Soleki fa yu sabi, dan wan lei na wan sani di yu e fruteri aladi yu sabi taki a no tru. Oiti yu fruteri wan lei?— * Srefi son bigisma di lobi Gado ben fruteri lei. Kande yu sabi wan sma na ini Bijbel di ben du dati. En nen na Petrus, wan fu den 12 apostel fu Yesus. Meki wi go arki fu san ede a ben fruteri wan lei.

Baka di den grabu Yesus, den tyari en go na a oso fu a granpriester. Mindrineti ben pasa kaba. Petrus e go na ini a fesidyari fu a priester sondro taki sma sabi suma na en. Te a leti fu wan faya e skèin na tapu Petrus, dan na umasrafu fu a granpriester di ben meki Petrus kon na inisei, e kon si suma na en. A e taki: „Yu ben de tu nanga Yesus.” Fu di Petrus frede, meki a e taigi en taki dati no tru.

Bijbel e taki dati bakaten „wan tra meisje si en”. A meisje taki: „A man disi ben de nanga Yesus.” Petrus e taki ete wan leisi taki dati no tru. Baka wan pisi ten, tra sma e waka go na Petrus èn den e taki: „A tru taki yu na wan fu den tu.”

Petrus frede. Dati meki fu a di fu dri leisi a e lei èn a e taki: „Mi no sabi a sma!” Wan kakafowru e bari. Yesus e luku Petrus èn Petrus e memre taki wan tu yuru na fesi, Yesus ben taigi en: „Bifo wan kakafowru bari, yu o taki dri leisi taki yu no sabi mi.” Wantewante Petrus e bigin krei. A e sari srefisrefi!

Yu denki taki wan srefi sortu sani ben kan pasa nanga yu?— Kande yu de na skoro, èn yu e yere fa den pikin e taki sani fu Yehovah Kotoigi. Kande wan fu den e taki: „Den no e singi gi a fraga.” Kande wan trawan e taki: „Den no e feti gi a kondre fu den.” Kande ete wan trawan e taki: „Den a no tru Kresten, bika den no e hori Kresneti.” Ne wan fu den e drai  luku yu èn a e taki: „Yu na wan Yehovah Kotoigi, tòk? San yu o taki?—

Nownow kaba yu musu sabi san yu o piki te sma aksi yu so wan sani. Petrus no ben sreka ensrefi. Di tesi miti en, dan a lei! Ma toku a ben sari srefisrefi fu a sani di a du, èn Gado gi en pardon.

Ananias, wan tra disipel fu Yesus, ben lei tu. Ma Gado no gi en nanga en wefi Safira pardon. Safira nanga en masra ben meki mofo fu lei. Meki wi luku fu san ede Gado no gi Ananias nanga Safira pardon.

Tin dei baka di Yesus gowe libi den apostel fu drai go baka na Gado na hemel, dan sowan 3000 sma e teki dopu na ini Yerusalem. Furu sma komoto fu farawe kondre fu hori a Pinksterfesa. Now di den tron disipel fu Yesus, den wani tan moro langa fu kon sabi a nyun bribi fu den moro bun. Fu dati ede wan tu fu den disipel fu Yesus e gebroiki den eigi moni fu sorgu gi den.

Ananias nanga en wefi seri wan pisi gron fu man yepi den nyun Kresten nanga a moni dati. Te Ananias tyari a moni gi den apostel, dan a e taki dati disi na ala a moni di a kisi gi a gron. Ma dati no tru! A hori pikinso fu a moni gi ensrefi! Gado e meki Petrus kon sabi disi, èn fu dati ede Petrus e taigi Ananias: „A no gi libisma yu lei, ma gi Gado.” Wantewante Ananias e fadon dede! Sowan dri yuru baka dati, en wefi e kon na inisei. A no sabi san pasa nanga en masra. En srefi e fruteri wan lei èn a e fadon dede leti drape.

Wi e leri wan seryusu sani fu a tori disi: A prenspari fu taki san tru! Iya, wi alamala musu leri dati! Toku wi alamala o meki fowtu, spesrutu te wi yongu. Yu no breiti taki Yehovah lobi yu èn taki a o gi yu pardon neleki fa a ben du dati gi Petrus?— Ma hori na prakseri taki wi musu taki san tru. Ma efu oiti wi meki a bigi fowtu fu lei, dan wi musu aksi Yehovah fu gi wi pardon, iya, wi musu begi en. A musu de so taki na dati Petrus du, èn a kisi pardon. Te wi e du tranga muiti fu no lei moro, dan Gado o gi wi pardon tu!