Cha asikalishintji. Kunaloko, ngesikhatsi sitfola kutsi tinkholelo tetfu ativumelani ngalokuphelele neliBhayibheli, satishintja.

Ngaphambi kwekutsi sicale kuhumusha i-“New World Translation of the Holy Scriptures” nga-1950, sahlolisisa liBhayibheli. Sasebentisa onkhe emahumusho latfolakalako, sase sakha tinkholelo tetfu ngekuvumelana nawo. Ase sicoce ngetinkholelo letimbalwa BoFakazi BaJehova lebebasolo batikholelwa, bese uyatincumela kutsi tiyavumelana yini neliBhayibheli.

1. Lesikukholelwako: Nkulunkulu akasuye Mtsatfu Amunye. Magazini we-“Zion’s Watch Tower,” waJuly 1882 watsi: “Njengobe bafundzi betfu bati kutsi siyakholelwa kuJehova, kuJesu nasemoyeni longcwele, asivumelani ngalokuphelele nemfundziso lengakasekelwa emiBhalweni letsi kunaboNkulunkulu labatsatfu labangumuntfu munye, nobe kutsi Nkulunkulu munye wakha bantfu labatsatfu.”

   Loko lokushiwo liBhayibheli: “Jehova Nkulunkulu wetfu unguJehova munye.” (Dutheronomi 6:4, i-“The Holy Bible,” yaRobert Young) “Kodvwa kunaNkulunkulu munye, longuBabe, tonkhe tintfo letikhona ngaye, futsi natsi sivela kuye; kuneNkhosi yinye, Jesu Khristu, tonkhe tintfo letaba khona ngayo, natsi lesikhona ngayo.” (1 Khorinte 8:6, i-“American Bible Union Version”) Jesu watsi: “Babe mkhulu kunami.”—Johane 14:28, i-“Douay-Rheims Version.”

2. Lesikukholelwako: Kute kuhlushwa kwaphakadze esihogweni semlilo. Ucaphuna Roma 6:23 ku-“King James Version,” magazine waJune 1882 we-“Zion’s Watch Tower” lebewunesihloko lesitsi “Inkhokhelo Yesono Kufa,” watsi: “Lamavi acacile futsi amelula. Kuyamangalisa kutsi bantfu labanyenti labatsi liBhayibheli liliVi laNkulunkulu bachubeka baphikisana nalamavi laliciniso, futsi ngekuciniseka batsi bayakholelwa kutsi liBhayibheli litsi inkhokhelo yesono kuhlushwa kwaphakadze.”

   Loko Lokushiwo LiBhayibheli: “Umuntfu lowonako nguye loyakufa.” (Hezekeli 18:4, 20) Sijeziso sekugcina salabo labamelene naNkulunkulu asisiko kuhlushwa kwaphakadze, kodvwa ‘sikubhujiswa kwaphakadze.’—2 Thesalonika 1:9.

3. Lesikukholelwako: UMbuso waNkulunkulu unguhulumende sibili, awukho enhlitiyweni. Mayelana neMbuso waNkulunkulu, magazini waDecember 1881 we-“Zion’s Watch Tower” watsi: “Kumiswa kwaloMbuso kutawufaka ekhatsi kususwa kwayo yonkhe imibuso lesemhlabeni.”

   Loko Lokushiwo LiBhayibheli: “Ngesikhatsi salawo makhosi, Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.”—Danyela 2:44.

Cha, ngobe siyawasebentisa nalamanye emahumusho lamanyenti eliBhayibheli emsebentini wetfu wekufakaza. Ecinisweni, nanobe sibanika mahhala bantfu emakhophi e-LiHumusho Lemhlaba Lomusha njengencenye yeluhlelo lwekuchuba tifundvo teliBhayibheli letingabhadalisi, siphindze sikujabulele kufundza nalabo labakhetsa kusebentisa lamanye emahumusho eliBhayibheli.