Nôno. Yehovah Kotoigi no e weigri fu teki vaccinatie. Efu wan Kresten wani teki vaccinatie, dan dati na en eigi bosroiti. Furu Yehovah Kotoigi e bosroiti fu teki vaccinatie.

 Wi wani a moro bun datrayepi èn wi e warderi a muiti di sabiman e meki fu feni dresi di kan yepi wi fu feti seryusu siki. Wi breiti taki datra nanga tra sma di e sorgu sikisma e wroko so tranga, spesrutu na ini wan ten pe bigi problema de.

 Yehovah Kotoigi wani wroko makandra nanga den difrenti organisâsi di e luku den gosontu afersi fu a kondre. Fu eksempre, sensi a COVID-19 siki bigin, Yehovah Kotoigi tan poti sani tapu jw.org na ini hondrohondro tongo fu gi sma deki-ati fu du den sani di lanti seti fu sma no kon siki. Na so wi kisi deki-ati fu no go tumusi krosibei fu tra sma èn fu arki rai di abi fu du nanga okasi pe furu sma e kon makandra. Wi kisi a rai tu fu wasi wi anu, fu weri mondkap noso fu du tra sani tu di lanti e aksi fu wi so taki wi no kon siki.​—Romesma 13:1, 2.

 Someni yari kaba, Yehovah Kotoigi skrifi artikel pe den e gi den rai disi:

•   Wan sma musu teki en eigi bosroiti te a abi fu du nanga en gosontu.​—Galasiasma 6:5.

   „[A tijdschrift disi] no e taigi nowan sma sortu dresi noso datrayepi bun noso no bun, èn wi no e gi sma rai sortu datrayepi den musu teki. Wi e skrifi nomo san wi sabi èn den leisiman srefi musu luku sortu bosroiti den o teki.”​—Ontwaakt!, 8 februari 1987.

   „Na yusrefi musu luku efu yu nanga yu pikin o teki vaccinatie.”​—Ontwaakt!, 8 yanuari 1966.

•   Wi e suku datrayepi fu di a libi na wan warti sani gi wi.​—Tori fu den apostel 17:28.

   „Yehovah Kotoigi e gebroiki ibri okasi fu suku datra di man yepi den te den abi gosontu problema. Den lobi a libi èn den wani du ala sani den man fu kisi a yepi dati, solanga disi e kruderi nanga san Bijbel taki.”​—De Wachttoren, 15 maart 1976.

   „Yehovah Kotoigi de klariklari fu teki dresi èn fu kisi datrayepi. Den wani abi wan bun gosontu èn den wani libi moro langa. Fu taki en leti, neleki Lukas, wan Kresten fu a fosi yarihondro, son Kotoigi fu Yehovah na datra. . . . Yehovah Kotoigi trutru e warderi a tranga wroko di den datra e du èn a fasi fa den e gi densrefi na ini a wroko fu den. Den de nanga tangi tu gi a yepi di den sma dati e gi den fu kon betre baka.”​—A Waktitoren, 1 februari 2011.