Te yu e luku lontu, dan yu ai nanga yu frustan e wroko makandra so taki yu kan sabi san yu e si. Yu e si wan froktu krosibei èn yu e luku efu yu o nyan en. Yu e luku go na loktu èn yu e si taki alen no o fadon tide. Yu e si den wortu di yu e leisi now èn yu e prakseri san den wani taki. Fu taki en leti, kloru abi krakti na yu tapu. A sani dati tru?

A kloru fu a froktu di yu si e yepi yu fu kon sabi efu a lepi èn efu a sa switi fu nyan. A kloru fu a loktu èn fu den wolku e yepi yu fu kon sabi fa a weer de. Te yu e leisi den wortu fu na artikel disi, dan den kloru na tapu e meki en makriki gi yu fu leisi san skrifi. Iya, kande sondro fu yu sabi, kloru e yepi yu doronomo fu kon sabi san e pasa na yu lontu. Ma kloru abi krakti tu tapu a fasi fa yu e firi.

Te yu e waka na ini wan wenkri, dan yu e si ala sortu dosu, batra, nanga saka. A sani disi na fu hari yu prakseri. Kande yu no sabi, ma den sma di e seri sani sabi heri bun sortu kloru sma lobi, efu na mansma noso umasma, yonguwan noso owruwan. Sma di e seti oso, sma di e meki krosi, nanga sma di e meki skedrei, sabi tu taki kloru kan abi krakti tapu a firi fu sma.

Fu di ala sma abi den eigi kulturu nanga den eigi gwenti, meki den kan denki tra fasi fu kloru. Fu eksempre, gi son sma na ini Asia a kloru redi e tyari koloku kon èn te den e meki prisiri dan nofo tron na a kloru dati de fu si. Ma na son presi na ini Afrika, redi na wan kloru fu row. Ma awansi fa sma kweki, toku den alamala e firi a srefi te den e si spesrutu kloru. Meki wi go luku dri kloru èn sortu krakti den kan abi na yu tapu.

REDI na wan kloru di e hari sma prakseri wantewante. Nofo tron sma e gebroiki a kloru disi fu poti prakseri na a krakti di wan sani abi, na orloku, èn na ogri di kan miti sma. A kloru disi abi furu krakti na tapu den firi fu sma, a kan meki den ati naki moro tranga, èn a kan meki a brudu lon moro tranga tu.

Na ini Bijbel, a Hebrew wortu di vertaal nanga „redi” e komoto fu wan wortu di wani taki „brudu”. Bijbel e taki fu wan ogri-ati huru-uma di e rèi na tapu „wan redi ogri meti di ben lai nanga nen di ben e sori taki a e wisiwasi Gado”.—Openbaring 17:1-6.

GRUN e meki sma firi heri tra fasi leki redi, fu di a e meki sma ati kon tiri. Grun na wan kloru di e gi sma wan korostu firi èn nofo tron a abi fu du nanga wan situwâsi pe ala sani tiri. Wi e firi bun te wi e si grun dyari nanga bergi pe bon e gro na seisei. A buku Genesis di e fruteri fa Gado meki ala sani, e taki dati Gado meki grun grasi nanga bon gi libisma.—Genesis 1:11, 12, 30.

WETI na wan kloru di nofo tron abi fu du nanga leti, nanga a tan bun fu sma, èn nanga krinfasi. A abi fu du tu nanga fasi soleki bun-ati, krin-ati, nanga soifri fasi. Weti na a kloru di kari furu leisi na ini Bijbel. Bijbel e taki tu fu fisyun pe libisma nanga engel e weri weti krosi. A sani disi e poti prakseri na a retidu fu den èn a e sori tu  taki Gado feni den bun (Yohanes 20:12; Openbaring 3:4; 7:9, 13, 14). Bijbel e taki sosrefi fu man di e rèi na tapu weti asi èn di e weri fini linnen krosi di weti èn krin. A sani disi e prenki wan orloku fu retidu (Openbaring 19:14). Gado e gebroiki a kloru weti fu sori taki a de klariklari fu gi wi pardon fu den sondu fu wi: „Awinsi den sondu fu unu redi leki brudu, toku den o kon weti leki snew.”—Yesaya 1:18.

A fasi fa Bijbel e gebroiki kloru e sori taki Gado e frustan sortu krakti kloru abi na tapu libisma. Fu eksempre, a Bijbel buku Openbaring e taki fu den sani di e miti libisma nownowde. Dati na sani soleki orloku, angriten, noso a dede di sma e dede fu angri noso siki. Fu man yepi wi fu memre den sani disi, dan Bijbel e taki fu wan span fisyun fu man di e rèi na tapu asi. Den asi disi de heri tra fasi fu di den abi kloru di wani taki wan sani.

A fosi asi na wan krin weti asi di e prenki na orloku fu retidu di Krestes Yesus o feti. Baka dati, wi e si wan asi di abi wan faya redi kloru èn na asi disi e prenki den feti na mindri den pipel fu grontapu. Dan yu abi wan dungru blaka asi di e prenki angriten. Ne wi e si wan „asi di abi wan sikisma kloru. A sma di ben e sidon na en tapu, ben nen Dede” (Openbaring 6:1-8). A kloru fu ibriwan fu den asi kan meki wi frustan wantewante san den asi e prenki. A makriki gi wi fu memre den asi disi èn fu frustan san den e leri wi fu a ten disi.

Bijbel abi furu eksempre pe a kloru fu wan sani e meki sma frustan krin san na a sani dati. Iya, a Mekiman fu leti, kloru, nanga libisma ai e gebroiki kloru na wan koni fasi fu meki leisiman frustan krin san den sani di skrifi wani taki. Den kloru e yepi den tu fu memre den sani dati. Kloru e yepi wi fu kon sabi san na den sani di wi e si. Kloru abi krakti na tapu den firi fu wi. Kloru kan yepi wi fu memre prenspari sani. Kloru na wan kado di wi Mekiman gi wi fu di a lobi wi, èn fu di a wani taki wi nyan bun fu a libi.