„A HISTORIA no e lei.” Disi na wan sani di furu sma na ini Estkondre gwenti taki, èn na ini tra kondre sma e taki wan srefi sortu sani tu. Iya, wi no man kenki sani di pasa kaba, ma wi kan leri wan sani fu den. A koni Kownu Salomo fu owruten Israel ben taki: „Ala den sani disi mi si èn mi poti prakseri na ibri sani di sma du na grontapu. Mi si taki sensi di libisma bigin tiri tra libisma, sani no waka bun gi den.”​—Preikiman 8:9.

A sani disi di Bijbel e taki ben de krin fu si someni tenti yari pasa na ini Estkondre èn na ini tra kondre na a owstu-sei fu Europa. Libisma tiriman pina bun furu sma di no ben du nowan ogri, fu di den teki den sma disi tyari go tan na farawe presi, noso fu go wroko leki srafu na strafuman-kampu.

Soleki fa historia skrifiman fu Estkondre e taki, dan na moro leki 46.000 sma fu a pikin kondre disi den tyari gowe na ini a pisi ten fu 1941 te go miti 1951. Furu fu den sma disi den tyari gowe fu di den ben de bakaman fu wan spesrutu politiek partèi. Trawan den tyari gowe fu di den ben de borgu fu wan tra kondre, noso fu di den ben abi wan spesrutu posisi. Ma den Yehovah Kotoigi den tyari gowe fu a bribi fu den ede.

Baka di na Universiteit fu Tartu du wan ondrosuku, dan na ini 2004, den tyari kon na doro san den ben kon sabi. A historia skrifiman Aigi Rahi-Tamm, di ben teki prati na a ondrosuku disi ben taki: „Bigin fu 1948 te go miti 1951, sma hori 72 Yehovah Kotoigi nanga sma di ben e moksi nanga den. Ma den ben e seti sani tu fu tyari wan moro bigi grupu sma gowe, èn na dati pasa tu a neti fu 1 april 1951. A sani disi no pasa soso na ini den Baltis kondre, ma sosrefi na ini Moldafia, na den presi na a west-sei fu Ukraini, èn na ini Belorosia.”

Fosi 1951, lanti fu Estkondre ben e tapu skreki gi Yehovah Kotoigi, den ben e poti omeni aksi gi den, èn den ben e poti den na strafu-oso. Soleki fa a sori, dan di lanti bigin tyari den Yehovah Kotoigi komoto na ini Estkondre, dan na puru den ben wani puru den alamala na pasi.

A dei 1 april 1951, skrifi na tapu a stampu di kari na tapusei. A nomru 382 di de na tapu a stampu e sori omeni Kotoigi nanga pikin den  tyari gowe a dei dati. Sonwan fu den sma dati no ben de Kotoigi, ma den ben de famiriman nanga birtisma. Na deiten den grabu sma na ala sei fu a kondre. A neti dati, den lai den sma disi, yonguwan nanga owruwan, na ini den wagi fu wan loko di ben e tyari meti èn den seni den go na Siberia.

Ella Toom, * di ben abi 25 yari na a ten dati, ben de wan Kotoigi fu Yehovah. A e memre fa wan skowtu ben poti aksi gi en. A e taki: „Wan skowtu ben pruberi fu tapu skreki gi mi èn a taigi mi taki mi ben musu tapu nanga a preikiwroko. Wan leisi a aksi mi: ’Yu wani libi, noso yu wani dede makandra nanga a Gado fu yu na ini den gron fu Siberia?’” Ma Ella tan preiki a bun nyunsu sondro fu frede. Den seni en go na Siberia, èn na ini wan pisi ten fu sowan siksi yari, den tyari en fu a wán strafuman-kampu go na a trawan.

Wan fu den hondrohondro sma di den teki tyari gowe wantronso, na wan yongu Kotoigi sisa di nen Hiisi Lember. A e fruteri san pasa tapu 1 april 1951: „Den kon neti yuru sondro taki wi ben fruwakti dati. Ne den bigin bari gi wi: ’Un abi wan afu yuru nomo. Un teki san un abi fanowdu!’” Kibrikibri na ini a dungru fu a neti, den teki Hiisi nanga en umapikin fu siksi yari tyari gowe na a loko station. A loko di ben e seki-seki, ben e rèi fu a wan station go na a trawan fu go teki moro Kotoigi. „Den ben lai wi na ini wan wagi fu a loko pe den ben e tyari meti. Koloku taki a kowru ben meki taki a pupe fu den meti ben kon tranga, noso a ben o hebi gi wi fu tanapu na ini. Wi ben de leki meti di den lai na ini wagi.”

