ben de na sei na oso. Mi granpapa nanga mi granmama, mi papa nanga dri pikin brada fu en, en pikin sisa nanga den osofamiri fu den ben tan na ini na oso disi, ala nanga ala, 27 sma.

A no ben makriki fu sorgu so wan bigi famiri. Ma fu di wi alamala ben e libi makandra na ini wán oso, meki wi ben de koloku. Mi mama nanga den wefi fu den omu fu mi ben sorgu gi na oso. Ibri leisi wan fu den ben abi a wroko fu bori èn fu krin oso. Mi granpapa ben de a famiri-edeman èn a ben bai nyanyan gi a heri famiri. Ibri dridewroko mi granpapa nanga mi granmama ben go na wowoyo fu bai froktu nanga gruntu gi a heri wiki. Wi ben gwenti sidon na ondro wan pinabon na tapu a pikin bergi pe wi ben kan si a lagipresi. Na drape wi ben wakti teleki den ben komoto na wowoyo. Te wi ben si taki den komoto na ini a bus nanga den bigi baskita fu den, dan wi ben lon saka den 125 trei fu a trapu fu yepi den tyari den sani go na oso.

Na ini wi dyari wan hei palmbon ben de pe mina-fowru ben meki nesi. Wi ben si fa den ben frei go-kon èn wi ben yere fa den ben froiti. Mi granmama ben gwenti sidon na tapu a trapu leti na a fesidoro èn te a ben e fruteri wi  tori, a ben gersi leki a ben e frustan san den mina-fowru ben e froiti. A fasi fa wi ben libi nanga makandra, ben switi trutru. Wi ben lafu, wi ben krei, wi ben prei, wi ben prati sani nanga makandra èn wi ben prisiri fu libi makandra leki wan bigi famiri. Ma san moro prenspari, na taki dyaso wi kon leri sabi wi Mekiman Yehovah nanga en Manpikin Yesus Krestes.

Fosi wi kon leri sabi Yehovah, dan ibri dei wi ben musu du furu sani di abi fu du nanga a Hindu bribi. Difrenti leisi na ini a yari, wi ben abi bigi fesa pe wi ben kari sma fu kon anbegi den difrenti gado. Na sonwan fu den fesa disi, yeye ben kon na tapu mi granmama èn a ben taki nanga den. Mindrineti den sma ben tyari meti-ofrandi fu plisi den yeye. Furu sma ben sabi mi granpapa tu, fu di a ben lobi gi moni fu bow lantiskoro nanga Hindu tempel.

Na ini 1972 mi granpapa kon siki èn a dede. Wan tu mun baka dati, Indervathey, wan fu den tanta fu mi di sma e kari Jane tu, teki A Waktitoren nanga na Ontwaakt! fu tu Yehovah Kotoigi. Te na a ten dati wi ben gwenti seni den Kotoigi gowe te den ben kon na wi. Dati meki mi tanta no kari den kon na inisei fu taki nanga den, ma a ben firi fruferi. Sobun, a tra leisi di den kon, a meki den kon na inisei èn a taki nanga den fu wan problema di en nanga mi omu ben abi na ini den trowlibi. Mi omu ben de wan sopiman. Den birtisma nanga famiriman ben taigi mi tanta fu broko trow. Den Kotoigi sori en fa Gado e si a trowlibi (Mateyus 19:6). Mi tanta ben lobi a rai fu Bijbel nanga a pramisi di skrifi na ini taki a libi na grontapu o kon moro bun. * Dati meki a bosroiti fu no gowe libi mi omu èn a bigin studeri Bijbel nanga den Kotoigi. Te a ben e studeri na ini a foroisi, dan den wefi fu den omu fu mi ben e sidon arki na ini den kamra fu den.

Te fu kaba ala den wefi fu den omu fu mi bigin studeri Bijbel tu. Mi tanta Jane ben taki nanga sma fu den sani di a ben e leri èn nofo tron a ben leisi èn fruklari tori gi wi fu a buku Naar de Grote Onderwijzer luisteren (Arki a Bigi Leriman). * Di den omu fu mi kon sabi taki den tanta fu mi ben e studeri Bijbel, den bigin gens wi. Wan fu den omu fu mi teki ala den buku fu wi, sosrefi wan Bijbel, dan a bron den. Den ben kosi wi èn fon wi fu di wi ben go na den konmakandra. Mi papa ben de a wan-enkri sma di no ben du dati. Noiti a taki dati a no feni en bun taki wi e leri sani fu Yehovah. Den fo wefi fu den omu fu mi tan go na den konmakandra èn den kon lobi Yehovah Gado moro nanga moro.

