Mi gro kon bigi na ini a foto Alicante, na a owstusei fu Spanyorokondre. Na osofamiri fu mi ben bruya srefisrefi, dati meki mi ben de na strati heri dei. Krosibei fu mi oso wan presi ben de pe den ben e meki boro banti. José María, wan fu den man di ben e wroko drape, tron mi mati. A ben abi switifasi èn a ben e broko en ede nanga mi aladi mi eigi famiri no ben e du dati. Te mi ben abi problema, a ben de leki wan bigi brada gi mi. Aladi a ben owru 20 yari moro mi, toku a ben de wan bun mati gi mi.

José María ben bigin studeri Bijbel nanga Yehovah Kotoigi. Mi ben kan si taki a ben lobi a Bijbel èn a ben lobi fruteri mi san a ben leri. Mi ben e arki en fu di mi ben e lespeki en, ma mi no ben e span nanga san a ben e taki. Leki yongu boi mi ben e du tra sani di mi lobi. Ma heri esi a libi dati ben o kenki.

Mi no lobi taki fu na ongoloku dati. San mi kan taki na dati mi ben e rèi leki wan lawman. Na ini wán dei mi heri libi kenki. Wantronso mi leki wan steifisteifi yongu boi di ben e du ala sani, kon lan èn mi ben musu tan na ati-oso. A ben hebi gi mi fu libi nanga a situwâsi disi. Mi ben e tan aksi misrefi: ’Fu san ede mi e libi ete?’

José María kon luku mi èn a seti sani so taki Yehovah Kotoigi na ini a birti dati kon luku mi na ati-oso. Mi ben e firi bun te den ben e kon luku mi. Syatu di mi komoto na intensive care, mi bigin studeri Bijbel. Mi kon leri fu san ede libisma e pina èn e dede èn fu san ede Gado e gi pasi taki ogri e pasa. Mi leri tu taki Gado pramisi taki na ini a ten di e kon libisma no o abi sondu moro èn nowan sma o taki: „Mi siki” (Yesaya 33:24). Fosi tron mi ben abi howpu na ini mi libi.

Di mi komoto na ati-oso, mi bigin du son sani di mi leri na ini Bijbel. Na ini mi rolsturu mi ben e go na son konmakandra fu Yehovah Kotoigi èn mi ben e go preiki tu. Tapu 5 november 1988, di mi ben abi 20 yari, mi dopu na ini wan spesrutu badkuip. Yehovah Gado yepi mi fu si a libi na a yoisti fasi. San mi ben kan du fu sori taki mi de nanga tangi?

Mi no ben wani taki a mankeri di mi kisi tapu mi fu du a wroko fu Yehovah. Mi ben wani du ala san mi man gi Yehovah (1 Timoteyus 4:15). Na a bigin, a sani disi no ben makriki fu di mi famiri no ben lobi a nyun bribi fu mi. Ma den Kotoigi ben de leki brada nanga sisa gi mi. Den ben e sorgu taki mi ben e go na ala konmakandra èn taki mi ben e go preiki.

Baka wan pisi ten mi kon si taki ibri yuru fu a dei mi ben o abi datrayepi fanowdu. Dati meki mi go presi pe den e sorgu gi sma di lan, teleki mi kon feni wan. A presi disi ben de na ini a foto Valencia, sowan 160 kilometer na a noordsei fu Alicante. Na drape mi e tan teleki now.

Aladi mi no man komoto na bedi moro, toku mi e tan dini Yehovah. Nanga a moni di mi e kisi fu di mi no man wroko, mi bai wan computer èn mi meki den seti en gi mi leti sei mi bedi. Mi bai wan cellulair tu. Now ibri mamanten, wan fu den sma di e luku mi e leti mi computer nanga mi cel gi mi. Mi e gebroiki wan sortu tiki fu wroko nanga mi computer. Mi e poti en ondro mi kaak, dan na so mi e wroko tapu mi computer. Mi abi wan spesrutu tiki tu di mi e hori nanga mi mofo. Na so mi kan druk den nomru tapu mi cel èn mi kan skrifi brifi nanga yepi fu wan keyboard.

