•  BoFakazi BaJehova babona ngani kutsi liholide bangaliguba nobe cha?

•  Njengobe BoFakazi BaJehova bangawagubhi emaholide latsite, loko kusho kutsi abasayitsandzi yini imindeni yabo?

•  BoFakazi BaJehova batjela labanye kutsi bangawagubhi yini emaholide?

 Ngaphambi kwekutsi bancume kutsi liholide bayaligubha nobe cha, BoFakazi BaJehova bacale bahlole loko lokushiwo liBhayibheli ngalo, ngobe lamanye emaholide awavumelani nemitsetfo yaNkulunkulu. Nangabe leliholide lingavumelani nemitsetfo yaNkulunkulu, BoFakazi BaJehova abaligubhi. Nangabe liholide lingashayisani nemitsetfo yaNkulunkulu, Fakazi ngamunye kufanele atentele sincumo, alwele “kuba nanembeza lomsulwa embikwaNkulunkulu nasembikwebantfu.”—Imisebenti 24:16.

 Lemibuto lelandzelako yimibuto BoFakazi BaJehova labatibuta yona nabancuma kutsi liholide bataligubha nobe cha. a

•   Leliholide lisekelwe etimfundzisweni letingekho yini eBhayibhelini?

   Simiso seliBhayibheli: “Phumani kubo, nitehlukanise nabo, futsi ningatsintsi lutfo lolungcolile.”—2 KubaseKhorinte 6:15-17.

   Kuze BoFakazi BaJehova batehlukanise netimfundziso letingakasekelwa eBhayibhelini, abawagubhi emaholide lananati tintfo letilandzelako.

   Emaholide lasekelwe ekukhonteni labanye bonkulunkulu. Jesu watsi: “Kufanele ukhotsamele Jehova Nkulunkulu wakho, futsi nguye yedvwa lokufanele umkhonte.” (Matewu 4:10) Ngenca yalomyalo, BoFakazi BaJehova abamgubhi Khisimusi, ema-Easter nobe i-May Day, ngobe lamaholide asekelwe ekukhonteni labanye bonkulunkulu hhayi Jehova. Ngetulu kwaloko, abawagubhi emaholide lafana nanawa lalandzelako.

  •  I-Kwanzaa. Ligama lelitsi Kwanzaa “livela emagameni esiSwahili latsi matunda ya kwanza, lokusho sitselo sekucala, futsi loku kukhombisa kutsi leliholide lisekelwe ekugubheni sivuno sekucala lokukhulunywa ngako emlandvweni wase-Afrika.” (Encyclopedia of Black Studies) Ngisho nobe labanye bantfu bangacabangi kutsi iKwanzaa ingumcimbi wenkholo, i-Encyclopedia of African Religion iwufananisa nemkhosi wesivuno wase-Afrika. Kulomcimbi wase-Afrika, bantfu “banikela kubonkulunkulu nasemadlotini kuze babonge. Ngako iKwanzaa, lokuliholide leligujwa ngema-African American, isekelwe kulemicimbi.”

  •  I-Mid-Autumn Festival. Lona “ngumkhosi wekuhlonipha nkulunkulukati wenyanga.” (Holidays, Festivals, and Celebrations of the World Dictionary) Lomkhosi ufaka ekhatsi umsimeto wekutsi bantfu besifazane belikhaya nelikhaya bakhotsamele lonkulunkulukati.

  •  I-Nauruz (Nowruz). “Lomkhosi uvela ekholweni yesi-Zoroastrianism, futsi ungulelinye lemalanga langcwele ekhalendeni yema-Zoroastrian asendvulo. . . Ngekwelisiko le-Zoroastrian ngalelilanga leNowruz, kuba nemcimbi nga-12 emini, wekwemukela Spirit of Noon, lesatiwa ngekutsi i-Rapithwin, lesaphocelelwa Spirit of Winter kutsi singene ngaphansi kwemhlaba ngalesikhatsi setinyanga temakhata.”—I-United Nations Educational, Scientific and Cultural Organization.

