Di mi ben de wan pikin boi, mi famiri ben e tan krosibei fu Leipzig, na Owstu Doisrikondre, no so fara fu Tyekia nanga Polen. Di mi ben abi siksi yari, dan a wroko fu mi papa meki taki wi froisi go na wan tra kondre. Wi froisi go fosi na Brasyonkondre, èn baka dati na Ekwador.

Di mi ben abi 14 yari, dan den seni mi go na wan skoro na ini Doisrikondre. Fu di mi papa nanga mama ben de te na ini Zuid-Amerika, meki mi ben musu sorgu gi misrefi. Mi bigin libi leki fa misrefi wani, èn mi no ben e prakseri srefi san trawan ben o denki fu mi.

Di mi ben abi 17 yari, dan mi papa nanga mama drai kon baka na Doisrikondre. Na a bigin mi ben e tan nanga den. Ma fu di mi ben gwenti du san mi wani, meki mi no ben man libi moro nanga mi famiri. Di mi ben abi 18 yari, mi gowe libi oso.

Fu di mi ben wani du wan bun sani nanga mi libi, meki mi bigin libi na ala sortu fasi èn mi bigin moksi nanga ala sortu grupu. Mi kon si taki a moro bun sani di mi ben kan du nanga mi libi, na fu ondrosuku a moi grontapu disi fosi libisma pori en krinkrin.

Mi gowe libi Doisrikondre, ne mi bai wan motro èn mi hari go na Afrika. Ma syatu baka dati, mi ben musu drai go baka na Europa fu meki wan tu sani na a motro fu mi. Fosi yu denki, mi feni misrefi na sekanti na ini Potogisikondre. Ne mi bosroiti fu libi a motro, èn fu bigin teki waka nanga boto.

Mi go moksi nanga wan grupu yongu sma di ben e seti sani fu teki boto abra na Atlantis Se. Na ini a grupu dati mi leri sabi Laurie, di ben o tron mi frow bakaten. Wi go fosi na den Karibis-èilanti. Wi tan wan tu dei na ini Porto Riko, ne wi drai go baka na Europa. Wi ben wani feni wan boto di wi ben kan meki kon tron wan boto pe wi ben kan libi na ini. Ma baka di wi suku dri mun nomo, wan sani pasa di wi no ben fruwakti. A legre fu Doisrikondre seni kari mi.

Mi go wroko tapu se gi a Doisri legre. Na a ten dati, mi  nanga Laurie trow, èn wi ben e sreka sani fu go koiri na tra kondre, soleki fa wi ben gwenti. Syatu fosi mi go na ini a legre, wi ben bai wan boto. Di mi ben de na ini a legre, dan safrisafri wi meki a boto disi kon tron wan pikin seiri boto. Wi ben abi na prakseri fu libi na ini èn fu tan ondrosuku a moi grontapu disi. Te fu kaba, mi komoto na ini a legre, ma mi no ben kaba ete nanga a boto di Yehovah Kotoigi kon na wi èn wi bigin studeri Bijbel.

Na a bigin, mi no ben feni en fanowdu fu kenki mi libi. Mi ben trow nanga na uma fu mi èn mi no ben e smoko moro (Efeisesma 5:5). Boiti dati, mi ben denki taki te wi ben e gebroiki wi libi fu go na ala sei fu grontapu fu ondrosuku den moi sani di Gado meki, dan wi ben e du bun.

Ma fu taki en leti, a ben de fanowdu taki mi kenki wan tu sani, spesrutu den fasi fu mi. Fu di mi ben abi bigifasi, èn fu di mi ben e du san misrefi wani, meki mi ben e libi leki mi no abi nowan sma fanowdu. Mi ben e libi soso gi misrefi.

Wan dei, mi leisi a pisi na ini Bijbel pe Yesus ben e taki nanga sma na tapu Olèif-bergi (Mateyus, kapitel 5-7). Yesus ben e taki fu den wan di de koloku, ma na a bigin, mi no ben e frustan san a ben wani taki nanga a sani dati. Fu eksempre, a ben taki dati sma di de nanga angri, de koloku (Mateyus 5:6). Mi ben e aksi misrefi fa wan sma kan de koloku te a de na nowtu. Di mi studeri go doro, mi kon si taki wi alamala abi wan nowtu. Wi alamala abi Gado fanowdu. Mi kon si tu taki wi musu frustan fosi taki wi abi a nowtu disi, fu man tapu a nowtu disi. Dati meki Yesus ben taki: „Koloku fu den sma di sabi taki den abi Gado fanowdu.”—Mateyus 5:3.

Baka di wi bigin studeri Bijbel na ini Doisrikondre, dan mi nanga Laurie froisi go na Fransikondre, èn baka dati na Italiakondre. Iniwan presi pe wi ben e go, wi ben e miti Yehovah Kotoigi. A ben naki mi ati fu si fa den ben e sori lobi gi makandra èn fa den ben e libi na ini wánfasi. Mi kon si taki ala den Kotoigi na heri grontapu de leki brada nanga sisa (Yohanes 13:34, 35). Baka wan pisi ten, mi nanga Laurie teki dopu tron Yehovah Kotoigi.

Baka di wi teki dopu, mi tan meki muiti fu kenki den fasi fu mi. Mi nanga Laurie ben bosroiti fu teki boto seiri pasa Afrika èn fu abra na Atlantis Se go na Amerkankondre. Na drape na tapu a bigi se, pe un tu wawan ben de na ini a pikin boto fu wi, mi kon frustan fa a Mekiman bigi èn fa a makti. Mi no ben prenspari srefisrefi. Fu di mi no ben abi furu fu du di mi ben de na se, meki mi teki mi ten fu leisi Bijbel. Mi ben lobi den tori di ben e taki fu Yesus en libi na grontapu. A no ben abi sondu èn a ben man du iniwan sani di a wani, ma toku noiti a ben e meki bigi. A no ben e libi gi ensrefi, ma a ben e libi gi en Papa na hemel.

Di mi ben e denki dipi fu na eksempre fu Yesus, mi kon si taki mi ben musu poti Gado Kownukondre na a fosi presi na ini mi libi. Den difrenti sani di mi ben wani du no ben mag de den moro prenspari sani na ini mi libi (Mateyus 6:33). Di mi nanga Laurie doro na ini Amerkankondre te fu kaba, dan wi bosroiti fu tan drape èn fu poti ala wi prakseri na a anbegi fu wi.

Fosi, di mi ben e frutrow tapu misrefi, mi no ben de seiker fu den bosroiti di mi ben teki. Ma now, a sma di abi trutru koni e tiri mi libi (Yesaya 48:17, 18). Now fosi mi e du wan bun sani nanga mi libi. Iya, mi e anbegi Gado èn mi e yepi trawan fu kon sabi en.

Fu di mi nanga Laurie e hori wisrefi na den leri fu Bijbel, meki wi kon abi wan moro bun trowlibi. Gado blesi wi tu nanga wan moi umapikin, di leri sabi Yehovah èn di kon abi lobi gi en.

Ma a no ala ten sani ben e waka bun gi wi. Ma nanga a wani fu Yehovah, wi o tan dini en èn noiti wi o lasi frutrow na en tapu.—Odo 3:5, 6.