Sani di sma e taki: Yehovah Kotoigi no e hori Pasen, fu di den a no Kresten.

 A tru: Wi e bribi taki Yesus Krestes na wi frulusuman, èn wi e du ala san wi man fu „waka soifri na en baka.”​—1 Petrus 2:21; Lukas 2:11

 Sani di sma e taki: Un no e bribi taki Yesus kon na libi baka.

 A tru: Wi e bribi na ini a opobaka fu Yesus. Wi e si a sani disi leki fondamenti leri fu a Kresten bribi èn wi e fruteri sma fu dati ini a preikiwroko.​—1 Korentesma 15:3, 4, 12-15.

 Sani di sma e taki: Un no e broko wi ede nanga den prisiri momenti di den pikin fu unu e misi fu di un no e hori Pasen.

 A tru: Wi lobi den pikin fu wi​—fu dati ede wi e du ala san wi man fu yepi den fu de koloku èn fu prisiri fu a libi.​—Titus 2:4.

•   A hori di sma e hori Pasen a no wan leri fu Bijbel.

•   Yesus no taigi wi fu memre a opobaka fu en, ma fu memre a dede fu en. Na dati wi e du ibri yari, tapu a dei di a dede soleki fa Bijbel kalender e sori.​—Lukas 22:19, 20.

•   Den sani di sma e du tapu Pasen abi fu du nanga owruten heiden gwenti, fu dati ede Gado no feni en bun. Gado wani taki wi „musu anbegi en wawan” èn a e atibron srefisrefi te wi e gebroiki owruten gwenti di no bun ini na anbegi fu wi.​—Eksodes 20:5; 1 Kownu 18:21.

 Wi sabi taki Bijbel e horibaka gi a bosroiti di wi teki fu no hori Pasen, fu di a e gi wi a deki-ati fu „poti prakseri na koni nanga frustan” na presi fu poti prakseri na den gwenti fu libisma (Odo 3:21; Mateyus 15:3). Te wi e fruteri trawan san wi e bribi fu Pasen, wi e du muiti fu lespeki a reti di ala sma abi fu bosroiti gi densrefi san den wani du.​—1 Petrus 3:15.