  •  I-Shab-e Yalda. Ngekusho kwencwadzi i-Sufism in the Secret History of Persia, lomcimbi wentiwa ebusika ngobe “uhlangene nekukhontwa kwankulunkulu wekukhanya longu-Mithra.” Labanye bacabanga kutsi leliholide lihlangene nekukhonta bonkulunkulu belilanga labakhontwa ngemaRoma nemaGriki. b

  •  I-Thanksgiving. Ngalokufana neKwanzaa, leliholide lisekelwe emcimbini wakadzeni wesivuno, lebewuhlonipha bonkulunkulu labehlukahlukene, lokwatsi ngekuhamba kwesikhatsi “wase ufakwa emasontfweni ebuKhristu.”—I-A Great and Godly Adventure—I-The Pilgrims and the Myth of the First Thanksgiving.

   Emaholide lasekelwe ku-superstition nobe enhlanhleni. LiBhayibheli litsi labo “labadekela nkulunkulu weNhlanhla litafula,” ‘bayincenye yalabo labashiya Jehova.’ (Isaya 65:11) Ngako BoFakazi BaJehova abawagubhi lamaholide lalandzelako:

  •  I-Ivan Kupala. Incwadzi i-The A to Z of Belarus “Bantfu batsi ngalelilanga le-Ivan Kupala indalo iba nemandla lamakhulu emlingo, ngako nawunesibindzi futsi unenhlanhla, ungawatfola lamandla.” Ekucaleni, i-Ivan Kupala bekuliholide lemacaba, lebeligujwa ngemaJuda. Nobe kunjalo, i-Encyclopedia of Contemporary Russian Culture itsi, “yase ihlanganiswa nelihode lelisontfo, [i-the “saint’s day” of John the Baptist], ngemuva kwekutsi emacaba abe ngemaKhristu.”

  •  I-Lunar New Year (Sikhatsi sekugubha umnyaka lomusha sebantfu baseChina naseKorea). “Ngalesikhatsi semnyaka, lokubaluleke kakhulu kubantfu baseChina kutsi imindeni netihlobo nebangani bente konkhe labangakwenta kuze babe nenhlanhla, bahloniphe bonkulunkulu kanye nemimoya futsi bafiselane lokuhle emnyakeni lolandzelako.” (Mooncakes and Hungry Ghosts—Festivals of China) Ngendlela lefanako, kugujwa kweMnyaka Lomusha eKorea “kugcwele kukhontwa kwemadloti, imisimeto yekucosha imimoya lemibi, nekuciniseka kutsi baba nenhlanhla kulowo mnyaka lomusha kanye nekuphengula kuze batfole kutsi loMnyaka Lomusha ubaphatseleni.”—I-Encyclopedia of New Year’s Holidays Worldwide.

   Emaholide lasekelwe enkholelweni yekutsi umphefumulo awufi. LiBhayibheli likubeka ngalokucacile kutsi umphefumulo uyafa. (Ezekiel 18:4) Ngako BoFakazi BaJehova abawagubhi emaholide lasekelwe enkholelweni yekutsi umphefumulo awufi njenganawa labalwe langentasi:

  •  I-All Souls’ Day (Lilanga Lebantfu Labafa). Ngekusho kwe-New Catholic Encyclopedia, leli lilanga “lokukhunjulwa ngalo bonkhe bantfu labafa betsembekile. Bekuyinkholelo leyatiwako kutsi imiphefumulo lesesihogweni iyabuya ngalelilanga seyitipoko, batsakatsi, ticoco nobe lokunye kuze itohlupha bantfu labayiphatsa kabi isaphila.”

