1-2. Yini leyenta Jesu wacindzeteleka?

JESU bekacindzeteleke kakhulu ngelilanga lafa ngalo. Bantfu lababi bebatambulala kabuhlungu. Jesu bekangakhatsateki nje ngekutsi utawufa masinyane. Kodvwa bekakhatsatekile ngobe bekamtsandza kakhulu Babe wakhe futsi afuna kumjabulisa. Jesu bekati kutsi nangabe ahlala etsembekile ngisho noma bekatawubhekana netinkinga, bekatawungcwelisa ligama laJehova. Bekabatsandza bantfu futsi bekati kutsi batawuba nelitsemba lekuphila phakadze kuphela nangabe ahlala etsembekile kuJehova.

² Jesu bekanekuthula ngisho noma bekacindzeteleke kakhulu. Watsi kubafundzi bakhe: “Nginishiya nekuthula.” (Joh. 14:27) Jesu ‘bekanekuthula kwaNkulunkulu,’ lokukuthula lokuletfwa kuba nebuhlobo lobuhle naJehova. Lokuthula kwenta kutsi Jesu angakhatsateki.—Fil. 4:6, 7.

3. Sitawucoca ngani kulesihloko?

³ Kute kitsi loyoke ahlupheke ngendlela Jesu lahlupheka ngayo, kodvwa bonkhe balandzeli baJesu batawuba nato tinkinga. (Mat. 16:24, 25; Joh. 15:20) Njengobe kwenteka kuJesu, natsi singativa sicindzetelekile ngaletinye tikhatsi. Yini lesingayenta kute singakhatsateki kakhulu bese siba bete kuthula kwengcondvo? Ase sicoce ngetintfo letintsatfu Jesu latenta nakenta umsebenti wekushumayela kanye nendlela lesingamlingisa ngayo nangabe sinetinkinga.

4. Ucabanga nga-1 Thesalonika 5:17, niketa tibonelo kute ukhombise kutsi Jesu wathantaza kanyenti ngelilanga lafa ngalo?

⁴ Fundza 1 Thesalonika 5:17. Ngelilanga lafa ngalo, Jesu  wathantaza tikhatsi letinyenti. Ngesikhatsi acalisa umkhosi wekukhumbula kufa kwakhe, wathantazela sinkhwa neliwayini. (1 Khor. 11:23-25) Ngaphambi kwekutsi bahambe endzaweni labebambele kuyo umkhosi weliPhasika, Jesu wathantaza kanye nebafundzi bakhe. (Joh. 17:1-26) Ngesikhatsi yena kanye nebafundzi bakhe bafika eNtsabeni Yemincuma, Jesu wathantaza kanyenti ngalobo busuku. (Mat. 26:36-39, 42, 44) Ngaphambi kwekutsi afe, Jesu wathantaza. (Luk. 23:46) Wathantaza kuJehova wamtjela konkhe lebekwenteka ngalelo langa.

5. Yini leyenta baphostoli behluleka kuba nesibindzi?

⁵ Lokunye lokwenta Jesu wakhona kubeketelela tinkinga lebekabhekene nato kutsi bekametsemba Babe wakhe, futsi loko wakwenta ngekutsi athantaze kuye ngaso sonkhe sikhatsi. Ngakulolunye luhlangotsi, baphostoli behluleka kuphikelela emthantazweni kulobo busuku. Loko kwabenta bangakhoni kuba nesibindzi nabavivinywa. (Mat. 26:40, 41, 43, 45, 56) Nasibhekana netinkinga sitawukhona kuhlale setsembekile nangabe silingisa sibonelo saJesu “sekuchubeka sithantaza.” Yini lesingayithantazela?

6. Kukholwa kutasisita njani sihlale sinekuthula?

⁶ Singathantaza kuJehova simcele ‘acinise kukholwa kwetfu.’ (Luk. 17:5; Joh. 14:1) Siyakudzinga kukholwa lokucinile ngobe Sathane utawuvivinya bonkhe balandzeli baJesu. (Luk. 22:31) Kukholwa kungasisita njani kutsi sihlale sinekuthula ngisho noma sinetinkinga? Nangabe sente konkhe lokusemandleni etfu kute silwisane nenkinga letsite, kukholwa kutawusenta sishiyele tintfo kuJehova. Sitawuba nekuthula kwengcondvo nangabe  setsemba kutsi Jehova utatilungisa kancono tinkinga tetfu kunatsi.—1 Phet. 5:6, 7.