Fa den sani disi yepi mi? Na a fosi presi den yepi mi fu go na tapu a website jw.org èn na a Waktitoren LIBRARY TAPU INTERNET. A website disi tyari furu wini kon gi mi. Ibri dei mi e studeri èn mi e ondrosuku sani omeni yuru langa na ini buku nanga tijdschrift. Na so mi e tan leri sani fu Gado èn den moi fasi fu en. Solanga mi e firi brokosaka, mi sabi taki mi kan feni wan sani tapu a website di o gi mi deki-ati.

Nanga a computer fu mi, mi kan arki èn teki prati na den konmakandra. Mi kan gi piki, begi, hori lezing, èn mi kan leisi A Waktitoren srefi te den brada aksi mi fu du dati. Aladi mi no man go na den konmakandra, toku mi e firi taki mi na wan memre fu a gemeente.

A telefon nanga a computer fu mi e yepi mi tu fu preiki. A tru taki mi no man go preiki oso fu oso neleki fa furu Yehovah Kotoigi e du. Ma toku mi feni wan fasi fu preiki. Nanga den sani disi mi kan taki fu mi bribi nanga tra sma. Fu di mi lobi preiki gi sma nanga yepi fu mi telefon, meki den owruman fu a gemeente aksi mi fu seti sani so taki tra brada nanga sisa kan preiki so tu. A sani disi yepi furu brada nanga sisa fu a  gemeente di no man komoto na oso fu go preiki.

Ma a no a computer nanga a telefon wawan mi abi na ini mi libi. Ibri dei den mati fu mi e kon luku mi. Den e tyari famiri nanga sma di wani sabi moro fu Bijbel. Den gwenti aksi mi fu taki nanga den sma disi fu Bijbel. Son leisi, osofamiri e kon luku mi èn den e aksi mi fu hori na Osofamiri Anbegi makandra nanga den. San mi moro lobi, na te pikin-nengre kon sidon sei mi bedi èn den e fruteri mi fu san ede den lobi Yehovah.

Mi breiti taki someni sma e kon luku mi. Nofo tron mi kamra lai nanga sma di komoto fu ala sei fu kon luku mi. Yu kan frustan taki a sani disi e fruwondru den sma di e wroko na a presi pe mi e libi. Ibri dei mi e taki Yehovah tangi taki mi abi so furu brada nanga sisa di lobi mi.

Te sma e gi mi odi èn den aksi fa a e go nanga mi, dan mi e taigi den: „A e go, mi e tan feti!” Mi sabi taki a no mi wawan e feti a feti disi. Awinsi na ini sortu situwâsi wan Kresten de noso awinsi sortu problema wi abi, wi alamala de na ini wan feti. Wi e „feti a bun feti di abi fu du nanga a bribi” (1 Timoteyus 6:12). San yepi mi fu tan feti ala den yari? Mi e begi ibri dei èn mi e taki Yehovah tangi taki a gi mi howpu na ini a libi. Mi e tan du ala san mi man fu dini Gado èn mi e tan prakseri a howpu di a gi wi.

Furu leisi mi e prakseri fa a libi o de na ini a nyun grontapu te mi o man lon èn dyompo baka. Son leisi mi e meki spotu nanga mi mati José María di lan tu. Mi e aksi en suma o wini te wi o streilon makandra na ini a nyun grontapu. Dan a e piki mi: „A no abi trobi suma o wini, san prenspari, na taki wi musu doro na ini Paradijs.”

A no ben makriki gi mi fu libi nanga a situwâsi fu mi. Mi sabi taki leki yongu boi mi du wan don sani di meki mi lasi furu. Ma mi de nanga bigi tangi taki Yehovah no libi mi. A gi mi so furu sani. Mi lai brada nanga sisa na ini na organisâsi, mi abi na angri fu libi, mi e prisiri fu leri sma fu Gado, èn mi abi howpu gi a ten di e kon. Efu mi musu taki syatu fa mi e firi, dan mi ben o taki dati Yehovah gi mi moro leki san mi frudini.