  •  I-Qingming Festival (Ch’ing Ming) ne-Hungry Ghost Festival. Lemikhosi lemibili yentelwa kuhlonipha emadloti. Ngekusho kwencwadzi i-Celebrating Life Customs Around the World—From Baby Showers to Funerals, nakugujwa i-Qingming, kudla, kwekunatsa kanye nemali kuyashiswa kuze kucinisekiswe kutsi bantfu labafile abalambi, abomi futsi abayesweli imali.” Lencwadzi ichubeka itsi “nakugujwa i-Hungry Ghost Month, lokuvamise kwenteka ebusuku inyanga nayigcwele kutsi bantfu labahlanganyela kulomkhosi bakholelwa kutsi ngalobo busuku, kuba nekuchumana lokukhulu emkhatsini webantfu labafile kanye nalabaphilako. Ngako kubalulekile kutsi bawahloniphe futsi bawajabulise lamadloti kuze angabalimati.

  •  I-Chuseok. Incwadzi i-The Korean Tradition of Religion, Society, and Ethics, itsi “lomkhosi ufaka ekhatsi kuhlabela bantfu labafa kanye nekubaphisela tjwala.” Lokuhlabela labantfu labafile kukhombisa “kukholelwa kutsi umphefumulo uyachubeka uphila ngisho umtimba sewufile.”

   Emaholide lahlangene nekusebentelana nemimoya. LiBhayibheli litsi: “Nobe ngubani lophengulako, lowenta imilingo, lobhulako, nobe losangoma, nanobe ngubani lotsakatsa labanye, lobuta etangomeni nobe kulababiketela inhlanhla, nobe lobuta kulabafile. . . uyenyanyeka kuJehova.” (Dutheronomi 18:10-12) Kuze bangatihlanganisi nekusebentelana nemimoya, lokufaka ekhatsi kufundza tinkhanyeti nobe kubhula, BoFakazi BaJehova abawagubhi emaholide lafana ne-Halloween nobe nawa lamanye lalandzelako:

  •  I-Sinhala and Tamil New Year. “Lemisimeto yelisiko ihlanganisa kwenta imisebenti . . . letsite ngesikhatsi lesitsite lapho khona bafundzi betinkhanyeti babiketele kutsi kutawuba nenhlanhla.”—I-Encyclopedia of Sri Lanka.

  •  I-Songkran. Leligama lalomkhosi wase-Asia “lisuselwa egameni lesiSanskrit . . . lelisho ‘kunyakata’ nobe ‘kushintja’ futsi [lomkhosi] uphawula kusuka kwelilanga liya ku-zodiacal constellation of Aries.”—I-Food, Feasts, and Faith—An Encyclopedia of Food Culture in World Religions.

   Imikhosi lehlobene nekukhonta lengaphansi kweMtsetfo waMosi leyaphela Jesu nakakhokha inhlawulo. LiBhayibheli litsi “Khristu usiphetfo seMtsetfo.” (KubaseRoma 10:4) EmaKhristu asazuza etimisweni teMtsetfo waMosi lebewuniketwe ema-Israyeli asendvulo. Nobe kunjalo, awayigubhi imikhosi lesekelwe kulemitsetfo, ikakhulukati leyo lebeyibiketela kuta kwaMesiya emaKhristu lakholelwa kutsi sewefika. “Leto tintfo tisitfunti saleto letitako,” njengobe kuphawula liBhayibheli, “kodvwa lokungiko sibili kukuKhristu.” (KubaseKholose 2:17) Ngenca yekutsi leminye yalemikhosi seyingcoliswe ngemasiko langakasekelwa emiBhalweni, BoFakazi BaJehova abawagubhi lamaholide lalandzelako:

  •  I-Hanukkah. Lomkhosi ukukhumbula kunikelwa kabusha kwelithempeli lemaJuda eJerusalema. Nobe kunjalo, liBhayibheli litsi Jesu waba nguMphristi Lomkhulu “ethendeni [nobe ethempelini] lelikhulu naleliphelele kakhulu lelingakentiwa ngetandla, lokusho kutsi lelingasilo lalapha emhlabeni.” (KumaHebheru 9:11) KumaKhristu, lelithempeli lelingekwemfanekiso latsatsa indzawo yelithempeli lelingokocobo lebeliseJerusalema.

