Organisâsi e denki taki efu sani e tan go so doro, dan na a ten fu 2030, moro leki 8.000.000 sma o dede ibri yari fu di den e smoko. Den organisâsi disi e taki tu dati na a kaba fu a di fu 21 yarihondro, 1.000.000.000 sma o lasi den libi fu di den e smoko.

A no soso den sma di e smoko e ondrofeni takru bakapisi fu a gwenti disi. Famiriman di e tan na baka e sari èn den abi moni problema. Boiti dati, 600.000 sma di no e smoko e dede ibri yari fu di sma e smoko krosibei fu den. Te fu kaba a sani disi e tron wan hebi gi ala sma fu di datrayepi e kon moro diri.

Tra fasi leki siki di e panya esi-esi èn di e dwengi datra fu feni wan dresi, wan lusu de gi a smoko problema, èn furu sma sabi san na a lusu dati. Datra Margaret Chan, edeman fu na organisâsi fu gosontu afersi na heri grontapu, ben taki: „Na libisma srefi de frantwortu gi a smoko problema, èn lanti nanga a libimakandra kan lusu a problema disi efu den e wroko makandra.”

Noiti ete so furu kondre meki muiti fu lusu a problema disi. Sensi augustus 2012, sowan 175 kondre bosroiti fu du wan sani na a tabaka problema. * Ma wan tu prenspari sani de di e meki taki moro nanga moro sma e smoko. Ibri yari a tabaka bisnis e gebroiki milyardmilyard dala fu meki reklame di musu hari spesrutu umasma nanga yongusma na ini pôti kondre. Fu di a muilek gi sma fu tapu nanga smoko, meki wi kan fruwakti taki furu fu den wán milyard sma di no man tapu nanga smoko, o lasi den libi. Efu den sma di e smoko now no e tapu nanga a gwenti disi, dan bun furu fu den o dede na ini den fotenti yari di e kon.

Fu di so furu reklame e meki èn fu di a no makriki fu tapu nanga smoko, meki furu sma no man tapu nanga a gwenti disi, aladi den wani dati. Na dati ben pasa nanga Naoko. A bigin smoko di a ben de wan tini. A ben du san a ben si na ini den reklame èn a ben e firi leki wan bigisma. A ben si taki en papa nanga mama dede fu longkanker, ma toku a tan smoko, aladi a ben abi tu yongu umapikin. A e taki: „Mi ben e frede taki mi ben o kisi longkanker èn mi ben e broko mi ede nanga a gosontu fu mi pikin, ma toku mi no ben man tapu nanga smoko. Mi ben denki taki noiti mi ben o man tapu nanga smoko.”

Toku Naoko tapu nanga smoko. A sani di gi en a krakti fu du dati, na a srefi sani di yepi milyunmilyun tra sma fu no smoko tabaka moro. San na a sani dati? Grantangi leisi go doro.