Milyunmilyun sma na heri grontapu e poti den howpu tapu Gado Kownukondre. Den e teki na eksempre fu Yesus di ben leri den bakaman fu en fu begi: „Meki yu Kownukondre kon. Meki yu wani pasa na grontapu.”—Mateyus 6:10.

Ma aladi furu sma wani kon sabi moro fu Gado Kownukondre, toku furu kerki no e poti prakseri na a tori dati. Fu dati ede a historia skrifiman H. G. Wells e fruwondru taki aladi Yesus ben „si en leki wan tumusi prenspari sani . . . fu gi sma leri fu a Kownukondre fu Hemel”, toku „bun furu Kresten kerki no feni en prenspari srefisrefi” fu gi sma leri fu a tori disi.

Yehovah Kotoigi de heri tra fasi, fu di den e poti furu prakseri na Gado Kownukondre. Luku a tori disi: A moro prenspari tijdschrift fu wi, a wan di yu e leisi now, de fu feni na ini moro leki 220 tongo. Moro leki 46 milyun fu a tijdschrift disi e meki, èn a prati moro leki iniwan tra tijdschrift na heri grontapu. San na a moro prenspari boskopu fu a tijdschrift disi? Luku a nen fu en: A Waktitoren A e taki fu Yehovah Kownukondre.  *

Fu san ede Yehovah Kotoigi e du so furu muiti fu fruteri sma fu Gado Kownukondre? We, na fu di wi e bribi taki Gado Kownukondre na a moro prenspari boskopu fu a moro bun buku na grontapu, a Bijbel. Boiti dati, wi e bribi taki na Gado Kownukondre wawan o lusu ala den problema di libisma abi na ini a ten disi.

Yehovah Kotoigi e meki muiti fu fruteri sma fu Gado Kownukondre, neleki fa Yesus ben du dati. Di Yesus ben de na grontapu, Gado Kownukondre ben de a moro prenspari sani na ini en libi èn a ben e preiki furu fu en (Lukas 4:43). Fu san ede Gado Kownukondre ben prenspari so gi Yesus? San a kan du gi yu? Meki wi go luku den tra artikel fu si fa Bijbel e piki den aksi disi.