RUT e kindi na wan ipi aleisitiki di a ben piki a heri dei. Neti e suku fu fadon na Betlehem èn furu wrokoman e bigin komoto na den gron. Safrisafri den e waka a pasi di e kren go na a portu fu a pikin foto disi di de na tapu wan bergi krosibei fu den gron. Wi kan frustan taki Rut musu fu weri fu di a ben wroko a heri dei sensi mamanten. Toku a e go doro èn a e naki na aleisi nanga wan pikin tiki fu lusu den siri. Awansi fa a no fa, a dei ben pai. A go moro bun leki san a ben denki.

Sani ben o go moro bun gi a yongu uma di ben lasi en masra na ini dede? A ben bosroiti fu gowe nanga Naomi, a mama fu en masra. A ben sweri fu tan nanga Naomi èn fu meki Yehovah, a Gado fu Naomi, tron en Gado. Den tu uma disi, di ben lasi den masra na ini dede, ben komoto na Moab èn den go na Betlehem. No langa baka dati, a Moab uma Rut kon sabi taki a Wèt fu Yehovah ben abi moi seti fu yepi den pôtiwan nanga den trakondre sma na ini Israel sondro fu meki den lasi lespeki gi densrefi. * Now a kon si taki son sma na mindri Yehovah en pipel, di ben hori a Wèt èn di ben sabi en, sori taki den ben du san Yehovah aksi fu den èn den ben sori switi fasi tu. Disi ben trowstu en so taki a no ben e sari moro.

Wan fu den sma disi ben de Boas, wan guduman di ben owru moro en èn na ini den gron fu a man disi a ben piki aleisi. Tide Boas poti prakseri na en leki wan papa. A musu lafu na ensrefi te a e prakseri a switi fasi fa Boas taki nanga en. Boas prèise en fu di a e sorgu so bun gi Naomi di kon owru kaba èn fu di a bosroiti fu kon suku kibri na a tru Gado Yehovah.​—Rut 2:11-13.

Ma kande Rut e aksi ensrefi fa en libi o waka. A de wan trakondre uma di kon pôti èn di no abi wan masra noso wan pikin. Sobun, fa a o sorgu ensrefi nanga Naomi na ini den yari di e kon? A o nofo fu piki nyanyan na den gron? Suma o sorgu en te a kon owru? Wi kan frustan taki a e broko en ede nanga den sani dati. Na ini a muilek ekonomia ten disi furu sma abi den srefi sortu broko-ede. Te wi luku a fasi fa a bribi fu Rut yepi en fu pasa den problema disi, dan dati o de wan bun eksempre gi wi.

Na a ten di Rut kaba naki den aleisitiki èn a piki ala na aleisi, a kon si taki a ben kan furu wán baki fu sowan 30 pontu (14 kilo) nanga na aleisi. Kande a e poti en na ini wan duku di a e tai kon na wán èn a e opo en poti na tapu en ede. Baka dati a e waka go na Betlehem, aladi a e kon moro dungru.​—Rut 2:17.

Naomi breiti fu si Rut di a lobi èn kande a no man bribi te a e si taki a wefi disi fu en manpikin tyari so furu aleisi kon. Rut tyari pikinso fu a nyanyan kon di Boas ben gi den wrokoman fu en èn na so den tu uma disi e nyan wan pikin sani makandra. Naomi e aksi en: „Pe yu go piki nyanyan tide èn pe yu go wroko? Meki Gado blesi a sma di ben poti prakseri na yu” (Rut 2:19). Di Naomi si o furu nyanyan Rut abi, dan a frustan taki a ben musu fu de so taki wan sma yepi a yongu uma disi.

Den tu uma disi e bigin taki èn Rut e fruteri Naomi fa Boas sori switifasi gi en. A sani disi e naki Naomi ati èn a e taki: „Meki a man dati kisi blesi fu Yehovah di e tan sori bun-ati gi den libiwan nanga den dedewan” (Rut 2:19, 20). Naomi e frustan taki a switifasi fu Boas e kon fu Yehovah di e leri den futuboi fu en fu abi a gwenti fu gi trawan sani èn a e pramisi en pipel taki a o blesi den te den sori switifasi gi trawan. *​—Odo 19:17.

