Bijbel e leri taki yu musu trow fu man de koloku? Te yu luku en frafra, dan a gersi leki Gado Wortu e horibaka gi a denki disi. Fa so?

Soleki fa a Bijbel buku Genesis e sori, dan Gado si taki „a no [ben] bun” taki a fosi man Adam tan en wawan. Sobun, Gado meki Eva leki wan ’patna di fiti’ Adam (Genesis 2:18). Te tu sani e fiti makandra, dan den no e mankeri noti. Sobun, a tekst disi kan gi yu a firi taki wan sma di no trow e misi wan sani. Boiti dati, difrenti pisi na ini Bijbel e taki dati a trowlibi e tyari blesi kon èn a e meki sma firi prisiri. A tori fu Rut na so wan eksempre.

Ma a de so trutru taki den tori disi e leri wi taki Kresten na ini a ten disi no kan de koloku noso taki den e mankeri wan sani solanga den no trow èn kisi pikin? Kwetikweti. Yesus Krestes no ben mankeri noti èn a ben de a moro koloku sma di ben de. Toku a tan sondro fu trow teleki a dede. Boiti dati, Yesus, a moro koni man di ben de, ben de soifri leki Yehovah, „a koloku Gado” (1 Timoteyus 1:11; Yohanes 14:9). Di Yesus ben kari wan tu sani di kan meki wan sma de koloku noso kisi blesi na ini a grontapu disi, a no kari a trowlibi (Mateyus 5:1-12).

Ma a de so taki den sani di Bijbel e taki no e kruderi nanga makandra? Kwetikweti. A bun fu go luku san Yehovah ben abi na prakseri di a seti a trowlibi. A seti disi ben o meki sma abi prisiri, den ben o man abi seks nanga makandra èn den ben o man trowstu makandra. Ma son leisi a trowlibi ben de prenspari fu meki sani di Gado ben abi na prakseri, kon tru. Fu eksempre, Gado ben wani taki Adam nanga Eva ben musu „meki pikin èn kon furu, teleki [den] kon lai na grontapu” (Genesis 1:28). Ma Adam wawan no ben o man meki pikin efu a no ben abi wan wefi èn Eva no ben o man du dati tu sondro wan masra. Iya, den ben abi makandra fanowdu èn den ben fiti bun na makandra.

Di Yehovah seti sani fu meki a wani fu en kon tru gi a pipel Israel, dan a ben abi spesrutu sani na prakseri tu di ben abi fu du nanga a trowlibi èn nanga na osofamiri. A ben wani taki en pipel ben musu kon furu, so taki den ben kan wini den feanti fu den. A ben seti sani tu fu meki a Mesias kon fu a lo fu Yuda. En ben o frulusu reti-ati libisma fu den bakapisi fu sondu nanga dede (Genesis 49:10). Israel uma di ben gi yesi na Gado, ben si en leki wan bigi grani fu trow èn fu kisi pikin, ma te den no ben man du dati, dan den ben e syen èn den ben e firi sari.

Ma fa a de na ini a ten disi? Na ini owruten, Gado ben taigi libisma taki den ben musu kisi pikin ’teleki den kon lai na grontapu’. Ma a de so taki now di grontapu lai libisma, Kresten musu trow èn meki pikin ete? Nôno (Mateyus 19:10-12). A no de fanowdu moro taki Gado kibri den afo fu a Mesias, noso taki a kibri a pipel pe a Frulusuman dati ben o komoto. Sobun, fa Kresten musu si a trowlibi èn fa den musu si en te wan sma no trow?

Awinsi wan sma trow noso awinsi a no trow, toku wi kan si ala tu sani leki blesi fu Gado. Soleki fa yu sabi, dan wan sma kan feni taki a musu trow, ma wan trawan de koloku aladi a no trow. A trowlibi na wan santa seti di e gi sma na okasi fu sori lobi gi makandra, fu abi wan patna èn fu seti wan koloku osofamiri. Ma Bijbel e sori tu taki den wan di trow na ini a muilek grontapu disi o kisi problema noso „banawtu na ini den libi”. Yehovah no feni taki wan sma di no trow musu firi syen noso firi sari fu dati. Fu taki en leti, en Wortu e taki dati wan sma di no trow, abi moro okasi fu du son sani di sma di trow no man du.​—1 Korentesma 7:28, 32-35.

Sobun, Bijbel e sori taki awinsi wan sma trow noso awinsi a no trow, toku ala tu bun. Yehovah, a sma di seti a trowlibi nanga na osofamiri-libi, wani taki ala den futuboi fu en musu de koloku, awinsi den trow noso den no trow.