Wan dei Mike Iwuchukwu yere fa Melody, a meisje fu en, lon saka fu a trapu. Melody ben e volg skoro online, ma now a ben abi pauze. Mike go luku san Melody, di abi siksi yari, ben e du. A ben denki taki a ben o feni Melody e nyan wan brede noso e prei nanga den preisani fu en. Ma di Mike si san e pasa, a ben fruwondru èn a ben firi bun.

Mike taki: „A ben e sidon nanga en laptop nanga a buku Moi les di yu kan leri fu Bijbel èn dri pikin fu en klas ben e arki en. Melody taigi mi: ’Pâ, mi hori wan Bijbelstudie!’”

Sensi september 2020, di a skoro fu Melody na Houston, Texas, bigin gi les online fu di a coronavirus panya na ala sei, Melody ben wani bigin wan Bijbelstudie. Dati meki a begi Yehovah èn a bigin meki muiti fu feni wan Bijbelstudie.

Mike nanga Octavia, a mama fu Melody, breiti srefisrefi nanga a meisje fu den. Mike taki: „Ala ten Melody e taki fu Yehovah nanga den pikin fu en klas. Ma di mi si taki a ben e hori wan Bijbelstudie nanga den, mi nanga en mama ben e prisiri trutru.”

Melody e tan studeri nanga den pikin fu en klas. A taki: „Mi leri den kaba fu Paradijs èn fu Yesus. Mi wani taki den tron Yehovah Kotoigi!”

Samuel Molnar fu Illinois na Amerkankondre abi neigi yari èn en srefi bigin taki fu a bribi fu en tu.

Di Samuel yere wan ondrofenitori fu wan brada di go tanapu na en skotu fu preiki gi den sma di ben libi na en sei, Samuel ben wani pruberi a sani disi tu. Di a si a granpikin fu en birfrow e prei na en bakadyari, dan a go tanapu na sei a skotu èn a aksi a boi efu a mag fruteri en wan sani fu Paradijs. A boi ben wani arki èn Samuel lon go na inisei fu teki en buku di nen Mi buku nanga Bijbel tori.

Samuel taki: „Mi taigi en taki wan ten o kon taki a man prei nanga meti sondro fu den gi en mankeri. Baka dati mi leisi a tori gi en di e taki fu Danièl na ini a lew-olo.”

Ma a no dati wawan Samuel du. Na ini wan brifi a taigi a boi sortu felem nanga tra sani a kan feni tapu jw.org, dan a seni a brifi gi en. Den tu boi disi pramisi makandra taki te den o miti makandra baka, den o leisi ete wan Bijbel tori.

Samuel breiti taki a ben man du a sani disi èn a e meki muiti fu du moro ini a preikiwroko. A taki: „Mi wani leri sabi ala den traktaat fu a Teaching Toolbox, so taki mi kan prati den gi sma.”

Na ini a bigi fakansi, dri yongu sisa fu Houston, Amerkankondre, ben man go ini a yepi-pionierwroko, wan sani di den ben wani du someni langa.

Ini augustus, Joselyn Horta di abi 13 yari, Melanie Alvarez di abi 12 yari, nanga Chloe Rodriguez di abi 10 yari, ben taki nanga makandra nanga yepi fu videocall fu skrifi brifi. Feifi tron wan wiki den ben e miti makandra èn den ben e bigin 7 yuru mamanten.

Joselyn taki: „Wi e taki nanga makandra èn wi e nyan, dan half 8 mamanten wi e bigin skrifi brifi.” Son leisi, te wan fu den e frigiti fu opo, dan den trawan e seni wan app gi en di e taki: „Goedemorgen! Opo noh! Preikiwroko!”

Fu di den meisje disi de nanga someni faya, meki a no den wawan kisi deki-ati, ma tra mati nanga famiri tu. Alicia, a mama fu Joselyn, taki: „Son leisi mi ben weri fu go preiki. Ma te mi e si Joselyn e sidon drape, dan mi e taigi mi srefi taki mi wani go ini a preikiwroko tu!”

Yehovah e prisiri te a e si ala den yonguwan di e du ala san den man fu go ini a preikiwroko na a ten disi pe wan siki panya na ala sei.—Odo 27:11.