Bijbel e taki dati Yob ben de „wan bun man di lobi retidu” (Yob 1:1). Bijbel e kari Lot wan „reti-ati man” (2 Petrus 2:8). David ben de wan man ’di du ala san Gado feni bun’ (1 Kownu 14:8). Ma meki wi go luku a libi fu den man disi moro fini. Wi o si taki (1) den ben e meki fowtu, (2) wi kan leri wan sani fu den, èn (3) sondusma man meki Gado prisiri.

Yob ben miti wan tu hebi problema aladi a no ben du wan ogri. Dati meki a bigin denki taki Gado no ben feni en prenspari taki a e du a wani fu en (Yob 9:20-22). Fu di Yob ben e taki soso bun fu ensrefi, meki a ben kon gersi leki a ben e si ensrefi bun moro Gado.—Yob 32:1, 2; 35:1, 2.

Lot ben e draidrai fu teki wan bosroiti, aladi a ben sabi san a ben musu du. Den ogri di den sma fu Sodom nanga Gomora ben e du, ben gi  Lot furu broko-ede. A ’ben e pina ibri dei’ srefi fu den sani di ben e pasa (2 Petrus 2:8). Gado ben taki dati a ben o pori den ogri foto dati èn a gi Lot nanga en osofamiri na okasi fu lowe gowe. Kande yu e denki taki Lot ben o de a fosi sma di ben o lowe gwe wantewante. Ma na presi fu dati a bigin draidrai. Den engel di Gado ben seni fu yepi Lot nanga en osofamiri, ben abi fu grabu den na den anu tyari gowe komoto fu drape.—Genesis 19:15, 16.

David no ben man dwengi ensrefi wan leisi èn a go sribi nanga wan frow fu wan tra man. Ma san moro ogri, na taki a kiri a masra fu a frow, soso fu kibri a tori (2 Samuel, kapitel 11). Bijbel e taki dati „Yehovah no ben lobi a sani di David du”.—2 Samuel 11:27.

Yob, Lot, nanga David meki fowtu, sonwan fu den ben de seryusu sondu. Ma soleki fa wi o si, den ben wani tan gi yesi na Gado nanga den heri ati. Den ben sori taki den abi berow, èn den ben de klariklari fu tyari kenki kon pe dati ben de fanowdu. Dati meki Gado ben feni den bun, èn Bijbel e taki dati den na man di du san Gado wani.

Fu di wi na sondusma, meki wi o tan meki fowtu (Romesma 3:23). Ma te dati pasa, wi musu sori taki wi abi berow èn wi musu meki muiti fu du san bun baka.

San Yob, Lot nanga David du fu meki sani kon bun baka? Yob ben de wan man di ben lobi du  san bun. Baka di Gado sori en taki a ben abi wan fowtu denki, Yob bigin denki tra fasi èn a ben kon si taki a ben meki wan fowtu (Yob 42:6). Neleki Gado, Lot no ben lobi den fisti sani di ben e pasa na ini Sodom nanga Gomora. A problema fu en ben de taki a ben e draidrai fu lowe gowe. Ma te fu kaba a lowe komoto na ini den foto dati èn a tan na libi. A gi yesi na Gado èn a no drai luku den sani di a ben libi na baka. Aladi David ben du wan seryusu sondu fu di a no hori ensrefi na a wet fu Gado, a sori taki a abi trutru berow èn a aksi Gado fu gi en pardon.—Psalm 51.

Gado ben feni den man disi bun fu di a ben hori na prakseri taki den na sondusma. „Gado sabi heri bun fa wi meki. A e hori na prakseri taki na fu doti wi meki” (Psalm 103:14). Sobun, efu Gado sabi taki ala ten wi e meki fowtu, dan san a e fruwakti fu wi?

A rai di David gi en manpikin Salomo, e sori wi san wi musu du fu meki Gado prisiri. „Yu Salomo, mi manpikin, kon sabi a Gado fu yu papa. Dini en nanga yu heri ati” (1 Kroniki 28:9). Fa wi kan dini Gado nanga wi heri ati? Wi kan du dati te wi lobi Gado, te wi wani leri sabi en èn te wi e du san a feni bun. Dati no wani taki dati wi no o meki fowtu, ma wi o de klariklari fu gi yesi na Gado èn fu teki rai te wi meki fowtu. Gado ben si Yob leki „wan bun man”, Lot leki wan „reti-ati man”, èn David leki wan man ’di du ala san a feni bun’, fu di den ben lobi en èn den ben wani gi yesi na en. Aladi den man disi ben meki fowtu, toku den ben man meki Gado prisiri.

Sobun efu wi ben prakseri wan sani di no bun, efu wi ben taki wan sani di no fiti, noso efu wi du wan sani èn bakaten wi kon si taki a no bun, dan den eksempre fu den man disi kan trowstu wi. Gado sabi taki nownowde wi na sondusma di e meki fowtu. Ma toku a e fruwakti fu wi taki wi lobi en èn taki wi e meki muiti fu gi yesi na en. Te wi e dini Gado nanga wi heri ati, dan wi kan de seiker taki wi o meki a prisiri.