Son sekrepatu e libi 150 yari èn son bon e libi 3000 yari. Ma libisma no e libi so langa. Toku den kan du moro nanga den libi leki bon noso sekrepatu. Yehovah Gado meki libisma na so wan fasi taki den man prisiri nanga poku, sport nanga nyanyan. Den e prisiri tu fu leri sani, fu go koiri na tra presi èn fu miti tra sma. Gado poti a firi na ini wi ati fu libi fu têgo.​—Leisi Preikiman 3:11.

Yehovah e libi fu têgo. A no e dede noiti. En na a wan di e gi libi èn dati meki a man gi libisma têgo libi (Psalm 36:9; Habakuk 1:12). Boiti dati, a pramisi fu gi têgo libi na sma di e gi yesi na en. Na presi taki sma o kon owru, a o meki den kon yongu.​—Leisi Yob 33:24, 25; Yesaya 25:8; 33:24.

Gado pramisi wi taki wi o libi fu têgo sondro fu kon siki. Den wondru fu Yesus ben sori taki wi no abi fu tweifri taki a o meki den pramisi disi kon tru. Yesus ben dresi ala sortu siki èn a ben meki dedesma kon na libi baka.​—Leisi Lukas 7:11-15, 18, 19, 22.

Gado wani taki wi musu libi fu têgo. A no wani taki wi libi na ini wan grontapu pe sma e kwinsi trawan èn pe furu ogri e pasa. Ma a wani taki wi musu libi na ini wan grontapu di de wan paradijs. A wani gi wi a dyaranti taki sani o waka bun nanga wi. (Psalm 37:9, 29; Yesaya 65:21, 22). Te grontapu tron wan paradijs, dan milyunmilyun sma di dede o kon na libi baka. Efu den sma disi teki a bosroiti fu anbegi Gado èn fu gi yesi na en, dan den o libi fu têgo.​—Leisi Lukas 23:42, 43; Yohanes 5:28, 29.

Na Gado wawan kan gi wi têgo libi. Dati meki a ben o bun fu leri sabi en, so taki wi kan kon krosibei na en. Bijbel e agersi a leri di wan sma e leri sabi Gado, nanga a nyan di wan sma e nyan (Mateyus 4:4). A switi fu nyan wan nyanyan, ma yu musu meki muiti fu bai en èn fu sreka en. Na so wi musu meki muiti tu fu leri sabi Gado. Ma noti no warti moro leki fu kon krosibei na Gado èn fu kisi têgo libi.​—Leisi Lukas 13:23, 24; Yohanes 6:27; 17:3.