  •  I-Rosh Hashanah. Leli lilanga lekucala emnyakeni wemaJuda. Endvulo, leli bekulilanga lekwenta imikhosi yekunikela kuNkulunkulu. (Numeri 29:1-6) Nobe kunjalo, njengaMesiya, Jesu Khristu wabangela kutsi ‘icedvwe lemihlatjelo neminikelo,’ lokwayenta yangasabaluleki kuNkulunkulu.— Danyela 9:26, 27.

•   Leliholide liyakuvumela yini kuhlanganisa tinkholo?

   Simiso seliBhayibheli: “Umuntfu lowetsembekile ufana ngani nemuntfu longakholwa? Lithempeli laNkulunkulu linakuvumelana kuni netithico?”—2 KubaseKhorinte 6:15-17.

   Ngisho nobe BoFakazi BaJehova benta konkhe labangakwenta kuze baphilisane ngekuthula nabomakhelwane babo, bayawahlonipha emalungelo emuntfu ngamunye ekutikhetsela loko lafuna kukukholelwa, kodvwa abahlanganyeli emicimbini levumela kuhlanganiswa kwetinkholo ngaletindlela letilandzelako.

   Imicimbi yenkholo nobe imibutsano lekhutsata kutsi bantfu betinkholo letingafani bahlangane ndzawonye kuze bakhonte. Ngesikhatsi Nkulunkulu ahola bantfu bakhe basendvulo abamikisa eveni lelisha, labekuhlala khona bantfu baletinye tinkholo, naku labatjela kona: “Ningenti sivumelwane nabo nobe nabonkulunkulu babo. . . . Nanitawukhonta bonkulunkulu babo, loko kutawuba lugibe kini.” (Eksodusi 23:32, 33) Ngako-ke BoFakazi BaJehova abahlanganyeli akugubheni lamaholide lalandzelako.

  •  I-Loy Krathong. Ngalesikhatsi salomkhosi waseThailand, “bantfu bakha tindishi basebentisa emacembe, bafake ekhatsi emakhandlela nobe imphepho bese bayakukhulula kuhambe nemanti ngobe bakholelwa kutsi njengobe letindishi tihamba nalamanti, tihamba nemabhadi. Ecinisweni, ngalomkhosi basuke bakhumbula lapho kwanyatsela khona Buddha.”—I-Encyclopedia of Buddhism.

  •  I-National Repentance Day. Ngekusho kwalesinye sisebenti sahulumende lesicashunwe ku-The National, lokuliphephandzaba lase-Papua New Guinea, labo labahlanganyela kulomkhosi “bavumelana nemitsetfo yebuKhristu.” Sitsi: “Lelilanga lingumtfombo wetimiso tebuKhristu talelive.”

  •  I-Vesak. Leli lilanga lelingcwele kakhulu kumaBuddha, lapho kugujwa khona kutalwa kwaBuddha, kukhanyiseleka kwakhe, kufa kwakhe nobe nekutfola kwakhe i-Nirvana.”—I-Holidays, Festivals, and Celebrations of the World Dictionary.

   Imicimbi lesekelwe emasikweni enkholo, kodvwa lengekho eBhaybhelini. Jesu watsi kubaholi benkholo: “Nilente laba lite livi laNkulunkulu ngenca yemasiko enu.” Waphindze wabatjela kutsi kukhonta kwabo Nkulunkulu kulite ngobe bafundzisa “timfundziso tebantfu.” (Matewu 15:6, 9) Ngenca yekutsi BoFakazi BaJehova balalela lomyalo, minyenti imicimbi lehlobene nenkholo labangahlanganyeli kiyo.

  •  I-Epiphany (Three Kings’ Day, Timkat, or Los Reyes Magos). Kulomkhosi, kusuke kukhunjulwa kuya kwetati tetinkhanyeti kuJesu nobe kubhajatiswa kwaJesu. Lomkhosi watsatsa “imicimbi yebucaba yekuhlonipha bonkulunkulu bemanti lahambako, imifula kanye nemitfombo yayenta yaba yebuKhristu.” (The Christmas Encyclopedia) Umkhosi lofana nalona yi-Timkat “losekelwe ngalokujulile emasikweni.”—I-Encyclopedia of Society and Culture in the Ancient World.

