Den man fu owruten di skrifi Bijbel, ben si taki libisma e libi syatu te yu e teki den gersi nanga grontapu di e tan fu ala ten. Iya, dusundusun yari langa, libisma e dede èn trawan e kon, ma teleki now, a planeiti Grontapu na a moro bun presi pe sani man tan na libi.

Sma e taki dati sensi a Di Fu Tu Grontapufeti, bigi kenki kon na grontapu. Na ini sowan 70 yari nomo, sabiman go na fesi fu di den meki kefalek sani soleki oto, telefon, computer nanga tra sortu sani èn den sani disi meki taki na ekonomia go na fesi srefisrefi. Furu sma abi wan gudu libi, wan sani di sma ben denki taki no kan. Na a srefi ten, pikinmoro dri tron so furu sma kon de na grontapu.

Ma ala den sani disi ben abi den bakapisi. Soleki fa sma e taki, dan den sani di libisma e du e pori grontapu so te, taki heri esi den no o man libi moro na tapu. Fu taki en leti, son sabiman e taki dati wi e libi na ini wan ten pe libisma e pori grontapu.

Bijbel e taki dati wan ten ben o kon pe libisma ben o „pori grontapu” (Openbaring 11:18). Son sma e aksi densrefi efu wi e libi na ini a ten dati. Fa libisma o pori grontapu moro fara? Den o pori  en krinkrin? Iya, libisma o pori grontapu so te taki noiti moro a o kon bun baka?

Grontapu o pori krinkrin? Son sabiman feni taki a muilek fu sabi na fesi san o pasa nanga grontapu. Dati meki den e broko den ede taki wi e doro wan ten pe a weer o kenki wantronso, èn taki bigi rampu o pasa leki bakapisi fu dati.

Fu eksempre, luku den bigi kontren nanga ijs na a West-sei fu Antartica. Son sma e bribi taki efu a grontapu e kon faya moro nanga moro, dan te fu kaba na ijs na den kontren dati o smèlter. Na ijs disi e tapu pasi gi a faya fu a son fu no doro a watra na ondrosei. Efu a faya fu a son ben o doro a watra fu a se, dan a watra ben o kon moro faya, èn a sani dati ben o meki na ijs smèlter moro esi. A sani disi kan tyari bigi rampu kon di nowan sma man tapu. Te na ijs e smèlter, dan a watra na ini a se o kon moro hei èn disi kan meki taki hondrohondro milyun sma lasi den libi.

Libisma du difrenti sani fu tapu a pori di sma e pori grontapu now. Wan sani di den pruberi bun langa kaba, na taki den e suku fu meki na ekonomia nanga a libimakandra go na fesi, sondro fu du sani di e pori grontapu. San na a bakapisi?

A sari fu si taki a grontapu e pori moro nanga moro. Libisma e tan gebroiki den gudu fu grontapu moro esi leki fa grontapu man meki den baka. Wan sani de di libisma man du? Wan sabiman ben taki krin: „Fu taki en leti, wi no sabi srefisrefi fa fu sorgu bun gi a planeiti fu wi.” A situwâsi disi e kruderi nanga san Bijbel e taki: „A no de na wan libisma di e waka fu taki srefi pe a o poti en futu.”—Yeremia 10:23.

Ma Bijbel e gi wi a dyaranti taki Gado, a Mekiman, no o gi pasi taki libisma pori grontapu krinkrin. Psalm 115:16 e taki: „Grontapu [Gado] gi na libisma.” Iya, wi planeiti na wan „bun presenti” fu wi hemel Tata (Yakobus 1:17). Yu denki taki a presenti disi di Gado gi wi ben o tan bun  fu wan pisi ten nomo? Kwetikweti! Wi kan si dati te wi e luku a fasi fa wi planeiti meki.

A Bijbel buku Genesis e fruteri finifini fa Gado teki en ten fu meki grontapu. Soleki fa Bijbel e taki, dan biginbigin, grontapu ben ’leigi èn nowan sani ben de na en tapu. Dungru ben tapu den bigi watra’. Sobun, Bijbel e taki krin fu „den watra” di ben de na grontapu èn di prenspari srefisrefi fu hori sani na libi (Genesis 1:2). Ne Gado taki: „Meki leti kon de” (Genesis 1:3). Soleki fa a sori, dan a leti fu a son ben doro grontapu, so taki leti ben de fu si fu a fosi leisi. Dan Bijbel e taki fu a drei gron nanga den se (Genesis 1:9, 10). Baka dati, „grasi bigin gro na grontapu èn ala sortu sani di e gi siri bigin gro tu, sosrefi bon di e gi froktu” (Genesis 1:12). Den sani disi ben musu pasa fu man sorgu taki libi de. Wan fu den sani dati na a fasi fa prani e meki zuurstof nanga yepi fu a son. Fu san ede so furu sani ben musu seti na fesi?

