SAN Yehovah e aksi fu den sma di wani dini en na wan fasi di a feni bun? Yu denki taki a e fruwakti fu wi taki wi no e meki nowan fowtu? Efu dati ben o de so, dan wi leki sondu libisma no ben o man plisi en noiti. Yu denki taki den sani di a e fruwakti fu wi, na sani di wi leki libisma man du? Efu wi wani dini Gado nanga prisiri, dan a de prenspari taki wi feni a piki na tapu den aksi disi. Meki wi luku fa a profeiti Mika e sori san Gado e aksi fu wi.​—Leisi Mika 6:8.

„Yehovah taigi unu san bun.” A no muilek fu kon sabi san Gado e fruwakti fu wi. Na ini Bijbel a sori wi krin san na den sani di a wani wi fu du. San Gado e aksi fu wi, na fu du „san bun”. Tra fasi no de, bika „Gado na lobi” (1 Yohanes 4:8; 5:3). Sobun, a wani taki sani e go bun nanga wi. Te wi e du san a e aksi fu wi, dan disi e plisi en èn a e tyari wini kon gi wi.​—Deuteronomium 10:12, 13.

„San a e aksi fu unu?” Gado abi a reti fu aksi wan sani fu wi? A no de fu taki dati a abi a reti disi, fu di na en gi wi libi èn na en e meki taki wi e tan na libi (Psalm 36:9). Ma san a e aksi fu wi dan? We, Mika e kari dri sani di e sori san Gado e aksi fu wi. Den fosi tu sani abi fu du nanga a fasi fa wi e libi nanga tra sma èn a di fu dri sani abi fu du nanga a matifasi di wi abi nanga Gado.

„Du san reti.” Wan buku e taki dati a Hebrew wortu di vertaal nanga „reti” wani taki „fu libi bun nanga trawan”. Sobun, Gado wani taki wi musu libi bun nanga trawan. Disi wani taki dati wi no musu du san wi feni bun, ma wi musu du san en feni bun. Wi e du san reti, te wi no lobi a wan sma moro a trawan, te wi e du sani nanga wan krin ati èn te wi no e bedrigi trawan (Lefitikus 19:15; Yesaya 1:17; Hebrewsma 13:18). Te wi e libi bun nanga trawan, dan kande den o libi bun nanga wi tu.​—Mateyus 7:12.

„Lobi fu du bun.” A Hebrew wortu di vertaal nanga „du bun”, na tyesed. Wan Bijbel sabiman e taki dati son leisi sma vertaal a wortu disi tu nanga lobi, sari-ati, noso bun-ati. Ma nowan fu den dri wortu disi e sori krin san tyesed wani taki trutru. Fu taki en leti, tyesed na ala den dri wortu disi makandra. Sobun, Gado no e aksi wi fu du bun nomo, ma a wani taki wi musu lobi fu du bun. Efu wi lobi fu du bun, dan wi o du dati nanga wi heri ati. Wi o breiti fu yepi sma di de na nowtu. Sobun, wi o de koloku te wi abi a gwenti fu gi sma sani.​—Tori fu den apostel 20:35.

„Abi sakafasi aladi unu e waka nanga un Gado.” Na ini Bijbel a wortu „waka” abi fu du son leisi nanga „a fasi fa wan sma e libi”. Wi e waka nanga Gado te wi e libi na a fasi fa a sori wi na ini Bijbel. Wi musu „abi sakafasi” te wi e pruberi fu libi na a fasi dati. Fu san ede? Te wi e sori Gado taki wi abi sakafasi, dan wi e hori na prakseri taki a bigi moro wi èn taki wi na sondu libisma di no man du ala sani. Sobun, te wi „abi sakafasi aladi wi e waka nanga” Gado, dan dati wani taki dati wi e frustan bun san a e aksi fu wi èn san wi kan du gi en.

Koloku taki noiti Yehovah e aksi moro fu wi leki san wi man gi en. Solanga wi e du ala san wi man fu dini en, dan a breiti kaba (Kolosesma 3:23). A sabi taki wi no man du ala sani (Psalm 103:14). Te wi abi sakafasi, dan wi o frustan disi èn wi o prisiri fu waka nanga en. A ben o bun fu leri fu waka nanga Gado, a no so? Te yu e du dati, dan Gado o gi yu furu blesi.​—Odo 10:22.