7. Yini loyifundzako kuloko lokushiwo nguRobert?

⁷ Umthantazo utasisita kutsi sihlale sinekuthula ngisho noma sibhekana natiphi tinkinga. Cabanga ngesibonelo saRobert loseminyakeni yabo-80 futsi longulomdzala welibandla lowetsembekile. Utsi: “Seluleko lesisemBhalweni waFiliphi 4:6, 7 singisitile kutsi ngibeketelele tinkinga letinyenti ekuphileni kwami. Benginetinkinga tetimali. Ngike ngalahlekelwa nalilungelo lekuba ngulomdzala welibandla.” Yini leyasita Robert kutsi ahlale anekuthula? Utsi: “Ngithantaza ngekushesha nje nangitiva ngicindzetelekile. Ngiba nekuthula nangithantaza kanyenti ngalokusuka enhlitiyweni.”

8. Ngekusho kwemBhalo waJohane 8:29, ngusiphi lesinye sizatfu lesenta Jesu waba nekuthula?

⁸ Fundza Johane 8:29. Ngisho nobe Jesu bekahlushwa, bekanekuthula ngobe bekati kutsi Babe wakhe uyajabula ngaye. Bekamlalela ngisho noma bekumatima kwenta njalo. Bekamtsandza Babe wakhe futsi kumkhonta bekuta kucala ekuphileni kwakhe. Ngaphambi kwekutsi ete emhlabeni, Jesu ‘bekaSisebenti Lesiyingcweti’ saNkulunkulu. (Taga 8:30, NW) Ngesikhatsi Jesu asemhlabeni, bekatimisela ekufundziseni labanye ngaBabe wakhe. (Mat. 6:9; Joh. 5:17) Jesu bekajabula kakhulu nakenta lomsebenti.—Joh. 4:34-36.

9. Kuba matasatasa emsebentini wekushumayela kungasisita njani kutsi sihlale sinekuthula?

 ⁹ Singamlingisa Jesu ngekulalela Jehova “nangekuba nalokunyenti kwekukwenta emsebentini weNkhosi.” (1 Khor. 15:58) Nangabe “simatasatasa” emsebentini wekushumayela, siba nembono lokahle ngetinkinga lesinato. (Imis. 18:5) Nasi sibonelo, bantfu lesibatfola ensimini banetinkinga letinkhulu kakhulu kunetetfu. Kodvwa nabafundza ngaJehova futsi basebentisa seluleko sakhe ekuphileni, bacala kujabula. Sonkhe sikhatsi nasikubona loko kwenteka siyaciniseka kutsi Jehova utasinakekela. Loko kusisita kutsi sibe nekuthula. Lomunye dzadze lobekasolo alwisana nekutiva angasilutfo futsi acindzetelekile kuphila kwakhe konkhe, ubonile kutsi loko kuliciniso. Utsi: “Nangabe ngimatasa ngenta umsebenti wekushumayela ngitiva ngijabulile futsi ngiyakhona kulawula indlela lengitiva ngayo. Ngicabanga kutsi loko kwentiwa kutsi ngitiva ngisondzelene kakhulu naJehova nangishumayela.”

10. Yini loyifundzako kulokushiwo nguBrenda?

¹⁰ Cabanga ngesibonelo sadzadze Brenda. Yena kanye nendvodzakati yakhe bebanesifo lesihlasela umgogodla nemitsambo yebucopho, lokutsiwa yi-multiple sclerosis. Brenda akakhoni kutihambela, ngako usebentisa i-wheelchair. Ushumayela emtini ngemuti nangabe akhona, kodvwa sikhatsi lesinyenti ushumayela ngekutsi abhale tincwadzi. Utsi: “Ngesikhatsi ngemukela kutsi angeke ngikhone kushintja simo lengikuso, ngakutfola kumelula kuhlala nginake umsebenti wekushumayela. Ecinisweni, kushumayela kungenta ngingacabangi ngetinkinga lenginato. Nginaka kakhulu kusita bantfu lengibashumayelako. Nangishumayela ngihlala ngikhumbula litsemba lenginalo ngelikusasa.”

