Sma e suku a switi fu Kresneti
„A kan pasa makriki taki wi e bigin lonlon fu du wan lo sani na Kresnetiten. Na a ten dati, sma abi so furu sani fu du, taki son leisi den no abi ten moro gi famiriman nanga mati. Wi e fruwakti fu abi wan prisiri ten, ma nofo tron dati no e pasa fu di wi e broko wi ede nanga someni sani.” —23 DECEMBER 2008, BRAD HENRY, DI BEN DE KOMSARSI FU A FOTO OKLAHOMA NA AMERKANKONDRE.
TE KRESNETI e doro, dan singi, felem, nanga telefisi programa e meki taki sma e bigin firi a switi fu Kresneti. San yu denki na a moro prenspari sani di sma musu du na a ten disi? Yu denki taki sma musu:
Memre Yesus Krestes?
Gi trawan kado nanga prisiri?
Yepi den mofinawan?
Meki ten gi famiri?
Suku freide?
Soleki fa Komsarsi Henry di kari kaba ben taki, dan furu sma di e hori Kresneti feni en muilek fu du ala den sani di den wani du na Kresnetiten. Nofo tron sma abi furu fu du na a ten disi èn den e broko den ede nanga wan lo sani. Ma san moro ogri, na taki furu fu den e suku nomo fu bai noso seri sani. Yu denki taki sma no man abi wan switi Kresnetiten, soleki fa den e fruwakti?
A tru taki Bijbel e gi wi alamala deki-ati fu memre Yesus Krestes, fu de klariklari fu gi sma sani, fu yepi den mofinawan, èn fu meki ten gi wi famiriman. Bijbel e leri wi tu fa fu de sma di lobi freide. Fu dati ede, den artikel disi no o sori fu san ede son sma no e hori Kresneti, * ma na presi fu dati den o poti prakseri na den aksi disi:
Fu san ede son sma e hori Kresneti?
Fu san ede a no makriki gi den fu du den sani di den wani du na Kresnetiten?
Sortu leri fu Bijbel yepi milyunmilyun sma fu feni wan sani di bun moro Kresneti?
^ paragraaf 10 Fu kon sabi sortu leri fu Bijbel e meki son sma bosroiti fu no hori Kresneti, dan luku na artikel „Leisiman e aksi—Fu san ede son sma no e hori Kresneti?”
