„Kopro de fu feni na den bergi”
Wan grupu sabiman ben e ondrosuku den dipi presi nanga den bergi-olo na ini Yudea-sabana. Ne wan tu fu den doro na wan bergi-olo di ben de bun hei na a lanki fu wan bergi. Den ben o feni warti sani, kande owruten dokumenti soleki den Dede Se Lolo? Den no ben man bribi di den feni wan gudu di warti srefisrefi èn di sma kari bakaten a Nahal Mishmar gudu.
NA INI maart 1961, den feni a gudu dati di ben kibri dipi na ini a bergi-olo. Ala nanga ala den feni moro leki 400 sani, èn furu fu den ben meki fu kopro. Den ben feni difrenti sortu kownu-ati, kownu tiki, wrokosani, nanga tra fetisani. A sani disi prenspari gi sma di e leisi Bijbel te yu e luku taki Genesis 4:22 e taki dati Tubal-Kain, ben de wan „sma di ben sabi meki ala sortu wrokosani fu kopro nanga isri”.
Sma e aksi densrefi ete pe a gudu disi komoto èn sortu pipel ben abi en. Awansi fa a no fa, a gudu disi e sori taki sensi ten den pipel fu den kondre na ini Bijbel ben sabi diki kopro, den ben sabi fa fu smèlter en, èn fa fu meki sani fu kopro.
PRESI NA INI A PRAMISI KONDRE PE SMA BEN E FENI KOPRO
Di den Israelsma ben de fu go na ini a Pramisi Kondre, dan Moses taigi den: „Kopro de fu feni na den bergi [fu a kondre]” (Deuteronomium 8:7-9). Sabiman di e diki owruten sani puru na ini gron feni wan tu owruten presi na ini Israel nanga Yordan pe sma ben e diki èn ben e smèlter kopro. Wan tu fu den presi dati na Feinan, Timna, nanga Kirbat en-Nahas. San sma kon sabi fu den presi disi?
A kontren fu Feinan nanga Timna lai nanga peti pe sma ben e diki kopro puru sowan 2000 yari langa. Srefi na ini a ten disi, wan sma di e go drape kan feni pisipisi ston di abi grun flaka fu kopro na tapu. Na ini owruten den sma di ben e diki kopro ben e gebroiki wrokosani fu ston fu krabu a kopro puru di ben de fu si na tapusei fu den ston. Te den ben krabu ala a kopro dati puru, dan den ben e diki go moro dipi nanga isri wrokosani. Na so den ben e meki den bergi-olo moro bradi èn den ben e diki pasi go moro dipi na ini den. A Bijbel buku Yob e taki fu a wroko dati (Yob 28:2-11). A wroko disi ben de hebi wroko. Fu a di fu dri yarihondro te go miti a di fu feifi yarihondro, den Romesma ben e seni den moro kefalek ogriman nanga tra strafuman fu go wroko na ini den kopro mijn fu Feinan.
Bun bigi ipi ston nanga tokotoko de fu feni na Kirbat en-Nahas (san wani taki „Brokopresi fu Kopro”). A sani disi e sori taki sma ben e smèlter bun furu kopro drape. Sabiman e bribi taki sma ben e tyari ston di ben abi kopro na ini komoto fu mijn di ben de krosibei. Dati na mijn soleki Feinan nanga Timna. Fu man puru a kopro na ini ston, dan sma ben e gebroiki spesrutu wrokosani fu bro winti gi den faya di den ben meki fu krofaya. Den ben e bro winti sowan aiti te go miti tin yuru langa, teleki a faya ben e bron 1200 graden Celcius. Nofo tron sma ben e puru wán kilo kopro na ini feifi kilo ston, èn den ben e smèlter en fu meki difrenti sortu sani.
A FASI FA SMA BEN E GEBROIKI KOPRO NA INI OWRUTEN ISRAEL
Tapu Sinai-bergi, Yehovah ben taki krin taki a pipel ben musu gebroiki a moi kopro di den ben e diki puru na ini a gron fu meki a tabernakel. Bakaten a taigi den tu fu gebroiki en fu meki a tempel na ini Yerusalem na a srefi fasi dati (Eksodes, kapitel 27). A kan taki fosi den Israelsma ben go na Egepte, den ben sabi pikinso kaba fa fu meki sani fu isri, kopro, nanga gowtu, noso kande den ben leri a wroko dati di den ben de drape. Na a ten di den komoto na ini Egepte, den ben sabi kaba fa fu smèlter gowtu fu meki wan pikin mankaw. Boiti dati, den ben man meki bun furu kopro sani di ben de fanowdu gi a wroko na ini a tabernakel. Den ben meki sani soleki a bigi watrabeki, patu, pan, skopu, nanga forku.
Bakaten di den ben e waka pasa na ini a sabana, kande di den ben e waka pasa Punon (kande Feinan fu a ten disi), wan presi pe kopro ben lai, dan a pipel ben krutu fu a mana èn fu watra di ben mankeri. Gado seni ogri sneki fu beti den, èn furu sma dede. Baka di den Israelsma sori berow, dan Moses begi Yehovah gi den. Yehovah taigi en fu meki wan kopro sneki èn fu poti en na tapu wan postu. Bijbel e taki: „Te wan sneki ben beti wan sma èn a ben e luku a kopro sneki, dan a ben tan na libi.”
A KOPRO FU KOWNU SALOMO
Furu sani na ini a tempel na ini Yerusalem ben meki fu kopro
Kownu Salomo ben gebroiki bun furu kopro fu meki wrokosani gi a tempel na ini Yerusalem. Na en papa David ben kisi furu fu a kopro dati di a ben wini den feti nanga den Siriasma (1 Kroniki 18:6-8). A „kopro se”, a bigi watrabeki di den priester ben e gebroiki fu wasi den skin, ben man hori sowan 66.000 liter watra, èn a kan taki a ben wegi moro leki 30 ton (1 Kownu 7:23-26, 44-46). Tu bigi kopro pilari ben e tanapu tu na mofodoro fu a tempel. Den ben hei 8 meter èn wan pisi ben de na a ede fu den di ben hei 2.2 meter. Na inisei fu den ben leigi, den ben deki 7.5 centimeter èn den ben bradi sowan 1.7 meter (1 Kownu 7:15, 16; 2 Kroniki 4:17). Yu musu fu fruwondru te yu e prakseri o furu kopro den ben gebroiki fu meki soso den sani disi.
Na ini Bijbel ten, sma na ala sei ben gwenti gebroiki kopro na ini na aladei libi fu den. Fu eksempre, Bijbel e taki fu fetisani, fu bui, fu pokusani, nanga doro di ben meki fu kopro (1 Samuel 17:5, 6; 2 Kownu 25:7; 1 Kroniki 15:19; Psalm 107:16). Yesus ben taki fu „kopro” moni gi monisaka, èn na apostel Paulus ben taki fu „a koprosmeti Aleksander”.
Sabiman fu owruten sani nanga historia skrifiman e suku ete fu kon sabi pe sma ben e diki kopro na ini Bijbel ten èn pe a Nahal Mishmar gudu komoto. Ma san wi sabi, na taki soleki fa Bijbel e sori, a kondre di den Israelsma ben kisi, trutru ben de „wan bun kondre . . . èn kopro [ben] de fu feni na den bergi”.
