Na ini a Gran Kownukondre Rome, furu sma ben e tron strafu te srudati ben teki kontren abra, noso te sma ben teki trawan tyari gowe nanga tranga. Den ben e seri den sma disi èn noiti moro den sma disi ben e si den oso nanga den famiri.

Furu srafu ben e wroko te fu dede na ini den mijn, aladi den wrokoman di ben e wroko na den gron èn na ini oso ben abi en moro bun. Den ben kan dwengi wan srafu fu weri wan isri banti na en neki. Wan pisi plaat ben anga na a banti disi, pe ben skrifi taki sma ben o kisi pai efu den ben tyari a srafu disi kon baka gi en masra te a ben lowe. Den srafu di ben pruberi fu lowe wan tu leisi ben e kisi wan bronmarki na tapu den fesi-ede. Nofo tron dati ben de a marki F fu a wortu fugitivus (loweman).

A Bijbel buku Fileimon e taki dati na apostel Paulus ben seni a lowe srafu Oneisimus go baka na Fileimon, a masra fu en. Aladi Fileimon ben abi a reti fu gi Oneisimus hebi strafu, toku Paulus aksi en fu „gi en wan switikon”, fu di den na Kresten di lobi makandra èn fu di den na mati.—Fileimon 10, 11, 15-18.

Sma ben sabi Fenisia, di ben de na ini a kontren pe Libanon de now, leki a kondre fu a paars ferfi fu Tirus. Kownu Salomo fu owruten Israel ben moi a tempel fu en nanga skapu-wiwiri di ferfi kon paars èn di wan koni wrokoman fu Tirus ben meki.—2 Kroniki 2:13, 14.

A paars ferfi fu Tirus ben de a moro diri ferfi fu a ten dati, èn dati ben kon fu di a ben lai wroko fu meki a ferfi dati. Fisiman ben e fanga bun furu fu a paars pakro * na ini se. Sowan 12.000 fu den pakro disi ben de fanowdu fu meki ferfi gi wan-enkri krosi. Baka dati, den ben e puru den pakro disi na ini den skropu fu man puru a saka di abi a paars kloru na ini. Den sma di ben e meki ferfi ben e moksi a kloru disi nanga sowtu èn den ben e poti en na ini a son dri dei langa. Baka dati den ben e tapu en na ini wan bari, dan den ben e bori en wan tu dei na ini se watra, na tapu wan lagi faya.

Aladi den Fenisiasma du bisnis nanga furu kondre èn aladi furu sma fu a pipel dati go libi na tra kondre, toku hondrohondro yari langa den tan a wan-enkri pipel di ben man meki a diri ferfi fu Tirus. Na ini a kontren fu a Mindrikondre Se go te na a westsei, na Cádiz, Spanyorokondre, sma feni owruten sani di a pipel disi ben e gebroiki fu meki ferfi.