Furu papa nanga mama di de Kotoigi e gebroiki den JW Nyunsu artikel fu tranga a bribi fu den pikin fu den.

Sisa Fumiko Takehara, wan mama na ini Yapan, e leisi den JW Nyunsu artikel makandra nanga Naoki, a boi fu en di abi 12 yari, èn baka dati den e taki fu den artikel disi. Den e print den fowtow fu den brada nanga sisa di kari na ini den artikel èn den e anga den na wan muur. Fumiko e taki: „Te wi e begi, dan wi e taki fu ibriwan fu den brada nanga sisa disi. A e trowstu wi fu di wi sabi taki Yehovah e meki en pipel de nanga prisiri, srefi te den de na ini strafu-oso. Wi kan si na den brada fesi taki den de nanga prisiri. A bun eksempre fu den e yepi mi boi fu gi yesi na Yehovah te a de na skoro.”

Brada Kilanko Zannou e libi na Côte d’Ivoire èn a abi tu pikin. A e taki: „Ala dei mi e go tapu jw.org fu luku efu tra JW Nyunsu artikel de. Kilanko gwenti gebroiki den nyunsu disi te den abi na Osofamiri Anbegi. A kon si taki en osofamiri, spesrutu en boi Matthias di abi seibi yari, leri furu fu den brada fu wi di e sori deki-ati èn di e horidoro aladi den e kisi tesi.

Fosi, Matthias ben e frede fu preiki gi den pikin na skoro. Kilanko e taki: „Baka na Osofamiri Anbegi fu wi, Matthias bari taki: ’Mi no frede moro fu preiki!’”

Brada Holmes Simatupang, wan papa na ini Indonesia, leisi tu artikel nanga den pikin fu en. Den artikel disi e sori fa den yagi tu yongu Kotoigi komoto na skoro fu di den ben weigri fu singi gi a fraga.

Brada Simatupang e taki: „Na den sortu tesi disi den tu pikin fu wi e kisi tu na skoro. Ala ten baka, den skoro meneer nanga jufrow, èn den pikin fu a skoro wani dwengi den fu singi gi a fraga. Den wani dwengi den tu fu singi a singi fu a kondre noso fu du sani di abi fu du nanga kerki. Dati meki wan ten ben de taki den pikin fu wi ben frede fu go na skoro.

Holmes e taki: „Baka di wi taki fu den tu artikel disi di wi ben abi na Osofamiri Anbegi, den no ben frede moro fu fruteri sma fu san ede den no e singi gi a fraga. Den no e broko den ede so furu moro taki sma o yagi den komoto fu skoro.”

Sisa Lady Nery Passos na ini Brasyonkondre e taki: „Di Pedro, a boi fu wi, ben abi sowan feifi noso siksi yari, a ben musu fruteri sma na skoro kaba fu san ede a no e hori friyari-oso.” A go denki fa a ben kan yepi a boi fu den èn a prakseri den furu brada nanga sisa di kari na ini den JW Nyunsu artikel èn di sreka densrefi fu man taki te den de na fesi krutu. A sisa disi e taki: „Te wi abi wi Osofamiri Anbegi, dan wi e oefen difrenti situwâsi di kan miti wi. Disi yepi a boi fu mi fu sabi san a musu du te friyari-oso e hori na skoro.” Dati meki Pedro ben de srekasreka now fu opo taki gi a bribi fu en.

Den JW Nyunsu artikel e sori moi fa Yehovah e tranga a bribi fu den futuboi fu en èn fa a e sorgu den. Wi abi furu buweisi di e sori taki te wi e kisi tesi, wi o tan ’abi prisiri èn a santa yeye o tan na wi tapu’ so taki wi o man horidoro.—Tori fu den apostel 13:50-52.