Mi gro kon bigi na ini wan pôti birti, na ini a foto Montreal. Di mi ben abi siksi mun, mi papa kon dede, èn mi mama wawan ben musu sorgu a heri osofamiri. Mi na a moro yonguwan fu aiti pikin.

Di mi ben e gro kon bigi, mi bigin gebroiki drugs, mi bigin dòbel, mi bigin du wan lo ogri, èn mi ben e moksi nanga ogriman. Di mi ben abi tin yari, mi bigin du boskopu gi huru-uma èn gi man di ben e leni sma moni nanga furu rente. Mi ben gwenti lei èn mi ben lobi bedrigi sma na ala sortu fasi. Na a libi dati mi ben abi.

Di mi ben abi 14 yari, mi ben sabi ala sortu fasi fa fu bedrigi sma. Fu eksempre, mi ben e bai wan lo oloisi, braselet, nanga linga di ben abi wan gowtu kloru, dan mi ben e poti wan marki gi den taki na 14-karaat gowtu. Baka dati mi ben e seri den na strati èn na fesi wenkri. Mi ben sabi fa fu meki moni esi-esi. Wan leisi mi meki 10.000 Kanada dala na ini wan dei!

Di mi ben abi 15 yari, den puru mi fu a skoro pe mi ben e go. A ben de wan skoro pe den ben e yepi ogri pikin. Mi bigin sribi na strati, na presi pe sma e go koiri, èn son leisi na oso fu mati.

Fu di mi ben e bedrigi furu sma, meki skowtu ben gwenti kisi mi. Ma noiti den sroto mi, fu di mi no ben e seri fufuru sani. Ma mi pai butu omeni leisi fu di mi no ben abi primisi fu seri sani èn fu di mi no ben e seri bun sani gi sma. Mi no ben e frede nowan sma, èn dati meki den man di ben e leni sma moni ben e seni mi fu go teki den moni gi den. A wroko disi ben kan meki taki mi lasi mi libi èn son leisi mi ben e tyari wan gon. Son leisi mi ben e wroko nanga ogriman srefi.

A fosi leisi di mi miti nanga Yehovah Kotoigi, na di mi ben abi 17 yari. Mi ben e libi nanga mi vriendin di a bigin studeri Bijbel nanga Yehovah  Kotoigi. Ma fu di mi ben feni taki Bijbel strak tumusi, meki mi gowe libi en èn mi go tan nanga wan tra frow di mi ben e hori nanga en.

Ma mi bigin si sani tra fasi di a tra vriendin fu mi bigin studeri tu nanga Yehovah Kotoigi. A bigin tyari kenki kon na ini en libi, èn mi ben lobi fa a ben kon abi moro pasensi èn fa a ben e sori switifasi. Di mi kisi wan kari fu go na wan konmakandra na a Kownukondre zaal fu Yehovah Kotoigi, dan mi go. Den sma kon taki mi odi èn den sori switifasi gi mi. Mi no ben gwenti a sani disi! Noiti mi ben firi taki mi famiri lobi mi. Di mi ben e gro kon bigi mi no kisi lobi. A lobi di den Kotoigi sori gi mi na wan sani di mi ben e suku mi heri libi langa. Di den Kotoigi aksi mi fu studeri Bijbel, dan nanga prisiri mi bigin du dati.

Te yu luku en bun, dan na den sani di mi leri fu Bijbel kibri mi libi. Mi nanga tu mati fu mi ben meki mofo fu go fufuru na wan presi, so taki mi ben kan pai den paiman di mi ben abi fu di mi ben e dòbel. Den paiman fu mi ben pasa 50.000 Kanada dala. Mi breiti taki mi no go moro, ma toku den mati fu mi go! Skowtu kisi wan fu den, èn den kiri a trawan.

Mi go doro nanga a Bijbelstudie, èn mi kon si taki mi ben musu tyari furu kenki kon. Mi kon sabi san Bijbel e taki na 1 Korentesma 6:10: „Fufuruman, gridiman, drunguman, sma di e kosi trawan, nanga sma di e puru sani na tra sma anu nanga tranga no o kisi a Kownukondre fu Gado.” Di mi leisi a tekst dati, mi bigin krei fu di mi si taki mi no ben e libi bun srefisrefi. Mi kon frustan taki mi ben musu kenki a heri fasi fa mi e libi (Romesma 12:2). Mi ben ogri kefalek èn mi ben lobi feti. Mi heri libi mi ben bedrigi sma.

Ma mi leri tu taki Yehovah abi sari-ati èn taki a e gi sma pardon (Yesaya 1:18). Mi begi Yehovah fayafaya fu yepi mi fu kenki mi libi. Nanga a yepi fu en, mi bigin kenki den fasi fu mi. Wan prenspari sani di mi du, na taki mi nanga mi vriendin trow.

Mi ben abi 24 yari di mi trow, èn mi ben abi dri pikin. Now mi ben musu suku wan bun wroko. Mi no kisi furu skoro, èn noiti mi ben wroko na wan presi. Mi begi Yehovah fayafaya baka fu yepi mi. Ne mi go suku wan wroko. Mi taigi den wrokobasi taki mi ben wani kenki mi libi èn taki mi ben wani wroko tranga gi mi moni. Son leisi, mi ben e fruteri den taki mi e studeri Bijbel èn taki mi ben wani tron wan moro bun sma. Toku furu fu den wrokobasi no ben wani teki mi na wroko. Ma wan leisi di mi go suku wroko baka, mi fruteri o muilek a libi fu mi ben de fosi, ne a man di ben e taki nanga mi taigi mi: „Mi no sabi fu san ede, ma wan sani e taigi mi taki mi musu teki yu na wroko.” Mi ben sabi taki na Yehovah piki den begi fu mi. Te fu kaba, mi nanga mi frow dopu leki Yehovah Kotoigi.

Mi de na libi tide, fu di mi e du san Bijbel e leri wi leki Kresten. Mi abi wan koloku osofamiri, èn mi abi wan krin konsensi fu di mi e bribi taki Yehovah gi mi pardon.

Sowan 14 yari kaba, mi e preiki 70 yuru ibri mun. Mi e yepi sma fu kon sabi san Bijbel e leri èn no so langa pasa mi frow bigin du a srefi sani makandra nanga mi. Na ini den 30 yari di pasa, mi yepi 22 sma na mi wrokope fu bigin dini Yehovah, èn a sani disi gi mi furu prisiri. Mi e tanapu na fesi wenkri ete, ma a no fu bedrigi sma leki fa mi ben e du fosi. Now te mi go drape mi e fruteri sma den sani di mi e bribi. Mi wani gi sma a howpu fu libi na ini wan nyun grontapu pe nowan bedrigiman o de.—Psalm 37:10, 11.