BoFakazi BaJehova basebentisa emahumusho lamanyenti lehlukahluke nabadadisha liBhayibheli. Sinconota kusebentisa Lihumusho Lemhlaba Lomusha LemiBhalo Lengcwele, nangabe likhona kuletinye tilwimi, ngenca yekutsi lisebentisa ligama laNkulunkulu, lishaye emhlolweni futsi kulula kulicondza.

•   Kusetjentiswa kweligama laNkulunkulu. Labanye bashicileli beliBhayibheli behlulekile kuniketa ludvumo loyo lelimfanele. Sibonelo salokko kutsi lelinye lihumusho leliBhayibheli linemagama ebantfu labangetulu kwa-70, labafaka sandla ekukhicitweni kwalo. Nobe kunjalo lelihumusho laleliBhayibheli leli, lalikhipha ngalokuphele ligama leMbhali walo, lokunguJehova Nkulunkulu.

   Nobe kunjalo, Lihumusho Lemhlaba Lomusha libuyisele ligama laNkulunkulu etindzaweni letinyenti lapho belitfolakala khona emibhalweni yekucala, futsi emagama ebahumushi balo agcinwa ayimfihlo.

•   Kushaya emhlolweni. Akusiwo onkhe emaBhayibheli lahumushe umlayeto walo lobewusemibhalweni yekucala ngendlela leshaya emhlolweni. Sibonelo saloko kutsi, liBhayibheli leSiswati lelivamile lihumushe Matewu 23:15 ngalendlela, latsi: “Maye kini, bafundzisi bemtsetfo nebaFarisi! Batentisi! Ngobe niwela tilwandle, nidzabule nemave, kuze nidwebele enkholweni yenu abe munye wetive; nasenimtfolile, nimenta abe yindvodzana yeSihogo ngalokuphindziwe kunani.” Nobe kunjalo imiBhalo yekucala yasebentisa ligama lelitsi “Gehena, [ngalokuvamile lokusho ‘Sigodzi saHinomu’],” hhayi “Sihogo.” LeSigodzi saHinomu besiyindzawo besiiyindzawo leseceni kweJerusalema yasendvulo futsi bekuyindzawo yekulahla tibi ngesikhatsi Jesu aseselamhlabeni. Kuyacaca kutsi Jesu wasebentisa kute afanekise kubhujiswa phakadze kwebantfu labehlulelwe nguNkulunkulu. Kungenteka labahumushi basebentisa ligama lelitsi Sihogo ngenca yekukholelwa kutsi bantfu lababi bebatawuhlushwa phakadze eSihogweni semlilo. Kodvwa liBhayibheli alikusekeli loko. Kungako Lihumusho Lemhlaba Lomusha libeke lelivesi ngalendlela, latsi: “Maye kini nine tati temtsetfo nebaFarisi, batentisi! Ngobe nidzabula lwandle kanye nemave kute nigucule bantfu kutsi bangene enkholweni yenu, bese nasebagucukile nibente bafanelwe yiGehena kwendlula nine.”

•   Kulula kulicondza. LiBhayibheli lelihunyushwe kahle kufanele lishaye emhlolweni futsi kubelula kulicondza. KubaseRoma 12:11, umphostoli Pawula longuKhristu wasebentisa inkhulumo ngalokuvamile lesho “kubila emoyeni.” Njengobe lenkhulumo ingayakhi ingcondvo elulwimini lweSiswati lwalamuhla, Lihumusho Lemhlaba Lomusha libeka lelivesi ngendlela lokulula kulicondza. Litsi emaKhristu kufanele “avutse emoyeni.”

 Ngetulu kwekusebetnisa ligama laNkulunkulu, kushaya emhlolweni, kanye nekucondzakala kalula, kunalenye intfo lenhle ngeLihumusho Lemhlaba Lomusha: Litfolakala mahhala. Loku kwenta kusi tigidzigidzi tebantfu titfole liBhayibheli ngelulwimi labalumunya, lokungenteka bebangeke baze bakhone kutitsengela lona.