Naomi taigi Rut fu du san Boas taki èn fu piki nyanyan na den gron fu en, krosibei fu den yongu uma di ben e wroko gi en so taki den tra kotiman no ben o fruferi en. Rut du san Naomi taki. Boiti dati, a „tan nanga a mama fu en masra” (Rut 2:22, 23). Den wortu dati e sori wi ete wan tron sortu moi fasi Rut ben abi: lobi di ben meki taki a ben wani tai hori na Naomi. A kan taki na eksempre fu Rut e meki taki wi aksi wisrefi efu wi e lespeki famiribanti, efu wi e horibaka gi den lobiwan fu wi èn efu wi e yepi den te dati de fanowdu. Ala ten Yehovah o si te wi e du dati.

Disi wani taki dati Naomi nanga Rut no ben de wan trutru osofamiri? Na ini son kulturu sma feni taki wan trutru osofamiri musu abi wan masra, wan wefi, manpikin, umapikin, granpapa nanga granmama èn go so moro fara. Ma a tori fu Naomi nanga Rut e sori wi taki futuboi fu Yehovah kan opo den ati. Den kan meki taki ibri memre na ini a moro pikin osofamiri sori switifasi nanga lobi gi makandra, srefi te moro leki wan fu den lasi libi. Yu e warderi yu osofamiri? Yesus ben memre den bakaman fu en taki srefi te wan sma no abi famiri, a Kresten gemeente kan de leki wan famiri gi en.​—Markus 10:29, 30.

Fu april, a ten te den Israelsma e koti groto, teleki yuni, a ten te den e koti aleisi, Rut e tan piki nyanyan na ini den gron fu Boas. Wi no abi fu tweifri taki na ini ala den wiki Naomi e prakseri san a kan du gi Rut di a lobi so te. Di den ben de na Moab, Naomi ben prakseri taki noiti a no ben o man yepi Rut fu feni wan tra masra (Rut 1:11-13). Ma now a e si a tori tra fasi. A e taigi Rut: „Mi pikin, na mi musu suku wan tanpe gi yu fu meki sani go bun nanga yu, a no so?” (Rut 3:1) Na a ten dati a ben de so taki papa nanga mama e suku trowpatna gi den pikin èn Rut ben tron leki wan trutru umapikin gi Naomi. A ben wani feni ’wan tanpe gi Rut fu meki sani go bun nanga en’ èn pe a ben kan feni kibri. A ben wani feni wan masra gi en tu di ben kan yepi en. Ma san Naomi ben kan du?

Te Rut e kari Boas en nen, dan Naomi e taki: „A man na wan famiri fu wi. En na wan fu den sma di abi a reti fu bai wi puru na nowtu” (Rut 2:20). San dati wani taki? Te problema ben miti wan osofamiri fu di den ben kon pôti  noso fu di a papa dede, dan a Wèt di Gado gi Israel ben abi wan tu moi seti fu yepi den. Efu wan uma ben lasi en masra fosi a kisi pikin, dan a ben broko saka srefisrefi fu di a nen fu en masra ben o lasi gowe. A no ben o abi bakapikin di ben o tyari en masra nen èn nowan sma ben o sabi moro suma na en. Ma a Wèt fu Gado ben gi pasi taki sowan uma ben kan trow nanga a brada fu en fosi masra. Na so a ben kan kisi wan pikin di ben o tyari a nen fu en masra di dede èn di ben o sorgu gi den gudu fu a famiri. *​—Deuteronomium 25:5-7.

Ne Naomi bigin fruteri fa a ben o seti a tori disi. Prakseri fa a yongu uma e fruwondru èn fa a e piri en ai luku te a e yere san Naomi e taki. A kan taki a Wèt fu Israel nyun ete gi Rut èn a no de fu taki dati a no e frustan furu fu den gwenti fu den Israelsma ete. Awansi fa a no fa, a abi so furu lespeki gi Naomi taki a e arki finifini san a e taigi en. A kan gersi wan fruferi sani gi en, iya, a kan taki a e syen srefi, ma toku a e agri fu du en. Na wan safri-ati fasi a e taki: „Mi o du ala sani di yu taigi mi fu du.”​—Rut 3:5.

Son leisi a muilek gi yongu sma fu teki rai fu sma di owru moro den èn di abi moro ondrofeni leki den. A makriki fu taki dati owru sma no e frustan den problema fu yongu sma. Na eksempre fu Rut di ben abi sakafasi e memre wi taki te wi e arki a koni rai fu owru sma di lobi wi èn di wani taki sani waka bun nanga wi, dan wi o kisi furu blesi. Ma sortu rai Naomi ben abi? Rut kisi blesi trutru di a teki a rai dati?