  •  I-Feast of the Assumption of the Virgin Mary. Kulomkhosi kusuke kugujwa inkholelo yekutsi Mariya, make waJesu, wenyukela ezulwini ngemtimba wakhe wenyama. Ngekusho kwe-Religion and Society—Encyclopedia of Fundamentalism, “lenkholelo beyingatiwa emasontfweni ekucala futsi akukhulunywa nangayo emiBhalweni.”

  •  I-Feast of the Immaculate Conception. “Imfundziso yekutsi Mariya watalwa ete sono ayikho emiBhalweni . . . kunaloko, kuyimfundziso yemasontfo.”—I-New Catholic Encyclopedia.

  •  I-Lent. Ngekusho kwe-New Catholic Encyclopedia, lesi sikhatsi sekuzila kanye nekuphendvuka lesacaliswa “ngelikhulu lesine,” ngemuva kweminyaka lengetulu kwa-200 liBhayibheli licedvwe kubhalwa. Le-Encyclopedia itsi: “Ngelilanga lekucala le-Lent, lokuyi-Ash Wednesday, umphristi udvweba siphambano emabuntini emakholwa akhe asebentisa umlotsa kuze awakhumbute kutsi kufanele aphendvuke. Lelisiko lase litsatfwa lisontfo lemaKhatolika nga-1091.”

  •  I-Meskel (nobe, Maskal). I-Encyclopedia of Society and Culture in the Medieval World itsi kulomkhosi waseTopiya kusuke kugujwa “kutfolakala kwesiphambano Jesu lafela kuso. Kubaswa imililo lemikhulu bese kudanswa kutungeletwe lemililo.” Nobe kunjalo, BoFakazi BaJehova abasisebentisi siphambano.

•   Leliholide lidvumisa umuntfu, inhlangano letsite nobe luphawu lwesive yini?

   Simiso seliBhayibheli: “Jehova utsi: ‘Ucalekisiwe umuntfu lowetsembela kubantfu, abeke litsemba lakhe emandleni ebantfu, futsi ashiye Jehova.’”—Jeremiya 17:5.

   Ngisho nobe BoFakazi BaJehova babatsandza futsi babafaka nasemithantazweni yabo labanye bantfu, kodvwa abahlanganyeli kulemibutsano nemicimbi lelandzelako:

   Emaholide lahlonipha umholi nobe lomunye umuntfu losegunyeni. LiBhayibheli litsi: “Kuze kusitakale nine, yekelani kubeka litsemba lenu kumuntfu, Ufana nemoya nje lophuma emakhaleni akhe. Kungani kufanele alandzise?” Sibonelo nje, BoFakazi BaJehova abahlanganyeli ekugubheni lusuku lwekutalwa lenkhosi nobe Lendlovukazi.

   Kugubha i-national flag day. BoFakazi BaJehova abayigubhi i-Flag Day. Leni? Kungobe liBhayibheli litsi: “Tibalekeleni tithico.” (1 Johane 5:21) Labanye bantfu lamuhla abayitsatsi i-flag njengesithico nobe intfo lekhontwako, kodvwa sati semlandvo, Carlton J. H. Hayes, sabhala: “Luphawu lwesive loluyinhloko lolukhombisa kukholwa futsi loluyintfo lekhontwa kakhulu, yi-flag.”

   Emaholide nobe imicimbi ledvumisa ema-saints. Yini leyenteka ngesikhatsi indvodza leyesaba Nkulunkulu ikhotsamela umphostoli Phetro? LiBhayibheli litsi: “Phetro wamphakamisa, watsi kuye: ‘Sukuma, ngobe nami ngingumuntfu nje.’” (Imisebenti 10:25, 26) Njengobe Phetro kanye nalabanye baphostoli bangazange bavume kukhontwa, BoFakazi BaJehova abahlanganyeli emibutsanweni lehlonipha bantfu labatsite labatsatfwa njengema-saints, njengalemibutsano lelandzelako:

  •  I-All Saints’ Day. “Lona ngumcimbi wekuhlonipha onkhe ema-saints . . . lokungatiwa kutsi wacala kuphi.”—I-New Catholic Encyclopedia.

