NjengaBoFakazi BaJehova senta tintfo letisita kokubili imindeni yetfu kanye neyabomakhelwane betfu. Sihlonipha Nkulunkulu longuMsunguli wemindeni. (Genesisi 2:​21-​24; Kubase-Efesu 3:​14, 15) EBhayibhelini, Nkulunkulu ufundzisa ngetimiso letisita bantfu labanyenti emhlabeni wonkhe kutsi babe nemishado lecinile nalejabulisako.

 Senta konkhe lokusemandleni etfu kuze silalele teluleko letiseBhayibhelini, ngobe loko kusita kutsi sibe ngemadvodza, bafati kanye nebatali labakahle. (Taga 31:10-31; Kubase-Efesu 5:22–6:4; 1 KuThimothi 5:8) Kuhlakanipha lokuseBhayibhelini kusita ngisho nemindeni lenetinkholo letingafani kutsi iphumelele. (1 Phetro 3:1, 2) Cabanga nganankha emavi lashiwo bantfu labangesibo BoFakazi kodvwa labashade nebantfu labaBoFakazi BaJehova:

•   “Eminyakeni yetfu yekucala lesitfupha sishadile, besihlale sicabana futsi sinetinkinga. Ngemuva kwekutsi Ivete abe ngulomunye waBoFakazi BaJehova, waba nelutsandvo futsi wabeketela. Lushintjo lalwenta ekuphileni kwakhe lwasindzisa umshado wetfu.”​—Clauir, waseBrazil.

•   “Bengingafuni kutsi Chansa indvodza yami ifundze liBhayibheli naBoFakazi BaJehova, ngobe bengicabanga kutsi behlukanisa imindeni. Ngekuhamba kwesikhatsi, ngabona kutsi liBhayibheli liwusitile umshado wetfu.”​—Agness, waseZambia.

 Nasishumayela, sikhombisa bomakhelwane betfu indlela yekusebentisa kuhlakanipha lokuseBhayibhelini kuze kubasite kutsi

•   Bakhetse kahle bantfu labatawushada nabo

•   Bakhone kubeketela emnyakeni wabo wekucala bashadile

•   Kusebentelana netihlobo

•   Kusebentisa kahle imali

•   Kuyekela kuphikisana

•   Kufundza kucolelana

•   Kucecesha bantfwana

 Kuyavunywa, ngaletinye tikhatsi kuyenteka. Sibonelo saloko kutsi, umbiko weluhlolo lolwentiwa yinkapane i-Sofres nga-1998 utsi, umshado munye kulengu-20 lapho khona lomunye kulabashadene ashintje waba nguFakazi kwaba netinkinga letinkhulu.

 Jesu wabiketela kutsi labo labalandzela timfundziso takhe, ngaletinye tikhatsi batawuba netinkinga emndenini. (Matewu 10:32-​36) Sati semlandvo Will Durant satsi, ngephansi kweMbuso wemaRoma “Inkholo yebukhristu yabekwa licala lekwehlukanisa imindeni,” a futsi labanye BoFakazi BaJehova babekwe emacala lafanako nalamuhla. Ngabe loku kusho kutsi BoFakazi BaJehova yini lababanga kungevani emndenini?

 Ecaleni lekutsi BoFakazi BaJehova behlukanisa imindeni, Inkantolo Yemalungelo Ebantfu yase-Europe yatsi, emalunga emndeni langesibo BoFakazi ngiwo lavamise kubanga kungevani ngekutsi “angemukeli futsi angalihloniphi lilungelo lekutsi loyo longuFakazi aphile ngaloko lakukholelwako.” Lenkantolo yaphindze yatsi: “Loku yintfo levamise kwenteka kuyo yonkhe imindeni lenetinkholo letingafani, futsi angeke silindzele lokwehlukile kuBoFakazi BaJehova.” b Ngisho nobe baphatfwa kabi ngenca yenkholo yabo, BoFakazi BaJehova balwela kulandzela seluleko seliBhayibheli lesitsi: “Ningaphindziseli lokubi ngalokubi kulabanye. . . . Nakungenteka, yentani konkhe lokusemandleni enu, kuze nibe nekuthula nabo bonkhe bantfu.”​—KubaseRoma 12:17, 18.

 BoFakazi balalela seluleko seliBhayibheli lesitsi, “shada kuphela eNkhosini,” lokusho kutsi, shada nemuntfu losenkholweni lefana neyakho. (1 KubaseKhorinte 7:​39) Lona ngumyalo loseBhayibhelini futsi uyasebenta. Sibonelo saloku kutsi nga-2010, sihloko lesikumagazini i-Journal of Marriage and Family satsi “umshado webantfu labasenkholweni yinye,” uyacina. c

 Nobe kunjalo, BoFakazi abawakhutsati emalunga abo lashade nebantfu labangesibo BoFakazi kutsi behlukane nabo. LiBhayibheli litsi: “Nangabe umzalwane anemfati longakholwa kodvwa lomfati avuma kuhlala naye, akangamshiyi, futsi nangabe umfati anendvodza lengakholwa, kodvwa ivuma kuhlala naye, akangayishiyi.” (1 KubaseKhorinte 7:​12, 13) BoFakazi BaJehova balalela lomyalo.