Sensi di mi ben pikin, mi lobi den sani di Gado meki. Mi nanga mi famiri ben e tan na ini a foto Jyväskylä di de na mindrisei fu Fensikondre. Wi ben lobi go koiri na den boitipresi pe bigi busi nanga moi kriki de. Mi lobi meti tu. Di mi ben pikin mi ben wani brasa ala pusipusi nanga dagu. Di mi ben e kon moro owru, mi no ben lobi te sma ben e du ogri nanga meti. Bakaten mi bigin wroko makandra nanga organisâsi di e feti gi den reti fu meti. Drape mi miti sma di ben e denki leki mi.

Wi ben e du ala sortu sani fu tapu sma di e du ogri nanga meti èn wi ben e meki a libimakandra kon sabi san den sma dati ben e du. Boiti dati, wi ben e waka na strati na ini bigi grupu fu sori taki wi no feni en bun taki sma e seri metibuba èn taki sabiman e gebroiki meti te den e ondrosuku sani. Wi seti wan nyun organisâsi srefi di ben musu tapu sma fu du ogri nanga meti. Fu di wi ben e du son sani di no e kruderi nanga wèt, meki wi ben e kisi problema nanga lanti furu tron. Dati meki wan tu leisi skowtu hori mi èn mi ben musu go na fesi krutu.

Boiti taki mi ben e broko mi ede nanga den meti, mi ben broko mi ede tu nanga tra sani di ben e pasa na heri grontapu. Te fu kaba mi bigin wroko gi difrenti organisâsi soleki Amnesty International nanga Greenpeace. Mi ben e gebroiki ala mi ten fu horibaka gi den organisâsi disi. Mi ben e suku fu yepi pôti sma, den sma di no ben abi nofo nyanyan, nanga tra mofinawan.

Ma safrisafri mi kon frustan taki mi no man kenki grontapu, awinsi san mi du. Aladi den organisâsi dati ben man lusu wan tu pikin problema, toku den no ben man lusu den bigi problema èn a gersi leki sani ben e kon moro ogri srefi. Na soso ogri mi ben si na grontapu èn nowan sma ben e broko en ede nanga dati. Mi ben firi leki mi no man du noti.

Mi ben e sari taki mi no man du noti fu kenki grontapu. Dati meki mi bigin prakseri Gado nanga Bijbel. Fosi, mi ben e studeri Bijbel nanga Yehovah Kotoigi. Den Kotoigi ben abi switifasi èn den ben e poti prakseri na mi. Mi ben lobi a sani disi, ma toku mi no ben wani kenki mi libi na a ten dati. Ma now, sani ben de tra fasi.

Mi teki mi Bijbel, dan mi bigin leisi en. A gi mi furu trowstu. Mi feni furu tekst na ini Bijbel di e taki dati wi musu libi bun nanga meti. Odo 12:10 e taki dati „a reti-ati sma e sorgu bun gi en osometi”. Mi kon frustan taki a no Gado e meki taki problema de na grontapu. Na presi fu dati, den problema di wi abi kon moro bigi fu di furu sma no e du a wani fu Gado. A naki mi ati trutru di mi kon sabi taki Yehovah lobi wi èn taki a abi furu pasensi.—Psalm 103:8-14.

Na a ten dati mi feni wan pisi papira pe yu ben kan seni aksi a buku San Bijbel e leri wi trutru? Syatu baka dati wan Kotoigi trowpaar kon na mi oso èn den aksi mi efu mi wani studeri Bijbel. Mi agri fu du dati èn mi bigin go tu na den Kresten konmakandra na a Kownukondre zaal. Te fu kaba den sani di mi leri fu Bijbel bigin naki mi ati trutru.

Bijbel yepi mi fu tyari furu kenki kon na ini mi libi. Mi tapu fu smoko èn mi no ben e dringi furu sopi moro. Mi bigin weri krosi di fiti wan Kresten èn mi leri fu taki na wan switi fasi nanga trawan. Mi bigin denki tra fasi tu fu den tiriman (Romesma 13:1). Fosi, mi ben e libi wan yayolibi èn mi no ben e syen fu dati srefi. Ma now mi kon tapu nanga a libi dati.

San ben tranga gi mi trutru, na fu kenki a fasi fa mi ben e denki fu organisâsi di e pruberi fu meki sani go moro bun na ini a libimakandra. A teki langa fosi mi bigin denki tra fasi. Na ini a bigin mi ben feni taki efu mi ben o gowe libi den organisâsi disi, dan a ben o de leki mi drai baka gi den. Ma mi kon frustan taki na Gado Kownukondre wawan kan lusu ala den problema na grontapu. Mi bosroiti fu gebroiki ala mi krakti fu horibaka gi a Kownukondre dati èn fu yepi tra sma fu kon sabi en.—Mateyus 6:33.

Fu di mi ben de fayafaya fu tyari kenki kon na ini a libimakandra, meki mi ben feni taki tu sortu sma nomo de: bunwan nanga ogriwan. Ala ten mi ben de klariklari fu gens den sma di mi ben e si leki ogri sma. Ma tangi fu Bijbel, meki mi no abi bita-ati gi sma moro. Na presi fu dati mi e pruberi fu sori lobi gi ala sma soleki fa Krestes ben e du dati (Mateyus 5:44). Wan fu den fasi fa mi e pruberi fu sori lobi gi sma, na fu fruteri den a bun nyunsu fu Gado Kownukondre. Mi breiti fu si fa a moi wroko disi e yepi sma fu de koloku, fu libi bun nanga makandra, èn fu abi wan trutru howpu.

Fu di mi leri fu wakti Yehovah, mi no e broko mi ede tumusi moro. Mi de seiker taki wi Mekiman no o gi pasi taki libisma e pina fu têgo. A no o gi pasi tu taki libisma pori a moi grontapu fu wi. Na presi fu dati, a o meki en Kownukondre seti ala sani kon bun baka (Yesaya 11:1-9). Mi breiti srefisrefi taki mi sabi den sani disi èn taki mi kan yepi sma fu bribi den tu. Mi no feni moro taki mi musu kenki grontapu