Na edekantoro fu Yehovah Kotoigi e luku ibri dei sortu nyunsu de fu a coronavirus noso COVID-19. Den e gi yesi tu na den rai fu lanti di e sori san sma kan du fu no kisi a siki disi. Wi sabi taki Bijbel profeititori ben taki na fesi dati na ini den lasti dei taki takru siki di e kiri furu sma ben o panya na ala sei (Lukas 21:11). Te so wan siki panya, dan a bun fu du son sani, so taki wi nanga tra sma no kisi a siki disi.​—Odo 22:3.

Kande sonwan fu unu e aksi unsrefi fa a e go nanga den brada nanga sisa na ini den kondre pe a siki disi panya. Fu di COVID-19 e panya so esi, meki den bijkantoro ini Italiakondre, Yapan, Zuid-Korea nanga tra kondre ben musu seti son sani. Sonwan fu den bijkantoro disi no e meki sma kon na inisei moro fu teki wan tour noso fu kon luku wan sma drape. Fu di lanti taki na ini son kondre taki furu sma no mag kon makandra, meki a bijkantoro na ini den kondre disi sorgu taki den kring konmakandra no go doro. Na son presi den gemeente ben musu kenki a preikiwroko nanga den gemeente konmakandra tu. Ma toku den problema disi no e tapu den brada nanga sisa fu leisi èn studeri Bijbel èn den e tan gi makandra deki-ati.​—Yudas 20, 21.

Na ini a situwâsi disi den brada abi wan tu moi rai di kan yepi wi. Den rai disi kan yepi yu nanga yu osofamiri tu efu wan takru siki panya na ini a kondre fu yu.

• No bruya. Te wan takru siki e panya na ala sei, a tru taki wi musu luku bun èn wi musu du san wi man fu no kisi a siki disi. Ma wi no musu du sani bruyabruya soso fu di wi e frede.​—Odo 14:15; Yesaya 30:15.

• Gi yesi na den wet nanga rai fu lanti. Nofo tron lanti o poti wan tu wet èn den o gi rai fu sorgu taki a siki no panya go moro fara. Fu dati ede a bun fu arki nyunsu fu sabi san lanti wani sma fu du, so taki wi kan du dati tu.​—Romesma 13:1.

• Sorgu taki ala sani krin. A prenspari fu abi a gwenti fu wasi yu anu nanga sopo èn watra, noso yu kan gebroiki wan hand sanitizer di abi alcohol na ini. Na wi oso èn na ini a Kownukondre zaal wi musu sorgu tu taki wi e krin den sani noso presi di sma e fasi furu tron. Datra taki tu dati a bun fu no seki sma anu na ini a situwâsi disi, fu di a siki kan panya go moro fara na a fasi disi. Na Organisâsi fu Gosontu Afersi na Grontapu (WHO) abi moro rai tu di abi fu du nanga a coronavirus.

• Sori lobi gi trawan. Wi alamala sabi taki a prenspari fu go na den Kresten konmakandra nanga a preikiwroko. Ma efu yu siki a moro bun fu tan na oso, noso yu kan panya a siki gi trawan. Na so yu e sori taki yu lobi yu brada nanga sisa èn den nanga tra sma di no de Kotoigi no o kisi a siki fu yu.​—Mateyus 22:39.

• Gi yesi na den seti fu a gemeente. Te wan siki panya na wan presi, dan a kan de fanowdu taki a bijkantoro meki bekènti taki gemeente konmakandra, kring konmakandra nanga tra konmakandra no o hori fu wan pisi ten. Na dati pasa na son presi pe furu sma kisi a COVID-19 virus, soleki na Italiakondre, Yapan nanga Zuid-Korea. Na ini so wan situwâsi den owruman musu luku efu den kan seni wan opname fu den konmakandra gi den preikiman, so taki den kan luku dati na oso. Den preikiman kan preiki nanga yepi fu telefon, sms, e-mail noso brifi.

Na ondrosei yu abi wan tu tijdschrift di abi moi rai di kan yepi wi fu no kisi den sortu siki disi.

• „Bescherm uzelf tegen ziekte” Ontwaakt! Nr. 6 2016, bladzijde 4-6

• „Adviezen voor een gezonder leven” Ontwaakt! Juni 2015, bladzijde 2-7

• „Een betere gezondheid is mogelijk: Advies 4: Bescherm uw gezondheid” Ontwaakt! Maart 2011, bladzijde 7