Na a kaba fu a lastiwan fu den dri brifi na ini Bijbel di na apostel Yohanes skrifi, a taki: „Mi abi foeroe sani foe skrifi, ma mi no wani skrifi joe nanga inki nanga pen” (Da Bijbel na ini Sranantongo). Den Griki wortu di Yohanes gebroiki dyaso e sori taki a no ben wani skrifi go doro nanga „blaka [inki] nanga warimbo”.​—3 Yohanes 13, The Kingdom Interlinear Translation of the Greek Scriptures.

A pen fu wan sma di ben skrifi sani abra, ben de wan pisi warimbo. Den ben koti a mofo skoinsi èn den ben priti a mofosei na tu. A skrifiman ben kan srapu en baka nanga wan spesrutu grofu pisi ston. A ben de neleki wan vulpen di wi sabi na ini a ten disi èn di abi wan isri penti pe na inki e komoto na ini.

Nofo tron na inki, noso „blaka” ben de asisi noso a blaka di e kon fu smoko èn den ben moksi dati nanga wan sortu tara so taki ala sani tan makandra. Sma ben e seri na inki disi dreidrei èn te wan sma ben o gebroiki en, dan a ben musu moksi en nanga watra, ma a no ben musu poti tumusi furu watra. Te a ben o skrifi nanga na inki, dan a papirus noso metibuba no ben soigi na inki, ma na inki ben drei na tapu. Dati meki wan skrifiman ben man figi sani makriki nanga wan nati sponsu te a meki wan fowtu. A nati sponsu ben de wan fu den sani di wan skrifiman ben abi na en ala ten. A tori disi fu na inki fu owruten e sori san Bijbel skrifiman ben denki kande di den ben taki dati sma nen ben o figi puru na ini a buku fu Gado.​—Eksodes 32:32, 33; Openbaring 3:5, Kingdom Interlinear.

Tori fu den apostel 18:3 e taki dati na apostel Paulus ben abi a wroko fu meki tenti. Na ini Bijbel ten, sma di ben e meki tenti ben brei kameili wiwiri noso krabita wiwiri na so wan fasi taki den tron pisi krosi. Baka dati den ben nai den pisi krosi na makandra fu meki tenti gi sma di ben gwenti go na difrenti presi. Ma na ini a ten dati, furu fu den tenti ben meki fu leribuba. Trawan ben meki fu linnen-krosi fu a foto Tarsus pe Paulus ben libi. A kan taki Paulus ben wroko nanga iniwan fu den sani dati fu meki tenti. Ma di Paulus ben e wroko nanga Akwila, dan a kan taki a ben meki tenti fu linnen-krosi di den ben poti na ini a fesisei dyari fu sma oso, fu tapu gi a son.

A kan de so taki Paulus ben leri du a wroko disi di a ben yongu. Soleki fa papirus dokumenti fu Egepte e sori, dan na a ten di Rome ben tiri a presi, yonguwan fu Egepte di abi sowan 13 yari ben go na sma fu leri fa fu du a wroko dati. Efu Paulus ben abi a yari dati di a bigin leri du a wroko disi, dan kande di a ben abi 15 noso 16 yari, a ben sabi kaba fa fu koti krosi na ini difrenti pisi èn fa fu gebroiki difrenti prin fu nai den tenti. Wan buku e taki dati „di Paulus ben kaba leri fa fu meki tenti, dan a kan taki a ben kisi en eigi wrokosani tu”. A srefi buku e taki dati „fu di na soso nefi nanga prin ben de fanowdu fu du a wroko disi, meki Paulus ben man tyari den wrokosani disi awinsi pe a e go” (The Social Context of Paul’s Ministry). Disi ben o man yepi Paulus fu sorgu gi ensrefi leki zendeling di ben e go na difrenti presi.