Na owruten profeiti Yesaya ben taki dati Gado, na „a Mekiman fu grontapu, a sma di seti en leki fa a de èn a sma di poti en steifi na en presi. A no meki en fu soso, ma a seti en fu sma libi na tapu” (Yesaya 45:18). A de krin taki Gado wani taki libisma tan fu ala ten na grontapu.

A sari fu taki dati pikinmoro libisma pori a moi presi disi di Gado gi wi. Ma a sani di a Mekiman ben abi na prakseri fu du no kenki. Wan man fu owruten ben taki: „Gado a no wan libisma taki a o fruteri lei, a no wan manpikin fu libisma taki a sa du wan sani di o hati en bakaten. Te a taki wan sani, a o du en trutru, a no so?” (Numeri 23:19) Gado no o gi pasi taki libisma pori grontapu, ma heri esi Gado o „pori den wan di e pori grontapu”.—Openbaring 11:18.

Di Yesus Krestes ben hori a prenspari preiki fu en na tapu na Olèif-bergi, dan a ben taki: „Koloku fu den safri-ati sma, bika den o kisi grontapu” (Mateyus 5:5). Bakaten a ben taki na ini a srefi preiki dati fa Gado ben o sorgu taki grontapu no kisi pori krinkrin. A ben taigi den bakaman fu en  fu begi: „Meki yu Kownukondre kon. Meki yu wani pasa na grontapu soleki fa a e pasa na hemel.” Iya, Gado Kownukondre, noso a tirimakti fu en, o du san Gado abi na prakseri gi grontapu.—Mateyus 6:10.

Gado e taki sortu moi kenki a Kownukondre o tyari kon: „Luku, mi e meki ala sani kon nyun” (Openbaring 21:5). A sani disi wani taki dati Gado o meki wan nyun grontapu kon na ini a presi fu a wan disi? Nôno, fu di noti no fowtu na a planeiti fu wi. Na presi fu dati, Gado o pori ala „den wan di e pori grontapu”. Dati na den sani di libisma seti, nanga den tirimakti fu den. „Wan nyun hemel nanga wan nyun grontapu” o kon na ini a presi fu den sani dati. Wan nyun tirimakti na hemel, noso Gado Kownukondre, o tiri wan grontapu pe sma e du a wani fu Gado.—Openbaring 21:1.

Gado o seti grontapu kon bun baka, so taki libisma o man tan libi na en tapu. A psalm skrifiman ben skrifi san Gado o du: „Yu poti prakseri na grontapu èn yu e blesi en. Yu meki grontapu kon gudu.” Na a ten dati, a weer no o faya noso kowru tumusi èn fu di Gado o blesi grontapu, meki a o tron wan paradijs pe bun furu nyanyan sa de.—Psalm 65:9-13.

Soleki fa Pyarelal di ben de sekretarsi fu Mohandas Gandhi ben sori, dan Gandhi ben taki: „Grontapu abi nofo gi ala sma, ma a no abi nofo gi gridi sma.” Gado Kownukondre o tyari wan kenki kon na ini sma ati, èn na so a o puru a rutu fu ala den problema na grontapu. A profeiti Yesaya ben taki dati te a Kownukondre o tiri, dan sma „no o du nowan ogri èn den no o pori nowan sani” (Yesaya 11:9). Fu taki en leti, milyunmilyun sma fu ala kulturu nanga presi e leri sabi san Gado e aksi fu den. Den e leri fu lobi Gado nanga tra sma, fu de nanga tangi, fu sorgu gi a tanpe fu den, fu no pori den gudu fu grontapu, èn fu libi soleki fa a Mekiman ben abi na prakseri gi libisma nanga grontapu. Den e sreka densrefi fu libi na ini a paradijs na grontapu.—Preikiman 12:13; Mateyus 22:37-39; Kolosesma 3:15.

A tori na ini Genesis di e taki fa Gado meki sani, e tapu nanga den wortu disi: „Gado si taki ala den sani di a meki, ben de heri bun” (Genesis 1:31). A no de fu taki dati Gado no o gi pasi taki libisma pori a moi grontapu disi krinkrin. A de wan trowstu gi wi fu sabi taki a planeiti fu wi de na ini na anu fu wi lobi Mekiman, Yehovah Gado. A e pramisi: „Na den reti-ati sma o kisi grontapu èn fu têgo den o tan libi drape” (Psalm 37:29). Meki a de so taki yu na wan fu „den reti-ati sma”, di o kari grontapu den têgo tanpe.