Wan osofamiri pe papa nanga mama lobi èn e lespeki makandra, na wan bun presi gi pikin fu gro kon bigi (Kolosesma 3:14, 19). Bun papa nanga mama lobi den pikin èn den e prèise den, neleki fa Yehovah Gado ben prèise en Manpikin.—Leisi Mateyus 3:17.

Wi Tata na hemel e arki den sma di e anbegi en, èn a e poti prakseri na a fasi fa den e firi. A bun te papa nanga mama e teki leri fu en, èn e arki san den pikin fu den abi fu taki (Yakobus 1:19). Den musu gi den pikin fu den okasi fu taki fa den e firi, awinsi den pikin e taki sani di kan meki den mandi.—Leisi Numeri 11:11, 15.

Leki papa noso mama, yu abi a reti fu poti wet gi yu pikin (Efeisesma 6:1). Luku fa Gado e du dati. Fu di a lobi den pikin fu en meki a poti krin wet gi den èn a sori den san o pasa te den trangayesi den wet fu en (Genesis 3:3). Ma a no e dwengi sma fu gi yesi na en, na presi fu dati a e leri den sortu wini den o kisi te den e du san reti.—Leisi Yesaya 48:18, 19.

Du muiti fu yepi yu pikin fu kon lobi Gado. Te yu e du dati, dan den o waka nanga koni, awinsi den no de nanga yu. Neleki fa Gado de wan bun eksempre gi wi, na so yu kan leri yu pikin fu kon lobi Gado te yu e gi den wan bun eksempre.—Leisi Deuteronomium 6:5-7; Efeisesma 4:32; 5:1.