A mofoneti dati Rut e go na a presi pe den e masi aleisi. Dati na wan plata pisi gron pe a doti ben stampu kon tranga èn pe den gronman ben e tyari aleisi kon fu masi en èn fu puru a buba na a aleisi. Nofo tron a presi disi ben de na wan bergiskin noso na tapu na ede fu wan pikin bergi pe furu winti ben e wai latilati bakadina èn na mofoneti. Fu puru na aleisibuba nanga den drei aleisitiki, den wrokoman gebroiki bigi forku nanga skopu, dan den ben opo na aleisi trowe na go na loktu. Na aleisibuba nanga den drei aleisitiki ben lekti èn dati meki a winti ben wai den gowe, ma fu di na aleisi ben moro hebi, meki a ben fadon go baka na gron.

Rut e luku fa a wroko e kon na wan kaba a neti dati, ma a e du dati na so wan fasi taki sma no o poti prakseri na en. Boas e luku fa den sma e wai na aleisi fu en èn fa disi e tron wan bigi ipi. Baka te a nyan en bere span, a e go didon na a lanki fu na ipi. Sma gwenti du disi, kande fu sorgu taki fufuruman nanga tra ogriman no kon fufuru na aleisi. Rut e si fa Boas e go didon. Now a ten doro fu du san Naomi taigi en.

Rut e kroipi go moro krosibei. En ati e naki. A e si taki Boas e sribi dipi. Sobun, leti fa Naomi taigi en, na so a e go na Boas en futusei, a e puru a duku di e tapu Boas futu èn a e go didon drape. Dan a e wakti. A ten e pasa. Gi Rut a musu fu sori langa. Te fu kaba, na mindrineti Boas bigin buweigi. A e beifi fu di a e kowru èn a e opo sidon, kande fu tapu en futu baka nanga a duku. Ne a e si taki wan sma de drape. A tori e taki: „Ne a si wan uma e didon na en futusei.”​—Rut 3:8.

Boas aksi en: „Suma na yu?” Ne Rut piki en, kande nanga wan beifibeifi sten: „Mi na Rut, yu umasrafu. Kibri mi, so taki sma no du ogri nanga yu umasrafu, bika yu na a sma di abi a frantwortu fu bai mi puru na nowtu” (Rut 3:9). Son sma fu a ten disi di e fruklari Bijbel feni taki den sani di Rut du èn taki, e sori taki a ben abi seks na prakseri. Ma den e frigiti tu sani. A fosi sani na taki Rut ben du soleki fa sma na ini a ten dati ben gwenti du. Ma furu fu den gwenti dati sma fu now no e frustan. Sobun, a no ben o bun fu denki taki a sani di Rut du, na a srefi leki san morsu sma fu a ten disi gwenti du. A di fu tu sani na taki a fasi fa Boas du sori krin taki a no ben feni taki Rut du wan sani di no fiti èn a ben e prèise Rut srefi.

Ne Boas e bigin taki. A musu de so taki a switifasi fa Boas e taki nanga Rut, e meki taki a no e frede moro. Boas e taki: „Meki Yehovah blesi yu, mi pikin. Den sani di yu du bifo sori taki yu abi lobi, ma a sani di yu du now e sori dati moro krin srefi, fu di yu no trow nanga wan yonkuman, awinsi na wan guduwan noso wan pôtiwan” (Rut 3:10). Den wortu „den sani di yu du bifo” e sori go na a tranga lobi di Rut ben abi gi Naomi fu di a ben kon nanga en na Israel èn a ben e sorgu en. Den wortu „a sani di yu du now” abi fu du nanga a situwâsi pe a ben de na ini na a ten dati. Boas ben si taki a ben o makriki gi wan yongu uma leki Rut fu trow nanga wan man di ben de moro yongu, awinsi na wan guduman noso wan pôtiman. Ma Rut no du dati fu di a ben wani du bun gi Naomi. A ben wani sori bun fasi tu gi Naomi en masra di ben dede kaba fu di a ben o meki taki a nen fu a man disi no ben o lasi gowe na ini Israel. Wi kan frustan taki a naki Boas en ati di a si taki a yongu uma disi no ben prakseri ensrefi nomo.