Na ini 1974 mi tanta Jane dopu leki wan Yehovah Kotoigi èn baka dati mi mama nanga den tra tanta fu mi teki dopu tu. Baka wan pisi ten mi granmama no ben hori den Hindu gwenti fu en moro. Furu yari langa mi go nanga den na ala den Kresten konmakandra sondro taki mi teki wan bosroiti. Ne mi miti wan Kotoigi, Shameela Rampersad, na wan fu den bigi kongres fu Yehovah Kotoigi èn a aksi mi: „O ten yu o teki dopu?” Mi piki en: „Mi no man du dati fu di nowan sma studeri Bijbel nanga  mi ete.” A aksi mi efu a ben kan studeri Bijbel nanga mi. A yari na en baka, na tapu 16 december 1977 mi teki dopu na a kongres. Te fu kaba 18 fu den 27 sma fu mi famiri di ben libi makandra na ini a srefi oso, teki dopu. Ma na a ten di mi ben musu du na oparâsi, mi papa Sonny Deva ben de wan Hindu ete.

Den wortu di skrifi na ini Filipisma 4:6, 7 yepi mi trutru, spesrutu baka di datra kon si taki mi ben abi wan bigi takru sweri na mi edetonton. Den tekst dati e taki: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan nanga yepi fu Krestes Yesus.” A muilek fu ’no broko yu ede nanga nowan sani’, spesrutu te yu kon yere taki iniwan momenti yu kan dede. Na a bigin na krei mi ben krei nomo, ma baka dati mi begi Yehovah. Sensi a ten dati mi firi „a freide fu Gado di bigi moro iniwan sani di libisma man frustan”.

Yu kan taki dati Yehovah Gado teki mi reti-anu hori èn mi firi taki trutru a ben de nanga mi ala ten (Yesaya 41:13). A yepi mi fu no frede fu taki nanga den datra èn fu sori den krin taki awinsi san pasa, mi ben o hori a wèt fu Bijbel di e taki dati wi musu tan fara fu brudu (Tori fu den apostel 15:28, 29). Sobun, a datra di ben o koti mi èn a datra di e meki sma sribi te den musu du wan oparâsi, agri fu yepi mi sondro fu gebroiki brudu. Bakaten a datra di koti mi taigi mi taki na oparâsi waka heri bun èn taki den puru a heri sweri. A taigi mi tu taki noiti ete a si wan sikisma di kon betre so esi, baka so wan bigi oparâsi na en edetonton.

Dri wiki baka dati mi hori wan Bijbelstudie, aladi mi ben de na oso e didon na tapu mi bedi. Na a kaba fu a di fu seibi wiki mi bigin rèi wagi baka, mi go na a preikiwroko èn na den konmakandra fu Yehovah Kotoigi. Mi de nanga tangi taki den Kresten brada nanga sisa fu mi yepi mi na ini a preikiwroko. Den sorgu taki noiti mi ben de mi wawan èn taki mi ben man doro oso bun. Mi denki taki di mi arki Bijbel na tapu CD èn di mi tan du den sani di abi fu du nanga na anbegi fu Yehovah, dan dati yepi mi tu fu kon betre moro esi.

Mi ben breiti tu taki baka na oparâsi mi papa agri fu studeri Bijbel nanga den Kotoigi. A teki dopu di a ben abi 73 yari èn now a e dini Yehovah fayafaya. Moro leki 40 sma na ini a bigi famiri fu mi e anbegi Yehovah now makandra nanga wi. Mi no man si bun nanga mi kruktu-ai èn den poti fo pikin pisi isri na mi edekrabasi fu hori den bonyo fu mi ede na makandra. Ma mi e angri gi a ten te Yehovah o meki „ala sani kon nyun” na ini a Paradijs di o de na grontapu.​—Openbaring 21:3-5.

A de wan blesi taki mi abi wan lobi-ati masra di e dini leki Kresten owruman nanga wan moi umapikin di nen Clerista. A e horibaka gi mi aladi mi e gebroiki furu fu mi ten fu du a preikiwroko. Yehovah Gado blesi a preikiwroko fu mi bogobogo. Te nanga now mi ben man yepi furu fu den sma di mi gi Bijbelstudie fu si fa Gado Wortu kan abi krakti na tapu den libi. Moro leki 30 fu den gi densrefi abra na Gado èn den teki dopu.

Nanga mi heri ati mi e fruwakti a ten te Yehovah Gado o tyari wan kaba kon na a ogri grontapu disi di lai nanga pina. Iya, mi e wakti a ten te a o tyari wi go na ini wan grontapu di o tron wan paradijs.