San Gado e aksi fu wi? A de so taki a poti wan lo wèt gi wi? Koloku taki dati no de so. Soleki fa Gado en eigi Manpikin, Yesus Krestes e sori, dan wán wortu sari kaba fu taki san Gado e aksi fu wi.—Leisi Markus 12:28-31.

Luku san ben de a situwâsi di Yesus ben taki a sani dati. A ben e gi sma leri na ini a tempel tapu 11 Nisan, wan tu dei fosi a dede. Den feanti fu en ben aksi en wan lo fruferi sani fu di den ben wani meki a taki wan sani di no bun. Ibri leisi a piki den na so wan fasi taki den no ben man taki noti. Ne den aksi Yesus a sani disi: „Sortuwan fu den komando na a moro prenspari wan?”—Vers 28.

Dati ben de wan muilek aksi. Son Dyu ben e haritaki nanga makandra sortuwan fu den moro leki 600 wèt di Gado ben gi den Israelsma, ben de a moro prenspariwan. Soleki fa a sori, dan trawan fu den ben feni taki ala den wèt ben prenspari a srefi èn taki a no ben bun fu denki taki sonwan fu den ben prenspari moro trawan. Fa Yesus ben o piki na aksi?

Yesus no taki fu wán komando, ma a taki fu tu komando. A fosi sani di a taki na: „Un musu lobi Yehovah un Gado nanga un heri ati, nanga un heri libi, nanga un heri frustan, èn nanga ala un krakti” (Vers 30; Deuteronomium 6:5). Aladi Yesus e kari na ati, a frustan, a libi, nanga a krakti leki fo aparti sani, toku ibriwan fu den fo sani disi abi fu du nanga makandra, fu di den e taki fu a sma di wi de trutru na ini wi ati. * Na so Yesus ben sori krin san a wani taki fu lobi Gado trutru. A wani taki dati wi lobi en nanga ala san wi abi. Wan buku di e fruklari Bijbel e taki en so: „Wi musu lobi Gado nanga wi heri ati.” Efu yu lobi Gado na a fasi disi, dan yu o du ala san yu man fu libi ibri dei na wan fasi di sa meki a firi prisiri.—1 Yohanes 5:3.

A di fu tu sani di Yesus taki na: „Un musu lobi tra sma leki fa un lobi unsrefi” (Vers 31; Lefitikus 19:18). Lobi gi Gado èn gi tra sma na tu sani di abi furu fu du nanga makandra. Te wi lobi Gado dan wi o lobi tra sma tu (1 Yohanes 4:20, 21). Efu wi lobi tra sma leki fa wi lobi wisrefi, dan wi o libi nanga den soleki fa wi wani taki den libi nanga wi (Mateyus 7:12). Na so wi e sori taki wi lobi a Gado di meki wi nanga den na so wan fasi taki wi gersi en.—Genesis 1:26.

O prenspari a de fu lobi Gado nanga tra sma? Yesus taki: „Wan moro bigi komando leki den wan disi no de” (Vers 31). Na ini a Bijbel buku Mateyus di e taki fu a srefi tori disi, Yesus taki dati ala den tra komando abi fu du nanga den tu komando disi.—Mateyus 22:40.

A no muilek fu du san Gado e aksi fu wi. Wán wortu sari kaba fu taki san a e aksi fu wi. Dati na: lobi. Ala ten Gado e fruwakti taki den futuboi fu en lobi en, èn ala ten a o fruwakti dati tu. Ma lobi a no wan sani di yu e taki noso di yu e firi nomo. Wi musu du sani fu sori taki wi abi lobi (1 Yohanes 3:18). Fu san ede yu no e leri fa yu kan kweki èn sori lobi gi Yehovah, a Gado di Bijbel e taki fu en taki en „na lobi”?—1 Yohanes 4:8.