  •  I-Fiesta of Our Lady of Guadalupe. Lomkhosi wekuhlonipha “wesifazane loyi-saint waseMexico,” labanye labakholelwa kutsi nguMariya, make waJesu. Kutsiwa wavela ngalokusimangaliso kumuntfukatane nje nga-1531.—I-The Greenwood Encyclopedia of Latino Literature.

  •  I-Name Day. Incwadzi letsi Celebrating Life Customs Around the World—From Baby Showers to Funerals itsi: “I-name day ingumcimbi lowentelwa i-saint lokwetsiwe ngayo umntfwana ngemuva kwekubhajatiswa kwakhe nobe ngelilanga lavuma ngalo kukholwa kwakhe emcimbini lowentiwa esontfweni nasekakhulile.” Lencwadzi iyengeta itsi “ngalelilanga bantfu benta tintfo letentiwa emasontfweni.”

   Imicimbi yepolitiki nobe imikhankhaso yekutfutfukisa simo sekuphila. LiBhayibheli litsi: “Kuncono kukhosela kuJehova kunekwetsembela kubantfu.” (Tihlabelelo 118:8, 9) Kuze babalekele kubonakala ungatsi batsembele kubantfu kutsi bacatulule tinkinga temhlaba kunekutsembela kuNkulunkulu, BoFakazi BaJehova abahlanganyeli ekugubheni i-Youth Day nobe i-Women’s Day ngobe bafuna kukhombisa kutsi betsembele kuNkulunkulu kutsi acatulule tinkinga temhlaba kunekwetsembela kubantfu. Ngenca yesizatfu lesifanako, abayigubhi i-Emancipation Day nobe imicimbi lefana nayo. Kunaloko, betsembele eMbusweni waNkulunkulu kutsi utawucedza tinkinga telubandlululo.—KubaseRoma 2:11; 8:21.

•   Leliholide lenta lesinye sive sibonakale sincono yini kunaletinye?

   Simiso seliBhayibheli: “Nkulunkulu akakhetsi, kodvwa wonkhe umuntfu lomesabako nalowenta lokulungile uyemukeleka kuye ngisho nobe asive sini.”—Imisebenti 10:34, 35.

   Ngisho nobe BoFakazi BaJehova bawatsandza emave labahlala kuwo, kodvwa bayayibalekela imicimbi lephakamisa lesinye sive ngaletindlela letichazwe langentasi.

   Imicimbi lehlonipha umbutfo wemasotja. Kunekutsi asekele imphi, Jesu wayala balandzeli bakhe watsi: “Chubekani nitsandza titsa tenu futsi nithantazele labo labaniphatsa kabi.” (Matewu 5:44) Ngako-ke BoFakazi BaJehova abahlanganyeli emicimbini yekuhlonipha emasotja, njengalamaholide lalandzelako:

  •  I-Anzac Day. “Anzac umelela tidvumbu temasotja ase-Australia nase-New Zealand” futsi “i-Anzac Day, kancane kancane yashintjwa yabalilanga lekukhumbula labo lababulawa emphini.”—I-Historical Dictionary of Australia.

  •  I-Veterans Day (Remembrance Day, Remembrance Sunday, nobe i-Memorial Day). Lawa ngemaholide ekuhlonipha “emasotja labulawa nakunetimphi kulelo live.”—I-Encyclopædia Britannica.

