A tijdschrift di yu e leisi now kon na doro fu a fosi leisi na ini yuli 1879. Sensi a ten dati sani kon kenki, èn na dati pasa tu nanga a tijdschrift disi. (Luku den fowtow na tapusei.) Bigin nanga A Waktitoren disi, yu o si taki moro kenki kon na ini a fasi fa A Waktitoren seti. San na den kenki dati?

Na ini furu kondre, moro nanga moro sma di wani sabi sani, lobi go tapu Internet. Te den de tapu Internet, dan a makriki fu feni den sani di den wani sabi. Na ini a ten disi furu buku, tijdschrift, nanga koranti de fu leisi tapu Internet.

Fu di so furu sma lobi leisi sani tapu Internet, meki no so langa pasa wi seti a website fu wi, www.pr418.com, moro moi èn a moro makriki fu gebroiki. Sma di e go na a website kan leisi buku noso tijdschrift na ini moro leki 430 tongo. Ma bigin nanga A Waktitoren disi, sma di e go na a website fu wi kan leisi spesrutu artikel tu di ben e kon na doro ibri tron baka na ini den tijdschrift fu wi, ma di o de fu leisi now soso na a website fu wi. *

Fu di wi o tyari moro artikel kon na doro soso na a website fu wi, meki bigin nanga a wan disi, A Waktitoren gi a preikiwroko no o abi 32 bladzijde moro, ma 16 bladzijde. A Waktitoren e kon na doro kaba na ini 204 tongo. Fu di a tijdschrift disi no o abi so furu bladzijde moro, meki a o moro makriki fu vertaal en na ini moro tongo srefi.

Wi e howpu taki den kenki disi o meki taki moro sma e yere a Bijbel boskopu di e kibri sma libi. Wi o tan gebroiki den tijdschrift nanga a website fu tyari bun furu moi tori kon na doro di o yepi sma di e lespeki Bijbel èn di wani kon sabi san a e leri trutru.

Den sma di tyari a tijdschrift disi kon na doro