Na ini a Bergitaki fu en, Yesus ben taigi den bakaman fu en: „Unu na a sowtu fu grontapu. Ma efu sowtu no abi tesi moro, dan fa a o kon sowtu baka? Yu no man gebroiki en gi noti moro. Na fu teki en trowe go na dorosei meki sma trapu na en tapu” (Mateyus 5:13). Sowtu e meki taki sani no pori. Sobun, a kan taki Yesus ben gebroiki na agersitori disi fu sori den disipel fu en taki den man kibri sma gi sani di kan pori a matifasi di den abi nanga Gado, èn a bun fasi fu den. A prenspari srefisrefi taki den e kibri sma gi den sani disi.

Ma luku san wan buku e taki fu na agersitori fu Yesus: „Nofo tron a sowtu na ini a kontren fu a Dede Se ben moksi nanga tra sani. Sobun, te a sowtu ben nati, dan a ben e lasi en krakti, èn soso den tra sani di ben de na ini ben e tan abra” (The International Standard Bible Encyclopedia). Dati meki wi kan frustan fu san ede Yesus ben taki dati „yu no man gebroiki en gi noti moro. Na fu teki en trowe go na dorosei”. „Aladi a doti sowtu fu a Dede Se no ben bun so leki furu tra sowtu, toku drape ben de a moro prenspari presi pe den sma fu Palestina ben feni sowtu. Dati e kon fu di a ben makriki fu feni (sma ben kan piki en na sesyoro).”

Yesus ben fruteri na agersitori fu wan uma di ben lasi wan fu den tin solfru moni fu en. Ne a teki wan lampu èn a teki en ten fu sibi en oso teleki a feni a moni (Lukas 15:8-10). Na ini a ten fu Yesus, wan solfru moni ben de pikinmoro a moni di sma ben e meki gi wan heri dei wroko. Sobun, na uma na ini na agersitori ben lasi bun furu moni. Ma tra reide de fu san ede Yesus ben fruteri na agersitori dati.

Son buku di e taki fu Bijbel, e sori taki umasma ben gwenti gebroiki solfru moni fu weri na den skin leki moimoi sani. Sobun, a kan taki Yesus ben e taki fu wan solfru moni di na uma ben kisi leki gudu fu en afo. Noso kande a ben de wan fu den solfru moni di a masra fu na uma ben kisi di a trow nanga en. Awansi fa a no fa, efu na uma ben lasi wan fu den tin solfru moni fu en, dan a no de fu taki dati a ben o wani feni en baka.

Boiti dati, na ini a ten fu Yesus, furu oso ben meki na so wan fasi taki furu leti no ben e skèin kon na inisei, èn den no ben e kon faya tumusi. Den oso ben abi wan tu fensre nomo. Nofo tron, sma ben e panya drei grasi noso drei tiki fu difrenti sortu bon na tapu a gron fu na oso. Efu wán solfru moni ben fadon na gron, a ben o muilek fu feni en. Wan sabiman e taki: „Dati meki te wan pikin sani soleki wan solfru moni ben fadon na ini so wan presi, dan sma ben gwenti leti wan lampu èn den ben gwenti sibi na oso fu man feni a moni dati baka.”