Den takru sani di wi ondrofeni na ini den tu wiki di wi ben de na pasi, no ben bun srefisrefi gi wi. Den wagi ben lai tumusi nanga sma èn den ben fisti. Yonguwan nanga owruwan ondrofeni wan lo syen sani. Sonwan fu den ben e krei èn den no ben wani nyan. Ma den Kotoigi ben e gi makandra deki-ati èn den ben e yepi makandra. Den ben e singi prèisesingi èn den ben e prati a nyanyan fu den nanga makandra. Den seni den go na wan presi pe den ben o tan fu ala ten èn den taigi den taki noiti moro den ben o drai go baka.

Hiisi e memre ete fa tra bribiman ben yepi en na wan lobi-ati fasi na ini a muilek pisi ten dati. A e taki: „Na wan fu den station, a loko fu wi ben stop na sei wan tra loko di ben komoto fu Moldafia. Ne wan man na ini a loko dati aksi wi suma na wi èn pe wi ben e go. Wi taigi en taki wi no sabi pe wi e go èn taki wi na Yehovah Kotoigi fu Estkondre. Tra Kotoigi na ini a loko di ben komoto fu Moldafia, yere san wi ben taki. Ne den fringi wan bigi langa brede nanga wan tu froktu gi wi komoto fu wan olo na ini a wagi.” Hiisi e taki moro fara: „Dan fosi wi bigin frustan omeni Yehovah Kotoigi den ben grabu. Den ben grabu Kotoigi fu ala den kondre fu a Sovyet-Unie!”

Tu tini Kotoigi, Corinna nanga en sisa Ene, ben prati fu den mama moro leki siksi yari. Wan pisi ten na fesi, den ben grabu den mama di de wan Kotoigi fu Yehovah tu èn den seni en go na wan strafuman-kampu. Ne, na a takru april neti dati, den grabu den tu yongu meisje disi puru na ini den oso tyari go poti na ini wan fu den wagi fu a loko. Corinna de nanga tangi te a e memre a sani disi di ben pasa nanga den: „Di wi ben de na ini a loko, wan Kotoigi nanga tu pikin taki dati a ben o sorgu gi wi èn a pramisi wi taki wi ben kan libi makandra leki wan osofamiri.”

San yu denki pasa di wi doro na a presi pe wi  ben musu go? A dei baka di wi doro na ini a kowru Siberia-sabana, wan sortu srafu wowoyo bigin. A sani disi ben meki taki wi firi syen kefalek. Mansma fu den burugron ben kon suku wrokoman gi den gron fu den. Corinna e memre: „Wi ben e yere fa den e haritaki nanga makandra. Den ben e taki: ’Yu abi wan sma kaba fu rèi a tractor fu yu. A wan disi na fu mi.’ Trawan ben e taki: ’Mi teki tu owruwan kaba. Yu musu teki wan tu owruwan tu.’”

Corinna nanga Ene ben hori densrefi. Bakaten den taki: „Wi ben misi wi mama so te. Wi ben e angri trutru fu firi a waran brasa fu en baka!” Toku den no lasi a matifasi di den ben abi nanga Yehovah èn den tan lafu fu sani. Corinna e taki moro fara: „Na a wan sei a ben bun taki wi mama no ben si wi, fu di son leisi wi ben abi fu wroko tranga na ini a hebi kowru sondro taki wi ben abi bun krosi fu waran wi skin.”

Fu taki en leti, furu ogri ben miti sma fu Estkondre èn fu tra presi, aladi den sma disi no ben du nowan ogri. Yehovah Kotoigi leki grupu, ben de tu na mindri den sma disi. (Luku a faki „Bun furu ’ogri pasa.’”) Aladi Yehovah Kotoigi na ini Estkondre ondrofeni someni takru sani na ini a ten di pasa, toku den e dini Gado fayafaya ete èn den de koloku.

Bijbel e sori wi krin taki Yehovah Gado no lobi kruktudu. A e taki: „Yehovah un Gado e tegu gi iniwan sma di e du den sani disi, sobun iniwan sma di e du kruktu sani” (Deuteronomium 25:16). A tru taki Gado gi pasi taki sma du ogri na ini a ten di pasa, ma heri esi a o tyari wan kaba kon na ogridu nanga kruktudu. „Ete wan syatu pisi ten”, na so a psalm skrifiman taki, „èn den ogriwan no sa de moro. Yu o luku pe den ben de fosi, ma den no sa de moro. Ma den safri-ati sma o kisi grontapu èn den o prisiri srefisrefi, fu di freide o de pasa marki.”​—Psalm 37:10, 11.

Iya, wan tumusi moi ten de na wi fesi. Wi no man kenki den sani di pasa kaba, ma den sani di wi e du now kan meki taki wi abi wan switi libi na ini a ten di e kon. Kon krosibei na Gado, so taki yu kan libi na ini a moi pisi ten te retidu o lai na grontapu.​—Yesaya 11:9.