„MI ABI wan dren.” Na a sani disi Martin Luther King, Jr. ben taki na ini a pôpi taki fu en, 50 yari pasa, tapu 28 Augustus 1963. Na Amerkan man disi ben de fesiman fu wan grupu di ben e feti gi den reti fu sma. Den moi wortu disi di skrifi na a bigin fu na artikel, ben de fu yere ibri tron baka na ini a taki fu King. A ben e taki a sani disi fu di a ben abi a howpu taki wan dei ben o kon te sma ben o man libi sondro taki trawan ben e denki takru fu den, soso fu di den de fu wan tra ras. Aladi a ben hori a taki disi gi sma na ini Amerkankondre, toku furu sma na ini tra kondre e agri nanga den sani di a taki a dei dati.

Tapu 20 November 1963, dri mun baka di King hori a taki fu en, moro leki 100 kondre horibaka gi a bosroiti di a VN teki fu tyari wan kaba kon na iniwan fasi fa sma e desko trawan. Na ini den yari baka dati, na organisâsi disi horibaka gi furu tra bun sani di sma na difrenti kondre bosroiti fu du. A no de fu taki dati ala den bun sani disi di sma pruberi fu du, e meki na aksi disi opo kon: „San ben de a bakapisi?”

Tapu 21 maart 2012, Ban Ki-moon, fesiman fu a V.N, ben taki: „Furu bun bosroiti nanga fasi de fu tapu pasi gi a desko di sma e desko trawan noso fu tyari wan kaba kon na a sani dati. Srefi wan heri programa de fu sani di na organisâsi e du fu tyari wan kaba kon na den problema disi na heri grontapu. Toku milyunmilyun sma na heri grontapu e tan pina fu di trawan e desko den.”

Srefi na ini kondre pe sma ben man tapu pasi pikinso gi a desko di sma e desko trawan, sma e tan aksi densrefi a sani disi: A sani dati ben man rutu den firi puru di sma abi dipi na ini den ati? Noso na leri a e leri sma nomo fu no sori taki den e denki takru fu trawan? Son sma e bribi taki a wán-enkri bun sani di den e si, na taki a kon moro muilek gi sma fu desko trawan, ma noti no man tapu sma fu denki takru fu trawan. Fu san ede? Fu di yu kan si te wan sma e desko wan trawan èn a sma disi kan kisi strafu gi a sani dati. Ma te wan sma e denki takru fu wan trawan, dan a no makriki fu kon sabi dati.

Sobun, fu man tyari wan kaba kon na a desko di sma e desko trawan, dan a prenspari fu kenki a fasi fa sma e denki fu sma di de fu wan tra ras noso fu wan tra grupu. A tru taki sma man tyari a kenki disi kon? Fa den kan du dati? Meki wi luku wan tu ondrofenitori di o yepi wi fu kon si taki sma man kenki, èn taki wan sani de di kan yepi den fu tyari a kenki dati kon.

Linda: Mi gebore na ini Zuid-Afrika. Mi ben e si ibri Afrikansma di no ben weti, leki wan sma di lagi moro mi, leki wan sma di no teki skoro, èn di no de fu frutrow. Mi ben e si den soso leki futuboi fu weti sma. Mi ben abi a gwenti fu denki takru fu trawan, aladi mi no ben sabi dati. Ma mi bigin denki tra fasi di mi bigin studeri Bijbel. Mi kon sabi taki „Gado no lobi a wan sma moro a trawan” èn taki na ati fu wan sma prenspari moro gi En leki a kloru fu wi skin noso a tongo di wi e taki (Tori fu den apostel 10:34, 35; Odo 17:3). A Bijbeltekst fu Filipisma 2:3, yepi mi fu si taki efu mi ben o si ala sma leki den hei moro mi, dan mi no ben o denki takru moro fu trawan. Fu di mi ben e hori misrefi na den sortu Bijbel leri disi, meki mi bigin poti prakseri na tra sma,  awansi sortu kloru den skin ben abi. Now, mi e firi bun fu di mi no e denki takru moro fu sma.

Micheal: Mi gro kon na ini wan kontren na ini Australia pe moro furu weti sma e tan, èn mi bigin denki takru fu sma fu Asia, spesrutu den Sneisi. Efu mi ben e sidon na ini wan wagi èn mi ben e si wan sma di ben gersi wan Sneisi, dan mi ben e saka a fensre èn mi ben e bari sani gi den soleki „Sneisi, go baka na yu kondre!” Bakaten, di mi bigin studeri Bijbel, mi kon sabi fa Gado e si sma. A lobi den awansi pe den komoto èn awansi sortu kloru den skin abi. A lobi disi naki mi ati, èn a bita-ati di mi ben abi kenki kon tron lobi. A de wan heri moi sani fu ondrofeni so wan bigi kenki. Now mi e prisiri srefisrefi fu di mi e moksi nanga sma fu ala kondre nanga kulturu. A sani disi meki mi kon abi wan heri tra denki fu a libi, èn a e gi mi furu prisiri.

