Fu di ala Israelsma ben de bakapikin fu wán man di ben nen Yakob, noso Israel, meki den ben de „brada”, noso memre fu wán famiri. Te den ben kon makandra na den fesa na ini Yerusalem, dan dati ben „bun” èn a ben „switi”. Neleki den sma dati, furu famiri na ini a ten disi lobi fu kon makandra na Kresnetiten fu abi wan „bun” èn „switi” ten.

Wan buku e taki: „Te famiriman no e lusu pikinpikin kesekese di den abi nanga makandra a heri yari, dan den sani dati kan kon tron bigi trobi te den e kon makandra na Kresnetiten” (Encyclopedia of Christmas and New Year’s Celebrations).

„Gi [yu] papa nanga mama èn [yu] granpapa nanga granmama san den abi reti na tapu” (1 Timoteyus 5:4). Efu a kan, dan du muiti fu go luku yu famiri ten na ten. Awansi den famiriman fu yu e libi farawe, toku fasi de fa yu kan taki nanga den. Yu kan skrifi wan brifi gi den, yu kan bèl den, yu kan seni wan e-mail gi den, noso yu kan taki nanga den tapu Internet. Te yu abi a gwenti fu taki nanga yu famiri, dan a no o pasa so furu taki unu e kisi kesekese.

„Unu no e sori taki unu lobi wi. . . . Opo un ati moro gi wi” (2 Korentesma 6:12, 13). Te yu e si den famiriman fu yu wán leisi nomo wan yari, dan heri esi yu no o gwenti den moro. Spesrutu den pikin fu yu o abi problema nanga a sani disi. Son pikin feni taki den no sabi den granpapa noso den tra famiriman fu den. Dati meki a bun te yu e gi den pikin fu yu deki-ati fu ’opo den ati moro’ fu sori lobi tu gi den moro owruwan na ini a famiri. * Pikin di gwenti abi demakandra nanga moro owru sma, e sori moro switifasi nanga warderi gi den sortu sma dati.

„Wan sani di taki na a yoisti ten, bun srefisrefi” (Odo 15:23). Fa yu kan sorgu taki kesekese noso problema no e tyari trobi kon na ini a famiri? Wan sani di yu kan du, na fu lusu seryusu problema „na a yoisti ten”. Efu yu gwenti taki nanga den famiriman fu yu, dan a o moro makriki gi yu fu go taki nanga den fu lusu problema èn fu abi wan „bun” èn „switi” ten te unu de makandra.