Boas taki moro fara: „We mi pikin, yu no abi fu frede. Ala san yu aksi mi, mi o du. Ala sma na ini a foto sabi taki yu na wan bun uma” (Rut 3:11). A ben prisiri di a si taki wan okasi ben de fu man trow nanga Rut èn kande a no ben fruwondru di Rut aksi en fu de a sma di ben o bai en puru na nowtu. Ma Boas ben de wan reti-ati man èn a no ben denki ensrefi nomo. A taigi Rut taki wan moro krosibei famiriman fu Naomi en masra di ben kon dede, ben abi a reti fu bai en puru na nowtu. Boas ben o go taki fosi nanga a man disi èn gi en na okasi fu trow nanga Rut.

Boas e taigi Rut fu go didon baka èn fu tan  drape teleki musudei mamanten. Baka dati Rut kan gowe sondro fu wan sma si en, fu di Boas no wani meki en nanga Rut kisi porinen, bika sma kan denki taki den du wan sani di no fiti. Rut e go didon baka na a man en futusei. Kande a no e broko en ede so furu moro fu di Boas piki na aksi fu en na so wan switi fasi. A dungru ete te Boas e poti aleisi na ini a dyakti fu Rut. Baka dati Rut e go baka na Betlehem.

Rut ben musu fu breiti di a prakseri san Boas taigi en. A ben taki dati ala sma sabi en leki „wan bun uma”. A musu fu de so taki Rut ben abi wan bun nen fu di a ben de klariklari fu kon sabi Yehovah èn fu dini en. Boiti dati, a ben sori switifasi gi Naomi nanga en pipel fu di a ben hori den gwenti fu den na prakseri. Sondro fu kragi a ben teki den gwenti fu den abra, aladi a no ben sabi den. Efu wi abi bribi neleki Rut, wi o pruberi fu sori bigi lespeki gi trawan èn gi den fasi nanga den gwenti fu den. Te wi e du dati, dan wi srefi o abi wan bun nen na sma.

Di Rut doro na oso, Naomi taki: „Na yu drape, mi pikin?” Kande a ben aksi disi fu di a ben dungru, ma a ben wani sabi tu efu a situwâsi fu Rut leki uma di masra dede kaba, ben kenki èn efu a ben feni wan man di ben o trow nanga en. Esi-esi Rut fruteri Naomi ala sani di pasa na mindri en nanga Boas. Rut sori Naomi tu omeni aleisi Boas gi en fu gi Naomi. *​—Rut 3:16, 17.

 Naomi gi Rut a koni rai fu no go na den gron fu piki nyanyan a dei dati, ma fu tan sidon na oso pî. A gi Rut a deki-ati disi: „A man disi no o rostu fosi a seti a tori disi tide.”​—Rut 3:18.

Naomi ben abi leti nanga Boas. Boas go na a portu fu a foto, pe den owruman fu a foto ben gwenti kon makandra èn a wakti teleki a man di ben de wan moro krosibei famiri pasa drape. Na fesi ala sma na a portu, Boas gi a man na okasi fu trow nanga Rut so taki a ben kan bai en puru na nowtu. Ma a man no ben wani, fu di a ben feni taki a ben o lasi en famirigudu te a ben o du dati. Ne leti na fesi den sma, Boas taki dati en ben o bai Naomi puru na nowtu. A ben o bai den gudu fu Naomi masra Elimeilek di dede kaba èn a ben o trow nanga Rut, di ben trow fosi nanga Maklon, Elimeilek manpikin di dede tu. Soleki fa Boas taki, dan a ben e howpu taki na so „a famirigudu o tan tapu a nen fu a man di dede” (Rut 4:1-10). Boas ben de wan reti-ati man trutru èn a no ben prakseri ensrefi nomo.

Ne Boas trow nanga Rut. Wi e leisi san pasa baka dati: „Yehovah meki Rut kon de nanga bere èn a kisi wan manpikin.” Den uma fu Betlehem blesi Naomi èn den prèise Rut fu di a ben bun moro leki seibi manpikin gi Naomi. Bakaten wi e leri taki a manpikin fu Rut tron wan afo fu a bigi Kownu David (Rut 4:11-22). David fu en sei tron na afo fu Yesus Krestes.​—Mateyus 1:1. *

Neleki Naomi, na so Rut kisi furu blesi tu. Naomi yepi fu kweki a pikin neleki a ben de en eigi pikin. A tori fu den tu uma disi e sori wi krin taki Yehovah Gado e poti prakseri na ala den sma di abi sakafasi, di e wroko tranga fu sorgu gi den famiriman fu den èn di e dini en fayafaya makandra nanga en pipel. Noiti a e frigiti fu blesi den reti-ati sma di kisi wan bun nen na en, neleki fa a pasa nanga Rut.