Sandra: Mi mama ben de fu a foto Umunede na ini Delta State, Nigeria. Ma a famiri fu mi papa na fu Edo State èn den e taki a Esantongo. Den difrenti disi meki taki a famiri fu mi papa tan meki en muilek gi mi mama te na a dede fu en. Sobun, mi sweri taki noiti mi ben o bumui nanga sma di ben e taki Esantongo, èn noiti mi ben o trow nanga wan sma fu Edo State. Ma di mi bigin studeri Bijbel, mi bigin si sani tra fasi. Bijbel e taki dati Gado no lobi a wan sma moro a trawan èn taki a feni iniwan sma bun di abi bigi lespeki gi en. Sobun, suma na mi fu abi bita-ati gi sma, soso fu di den de fu wan tra ras noso fu di den e taki wan tra tongo? Mi bigin denki tra fasi èn mi meki sani bun baka nanga a famiri fu mi papa. Fu di mi e hori misrefi na den leri fu Bijbel, meki mi de koloku now èn mi abi wan korostu firi. A sani disi yepi mi tu fu feni en moro bun nanga trawan, awansi fu sortu kulturu, ras, noso kondre den de, noso awansi sortu tongo den e taki. Yu wani sabi nanga suma mi trow? Nanga wan man fu Edo State, èn a e taki Esantongo!

Fu san ede Bijbel ben man yepi den sma disi nanga furu trawan sosrefi fu tapu nanga a gwenti di den ben abi fu denki takru fu trawan? Na fu di Bijbel  na Gado Wortu. A man kenki a fasi fa wan sma e denki fu trawan. Boiti dati, Bijbel e sori sortu tra sani de fanowdu fu meki taki nowan sma e denki takru moro fu trawan.

A tru taki a sabi fu Bijbel kan yepi sma fu basi èn fu rutu den firi puru di den abi dipi na ini den ati. Ma fu man sorgu taki nowan sma no e denki takru moro fu trawan, dan ete tu sani de di musu kon na wan kaba fosi. A fosiwan, na den sondu nanga den swakifasi fu libisma. Bijbel e taki: „Nowan sma de di no e sondu” (1 Kownu 8:46). Sobun, awansi fa wi e meki muiti, wi musu feti a srefi feti leki na apostel Paulus di ben skrifi: „Te mi wani du bun, dan ogri de na ini mi” (Romesma 7:21). Sobun, ten na ten „takru prakseri” o kon baka na ini a sondu ati fu wi, èn a sani disi kan meki wi denki takru fu trawan.—Markus 7:21.

A di fu tu sani, na a krakti di Satan Didibri abi na libisma tapu. Bijbel e taki dati a de „wan kiriman” èn taki a e „a e kori sma na heri grontapu” (Yohanes 8:44; Openbaring 12:9). A sani dati e sori fu san ede so furu sma e denki takru fu trawan èn fu san ede a gersi leki libisma no man du noti fu tyari wan kaba kon na a hoigri di sma e hoigri, a desko di sma e desko trawan, a kiri di sma e kiri ipi-ipi trawan, nanga tra sortu ogri leki den wan disi.

San musu pasa fosi fu meki taki nowan sma e denki takru moro fu wan trawan? We, sondu nanga swakifasi fu libisma musu puru na pasi, èn Satan no musu abi krakti moro tu tapu libisma. Bijbel e sori taki na dati Gado Kownukondre o du.

Yesus Krestes ben leri den bakaman fu en fu begi Gado na a fasi disi: „Meki yu Kownukondre kon. Meki yu wani pasa na grontapu soleki fa a e pasa na hemel” (Mateyus 6:10). Nanga yepi fu Gado Kownukondre, wan kaba o kon na ala kruktudu, sosrefi na ala fasi fa sma e denki takru fu trawan.

Te Gado Kownukondre kon èn a teki ala sani abra na grontapu, dan den o „tai” Satan, noso den o tapu pasi gi en krinkrin, so taki a no man „kori den pipel moro” (Openbaring 20:2, 3). Na a ten dati, wan „nyun grontapu”, noso wan nyun libimakandra o de pe „retidu o de”. *—2 Petrus 3:13.

Den sma di o libi na ini a libimakandra dati pe retidu o de, o tron sma di no sa abi sondu moro (Romesma 8:21). Leki borgu fu Gado Kownukondre, „den no o du nowan ogri èn den no o pori nowan sani”. Fu san ede? „Fu di heri grontapu o furu nanga a sabi fu Yehovah” (Yesaya 11:9). Na a ten dati, ala libisma o kon sabi den pasi fu Yehovah èn den o sori den bun fasi fu en. A sani disi o meki trutru taki nowan sma o denki takru moro fu trawan, „bika Gado no lobi a wan sma moro a trawan”.—Romesma 2:11.