Prakseri sortu wini libisma ben o kisi efu wán tirimakti nomo ben o tiri heri grontapu. Na ini a ten disi, furu sma e pina fu di den pôti srefisrefi aladi tra sma abi furu gudu. Ma wan tirimakti di e frustan san sma na heri grontapu abi fanowdu, kan sorgu taki ala libisma kisi den sani dati. Yu denki taki libisma o man seti so wan tirimakti?—Leisi Yeremia 10:23.

Na ini den hondrohondro yari di pasa, tirimakti no ben man sorgu srefisrefi gi den borgu fu den, spesrutu gi den pôtiwan. Son tirimakti ogri srefisrefi (Preikiman 4:1; 8:9). Ma na Almakti Gado pramisi taki a o seti wan tirimakti di o kon na ini a presi fu ala trawan. A Tiriman fu a tirimakti dati o sorgu bun gi libisma.—Leisi Yesaya 11:4; Danièl 2:44.

Yehovah Gado teki a moro bun Tiriman gi heri grontapu, èn dati na en Manpikin Yesus (Lukas 1:31-33). Di Yesus ben de na grontapu leki libisma, dan a ben e suku fu yepi sma. Leki Kownu a o tyari sma fu ala kondre kon na wan èn a o tyari wan kaba kon na iniwan pina.—Leisi Psalm 72:8, 12-14.

Na ala sma o teki Yesus leki Tiriman? Nôno. Ma Yehovah abi pasensi (2 Petrus 3:9). A e gi sma na okasi fu teki Yesus leki Tiriman. Heri esi Yesus o puru ogrisma na grontapu èn a o sorgu taki freide de èn taki sani e waka bun na heri grontapu.—Leisi Mika 4:3, 4.