Yehovah e warderi a muiti di den anbegiman fu en e du fu plisi en? Kande son sma ben o taki nôno, fu di den feni taki Gado no e broko en ede nanga wi. Ma a sani dati ben o sori taki den no sabi Gado kwetikweti. Bijbel, a Wortu fu en, e sori fa Gado de trutru. A e gi wi a dyaranti taki Yehovah e warderi a muiti di den reti-ati anbegiman fu en e du fu gi yesi na en. Luku san na apostel Paulus e taki na Hebrewsma 11:6.

San wan sma musu du fu man plisi Yehovah? „Sondro bribi wan sma no kan prisiri Gado,” na so Paulus e skrifi. Luku taki Paulus no e taki dati a muilek fu plisi Gado efu wi no abi bribi. Ma a e taki dati sondro bribi wan sma no man du dati. Sobun, wan sma musu abi bribi fu man plisi Gado.

Sortu bribi wi musu abi fu man plisi Yehovah? Tu sani prenspari. A fosi sani, na taki wi „musu bribi taki a de trutru”. Fa wi o man plisi Gado efu wi e tweifri taki a de trutru? Toku a no nofo fu bribi taki Gado de, bika srefi den ogri yeye e bribi taki Yehovah de (Yakobus 2:19). Te wi e bribi taki Gado de trutru, dan dati musu gi wi deki-ati fu libi na wan fasi di a feni bun.​—Yakobus 2:20, 26.

A di fu tu sani, na taki wi „musu bribi taki” Gado na a sma di „e pai” libisma. Wan sma di abi trutru bribi de seiker taki a muiti di a e du fu plisi Gado no sa de fu soso (1 Korentesma 15:58). Fa wi o man plisi Yehovah efu wi no e bribi taki a man pai wi èn taki a wani du dati tu? (Yakobus 1:17; 1 Petrus 5:7) Wan sma di e taki dati Gado no e broko en ede nanga wi, taki a no abi warderi, èn taki a no e blesi sma, no sabi a Gado fu Bijbel.

Sortu sma Yehovah e pai? „Den wan di e suku en fayafaya”, na so Paulus e taki. Wan buku di sma e gebroiki fu vertaal Bijbel, e taki dati a Griki wortu di vertaal leki ’suku fayafaya’ no wani taki dati wan sma e „gowe go suku” Gado, ma a wani taki dati a e meki muiti fu „anbegi” Gado. Wan tra buku e taki dati a Griki wortu disi e sori taki a sma e du dati fayafaya èn a no e meki noti puru en prakseri. Iya, Yehovah e pai den sma di e anbegi en fayafaya èn nanga den heri ati.​—Mateyus 22:37.

Fa Yehovah e pai den reti-ati anbegiman fu en? A pramisi taki a o pai den na wan tumusi moi fasi, iya, a o gi den têgo libi na ini Paradijs na grontapu. A sani disi e sori taki a wani blesi sma trutru èn taki a lobi den tu (Openbaring 21:3, 4). Nownow kaba den sma di e suku Yehovah fayafaya e kisi bigi blesi. A santa yeye fu en nanga den koni rai na ini en Wortu, e yepi den fu abi wan koloku libi.​—Psalm 144:15; Mateyus 5:3.

Iya, Yehovah na wan Gado di abi warderi. Te den anbegiman fu en e du muiti fu anbegi en nanga den heri ati, dan a abi warderi gi dati. Now di yu sabi dati, dan a no e gi yu deki-ati fu kon moro krosibei na en? Efu dati de so, dan fu san ede yu no e kon sabi moro bun fa yu kan kon abi a sortu bribi di Yehovah sa blesi bogobogo, èn fa yu kan sori a bribi dati?