Fu di Yesus ben yepi pôti sma, siki sma, nanga sma di ben de na nowtu, meki son sma wani teki na eksempre fu en. Den sma disi feni taki a moro bun ten fu du dati, na Kresnetiten, te organisâsi di e yepi den pôtiwan e du tranga muiti fu feni sma di wani gi moni fu yepi trawan.

Na Kresnetiten, furu sma e gebroiki den ten fu go bai sani, fu kari sma kon na den oso, èn fu go luku mati nanga famiri. Ala den sani disi e meki taki den no abi a ten, a krakti, noso a moni fu poti prakseri na pôti sma èn na sma di de na nowtu. Son leisi, na wan moni nomo den kan gi wan organisâsi di e yepi den mofinawan.

„Tan du bun gi den wan di de na nowtu, te yu man du dati” (Odo 3:27). Den pôtiwan, den wan di de nanga angri, nanga den wan di de na nowtu, no e pina soso na Kresnetiten. Efu yu e si taki wan sma abi yepi fanowdu, èn „yu man” yepi en, dan fu san ede yu e wakti teleki wan fesadei doro fu yepi a sma dati? Yu o kisi blesi te yu e sori switifasi nanga sari-ati gi a sma dati.

„Ibri fosi dei fu a wiki, ibriwan fu unu musu poti san a man na wan sei” (1 Korentesma 16:2). Na apostel Paulus ben gi a rai dati na den fositen Kresten di ben wani yepi den pôtiwan. Kande yu kan teki en leki wan gwenti fu ’poti moni na wan sei’ fu yepi sma noso wan organisâsi di e gebroiki a moni disi na wan koni fasi. Na so yu o sori taki yu e broko yu ede nanga den pôtiwan, èn yu no o meki paiman di yu no man pai.

„Un no musu frigiti fu du bun èn fu prati san unu abi nanga trawan, bika Gado e prisiri nanga den sortu ofrandi dati” (Hebrewsma 13:16). Ma boiti taki wi e ’prati sani nanga trawan’, wi no musu frigiti fu „du bun” gi den. Fu eksempre, koni papa nanga mama e leri den pikin fu den fu yepi owrusma nanga difrenti sortu wroko. Fu eksempre, den e gi den pikin deki-ati fu skrifi wan karta gi den sma disi, fu go luku den, noso fu bèl den. Den e leri den pikin tu fu poti prakseri na tra pikin di pôti noso di siki. Na so pikin e leri fu abi switifasi èn fu du bun gi trawan a heri yari.