Gi den yonguwan
No feti fu kisi makti nanga biginen!
Den sani di yu musu du: Te yu e leisi a pisi disi, dan du dati na wan tiri presi. Te yu e leisi den Bijbeltekst, dan prakseri fa a ben o de efu yu ben o de drape. Pruberi fu si san e pasa èn pruberi fu yere den sten fu den sma. Pruberi fu firi fa den e firi. A musu de neleki yu e si na yu fesi san e pasa.
Den moro prenspari sma: David, Absalom, Yoab
A tori: Absalom wani teki a makti abra fu en papa.
PRUBERI FU SI SAN E PASA.—LEISI 2 SAMUEL 14:25-33; 15:1-17; 18:9-17, 30-33.
Taki fa yu denki dati Absalom ben de. (Leisi 2 Samuel 14:25, 26 ete wan tron.)
San yu denki Absalom ben du èn fa a ben e taki di a pruberi fu kori den sma di ben go na a kownu fu koti krutu gi den? (Leisi 2 Samuel 15:2-6 ete wan tron.)
Te yu e leisi 2 Samuel 14:28-30, dan sortu fasi yu denki taki Absalom ben abi?
ONDROSUKU A TORI MORO FINI.
San Absalom du fu man teki a makti abra? (Luku 2 Samuel 13:28, 29. Amnon ben de a fosi manpikin fu David. Sobun, en ben musu tron kownu baka David.)
Absalom ben suku glori èn a ben gridi fu kisi makti nanga biginen. Ma san sma ben denki fu en, efu yu e luku a fasi fa den beri en? (Leisi 2 Samuel 18:17 ete wan tron.)
Kari ete wan sani di meki taki Absalom ben de nomonomo fu kisi makti nanga biginen. (Efu yu wani agersi disi nanga wan tra tori, dan leisi san 3 Yohanes 9, 10 e taki fu Diotrefes.)
Fa David ben firi di Absalom du den sani fu en? (Luku Psalm 3 di David skrifi na a ten di Absalom opo ensrefi teige en.)
DU SAN YU LERI. SKRIFI DEN SANI DI YU LERI FU . . .
A pisi di e sori wi san kan pasa te wan sma gridi fu kisi makti nanga biginen.
Wan situwâsi te wan sma e du sani di no bun. Fa dati kan meki trawan, soleki en papa nanga mama, firi sari?
TRA SANI DI YU KAN LERI FU A PISI TORI DISI.
Fa yu kan kon gridi fu kisi makti noso biginen?
Fa yu kan sorgu taki yu no e kisi heimemre?
SORTU SANI NA INI A TORI DISI YU BEN FENI MOI ÈN FU SAN EDE?
Pruberi fu du disi: Prakseri fa sani ben o de efu a tori ben waka tra fasi. Kon meki wi taki dati Absalom no ben gridi fu kisi makti nanga biginen, ma taki a ben abi sakafasi, dan fa sani ben kan waka?—Odo 18:12.