   Imicimbi yekukhumbula umlandvo welive nobe inkhululeko yalo. Jesu watsi balandzeli bakhe ‘abasiyo incenye yelive njengobe nje naye angasiyo incenye yalo.’ (Johane 17:16) Ngisho nobe bakujabulela kwati ngemlandvo welive, BoFakazi BaJehova abahlanganyeli emibutsanweni lefana nalena lelandzelako:

  •  I-Australia Day. Ngekusho kwe-Worldmark Encyclopedia of Cultures and Daily Life, leliholide lekukhumbula “lilanga langa-1788 ngesikhatsi emasotja emaNgisi aphakamisa i-flag yawo futsi amemetela kutsi i-Australia seyikhululekile.”

  •  I-Guy Fawkes Day. Leli lilanga lekukhumbula kutsi Guy Fawkes nalabanye lebebasekela emaKatolika behluleka kubulala King James I nalamanye emalunga ahulumende wemaNgisi nga-1605.”—I-A Dictionary of English Folklore.

  •  I-Independence Day. Emaveni lamanyenti, leli lilanga lapho khona live ligubha inkhululeko yalo.”—I-Merriam-Webster’s Unabridged Dictionary.

•   Kwatiwa kutsi ngaleloholide bantfu abatiphatsi kahle yini?

   Simiso seliBhayibheli: “Sikhatsi lesengcile besenele kutsi nente lokutsandvwa bantfu balelive ngesikhatsi nichubeka nekona lokuhambisana nekwedzelela, tinkhanuko letingalawulwa, kunatsa kakhulu, imicimbi lengalawulwa, kucudzelana ngekunatsa, kanye nekukhonta tithico lokungakavumeleki.”—1 Phetro 4:3.

   Ngekuvumelana nalesimiso, BoFakazi BaJehova abahlanganyeli emicimbini lengalawuleki nobe lapho bantfu badzakwa khona. BoFakazi BaJehova bayakujabulela kuhlangana nebangani babo futsi nabafuna bangabunatsa tjwala, kodvwa ngalokusesilinganisweni. Benta konkhe lokusemandleni abo kuze balandzele seluleko seliBhayibheli lesitsi: “Ngisho nobe nidla, nobe ninatsa, nalapho nenta nobe yini lenye, tonkhe tintfo tenteleni kukhatimulisa Nkulunkulu.”—1 KubaseKhorinte 10:31.

   Ngako-ke BoFakazi BaJehova abahlanganyeli emikhosini lekhutsata kutiphatsa ngendlela lengafunwa liBhayibheli. Loku kufaka ekhatsi i-Jewish festival of Purim. Incwadzi i-Essential Judaism itsi ngisho nobe i-Purim beyigujwa kadzeni kuze kukhunjulwe kukhululwa kwemaJuda ngelikhulu lesi-5 B.C.E., kodvwa nyalo “emaJuda sewayente yafana nemkhosi we-Mardi Gras nobe i-Carnival.” Kulabanyenti labagubha lomkhosi, “loku kufaka ekhatsi kutsi emadvodza agcoke timphahla tebantfu besifazane (drag), kube nebudlova, kunatfwe kakhulu tjwala futsi kubangwe nemsindvo.”

 Cha. LiBhayibheli lifundzisa kutsi sitsandze bantfu futsi sihloniphe onkhe emalunga emndeni, ngisho nobe akuyiphi inkholo. (1 Phetro 3:1, 2, 7) Kuliciniso kutsi nangabe Fakazi waJehova ayekela kuhlanganyela emikhosini letsite, letinye tihlobo takhe tingatfukutsela, tive buhlungu nobe titive tilahliwe. Ngako-ke BoFakazi BaJehova labanyenti bayaticinisekisa tihlobo tabo kutsi solo basatitsandza futsi batichazele ngekuhlakanipha kutsi yini leyenta bangasahlanganyeli kuleyo mikhosi. Baphindze bativakashele letihlobo tabo ngalamanye emalanga, hhayi ngalamalanga lokugujwa ngayo lemikhosi.

 Cha. Bakholelwa kutsi umuntfu uyatikhetsela. (Joshuwa 24:15) BoFakazi BaJehova bahlonipha tonkhe tinhlobo tebantfu ngisho nobe tikuyiphi inkholo.—1 Phetro 2:17.