Yebo, boFakazi BaJehova bayasita nakuvela tehlakalo. Lusito lolunjalo siluniketa bantfu lababoFakazi BaJehova nalabangasibo. Loko kuvumelana nemBhalo waGalathiya 6:10 lotsi: “Asente lokuhle kubo bonkhe bantfu, ikakhulu kubendlu yaketfu yekukholwa.” Siphindze sente konkhe lesingakwenta kuze sivelane nalabatsintsekako futsi sibadvudvute ngemiBhalo.—2 Khorinte 1:3, 4.

 Ngemuva kwekuvela kwetehlakalo, bazalwane labadzala belibandla lokwenteke kulo letehlakalo benta imetamo yekutsintsana nabo bonkhe labatihlanganisa nelibandla kuze baciniseke kutsi baphephile baphindze babone lusito lokungenteka bayaludzinga. Labadzala babese batfumela umbiko weluhlolo lwabo nalasebakwentile ehhovisini leligatja lendzawo laboFakazi BaJehova.

 Nangabe kudzingeka lusito ngetulu kwemetamo leyentiwe ngulabazalwane, Sigungu Lesibusako saboFakazi BaJehova sibese sihlela kuniketa lolo sito. Lokwentiwako kuyafanana naloko lokwentiwa ngemaKhristu ekucala ngesikhatsi kunesomiso. (1 Khorinte 16:1-4) Lihhovisi leligatja laleyo ndzawo likhetsa bazalwane labatawakha emaKomidi Ekusita Nakuvele Tehlakalo. Umsebenti walamaKomidi kuhlela nekucondzisa lusito loludzingekako. BoFakazi labakuletinye tindzawo bayavolontiya basebentise sikhatsi sabo kanye netintfo labanato kuze basite.—Taga 17:17.

 Lenye yetindlela lokusetjentiswa ngayo iminikelo letfunyelwa emahhovisini emagatja aboFakazi BaJehova kusita bantfu labavelelwe tehlakalo. (Imisebenti 11:27-30; 2 Khorinte 8:13-15) Njengobe lomsebenti uchutjwa ngemavolontiya langabhadalwa, iminikelo isetjentiselwa kuphela kusita bantfu labavelelwe yinhlekelele kunekutsi kubhadalwe lamavolontiya. Siyisebentisa ngekucophelela iminikelo.—2 Khorinte 8:20.