Mi kweki na ini Warialda, wan pikin foto na ini New South Wales. Warialda na wan kontren pe furu sma ben e kweki skapu, kaw nanga asi èn ben e prani aleisi nanga tra sani fu nyan. A foto krin èn sma no e du furu ogri drape.

Fu di mi na a moro owruwan fu den tin pikin di mi papa nanga mama abi, meki mi ben bigin wroko di mi ben abi 13 yari fu yepi sorgu na osofamiri. Fu di mi no ben kisi furu skoroleri, meki mi ben wroko na wan presi pe sma e kweki meti. Di mi ben abi 15 yari, mi ben abi a wroko fu kweki asi.

A ben switi fu wroko na den presi pe sma e kweki meti, ma son leisi a ben muilek. Mi ben lobi a wroko èn sosrefi a birti pe wi ben tan. Mi ben gwenti sidon na wan pikin faya te neti èn luku a mun nanga den stari, aladi mi ben e smeri a busi te a winti ben e wai. Mi memre taki mi ben denki taki wan Sma ben musu fu meki ala den moi sani disi. Ma na a tra sei, den sani di mi ben miti na wrokope no ben bun gi mi. Nofo tron mi ben e yere sma e taki dotitaki, èn a no ben muilek fu feni sikaret. A no langa na baka, dan mi ben abi a gwenti fu smoko èn taki dotitaki.

Di mi ben abi 18 yari, mi froisi go na Sydney. Mi ben pruberi fu go na ini a legre, ma mi no ben man fu di mi no ben kisi nofo skoroleri. Mi ben kon feni wan wroko èn mi tan wán yari na ini Sydney. Na a ten dati mi miti Yehovah Kotoigi a fosi leisi. Di mi kisi a kari fu go na wan fu den konmakandra fu den, dan mi go èn mi si taki den ben e leri sma den tru tori fu Bijbel.

Syatu baka dati, mi teki a bosroiti fu go baka na busi. Mi doro na Goondiwindi, Queensland. Mi feni wan wroko, mi trow, ma te fu kaba mi bigin dringi sopi tu.

Mi nanga mi wefi ben abi tu pikin. Baka di den boi fu wi gebore, mi bigin aksi misrefi fa mi libi o waka. Mi ben memre den sani di mi ben yere na den konmakandra fu den Kotoigi na ini Sydney, èn mi bosroiti fu du wan sani nanga mi libi.

 Mi ben feni wan owru Waktitoren pe na adres fu a bijkantoro fu Yehovah Kotoigi na ini Australia skrifi. Mi skrifi den wan brifi pe mi ben aksi yepi. Dati meki wan Kotoigi di abi switifasi nanga lobi, ben kon fisiti mi. Syatu baka dati, a ben e studeri Bijbel nanga mi.

Di mi ben e studeri Bijbel, mi kon si taki mi ben musu kenki furu sani na ini mi libi. Wan Bijbeltekst di naki mi ati trutru, ben de 2 Korentesma 7:1. A vers dati e gi wi deki-ati fu „krin wisrefi fu ibri sani di kan doti wi skin”.

Mi ben teki a bosroiti fu no smoko moro èn fu no dringi tumusi furu sopi. A no ben makriki fu tapu nanga den sani disi, fu di den sani disi ben de wan gwenti fu mi langa ten kaba. Ma mi ben wani nomonomo fu libi na wan fasi di e prisiri Gado. A rai di ben yepi mi trutru de na ini Romesma 12:2: „No libi moro leki den sma fu a grontapu disi, ma kenki un denki, so taki unu kan kenki un libi.” Mi ben kon frustan taki efu mi wani tapu nanga den gwenti disi, dan mi ben abi fu kenki a fasi fa mi ben e denki èn mi ben musu si den gwenti di mi ben abi leki sani di no bun kwetikweti, soleki fa Gado e si den. Gado yepi mi fu no smoko moro èn fu no dringi tumusi furu sopi.

A sani di no ben makriki srefisrefi fu tapu nanga en, ben de den dotitaki fu mi. Mi ben sabi a rai di Bijbel e gi na ini Efeisesma 4:29: „No meki nowan pori taki komoto na un mofo.” Ma toku mi no ben man tapu wantewante fu no taki dotitaki moro. A ben de wan yepi gi mi di mi ben prakseri fu a sani di skrifi na ini Yesaya 40:26. A tekst dati e taki fu den stari na hemel: „Opo un ede èn luku go na loktu. Suma meki ala den sani dati? Na a sma di e tiri den leki wan legre. A sabi omeni de èn a e kari den na den nen srefi. Fu di a krakti fu en bigi srefisrefi èn fu di a abi furu makti, meki nowan fu den e mankeri.” Mi ben e prakseri taki efu Gado abi a makti fu meki ala den sani disi na hemel di mi lobi fu luku, dan a musu man gi mi a krakti fu kenki mi libi so taki a kan prisiri nanga mi. Fu di mi ben begi furu èn ben meki tranga muiti, meki safrisafri mi ben man dwengi misrefi fu no taki dotitaki moro.

Di mi ben abi a wroko fu kweki meti, mi no ben abi furu okasi fu taki nanga sma, fu di furu sma no ben de na a wrokope. Ma den leri di mi kisi na den konmakandra fu Yehovah Kotoigi yepi mi fu man taki nanga sma. Den sani di mi leri ben yepi mi furu, ma den yepi mi spesrutu fu fruteri tra sma a bun nyunsu fu Gado Kownukondre.​—Mateyus 6:9, 10; 24:14.

Na wan tu yari kaba mi e prisiri fu dini leki owruman na ini a gemeente. Mi e feni en wan bigi grani fu du san mi man fu yepi den brada nanga sisa na ini a gemeente.

Mi e taigi Yehovah tangi taki mi kisi leri fu en, aladi mi no ben kisi furu skoroleri (Yesaya 54:13). Mi e bribi trutru san skrifi na ini Odo 10:22: „A blesi fu Yehovah, na dati e meki sma kon gudu.”