11-13. (a) Baphostoli kanye nalabanye bantfu bakhombisa njani kutsi bebabangani baJesu beliciniso? (b) Bangani baJesu bamenta wativa njani?

¹¹ Baphostoli baJesu labetsembekile bakhombisa kutsi bebabangani baJesu beliciniso ngaso sonkhe sikhatsi lebekenta ngaso umsebenti wekushumayela. Bebasibonelo lesihle sekwenta loko lokushiwo ngumBhalo weTaga lotsi: “Labanye bangani basondzela kakhulu kwengca banakenu bengati.” (Taga 18:24) Bangani labanjalo bebaligugu kuJesu. Ngesikhatsi enta umsebenti wekushumayela, kute ngisho namunye umnakabo lebekakholelwa kuye. (Joh. 7:3-5) Tihlobo takhe taze tacabanga kutsi sewuyahlanya. (Mak. 3:21) Ngalokwehlukile, ngebusuku bangephambi kwekutsi afe, Jesu watsi kubafundzi bakhe: “Nine benisolo ninami ekulingweni kwami.”—Luk. 22:28.

¹² Tikhatsi letinyenti baphostoli bebamdvumata Jesu, kodvwa bekangawanaki emaphutsa abo kunaloko bekanaka kutsi bayakholelwa kuye. (Mat. 26:40; Mak. 10:13, 14; Joh. 6:66-69) Ngebusuku bangaphambi kwekutsi abulawe, Jesu watsi kulabaphostoli bakhe labetsembekile: “Nginibita ngekutsi nibangani bami ngobe tonkhe tintfo lengitive kuBabe nginitjele tona.” (Joh. 15:15) Asingabati kutsi bangani baJesu bamkhutsata kakhulu. Jesu wajabula kakhulu ngekutsi bangani bakhe bamsita kutsi ente umsebenti labewunikwe nguNkulunkulu.—Luk. 10:17, 21.

¹³ Jesu bekanabo labanye bangani labafaka ekhatsi emadvodza nebafati labamsita wenta umsebenti wekushumayela kanye naletinye tintfo letibalulekile. Labanye bamemukela emakhaya abo kute badle naye. (Luk. 10:38-42; Joh. 12:1, 2) Labanye  bebahamba naye futsi basebentisa tintfo tabo kute bamsite. (Luk. 8:3) Jesu bekanebangani labakahle ngobe naye bekangumngani lokahle. Wabentela tintfo letinhle futsi bekangalindzeli kutsi bente tintfo lebebangeke bakhone kutenta. Jesu bekete sono, kodvwa bekakwemukela kusitwa bangani bakhe lebebanesono. Asingabati kutsi bamsita waba nekuthula.

14-15. Singabakha njani bangani labakahle, futsi bangasisita njani?

¹⁴ Bangani labakahle batasisita sihlale setsembekile kuJehova. Indlela lekahle yekwakha bangani sibili kutsi nawe ube ngumngani lokahle. (Mat. 7:12) Nasi sibonelo, liBhayibheli lisikhutsata kutsi sisebentise sikhatsi kanye nemandla etfu kute sisite labanye, ikakhulukati labo ‘labeswele.’ (Ef. 4:28) Ungacabanga ngemuntfu losebandleni lokulo longamsita. Ungakhona yini kupha umndeni lonetinkinga tetimali kudla? Nangabe ukwati kusebentisa i-jw.org^® noma i-JW Library^® application, ungakhona yini kusita labanye labasebandleni lokulo kutsi nabo bakhone kuyisebentisa? Nangabe sinaka kakhulu kusita labanye sitawuhlale sijabulile.—Imis. 20:35.

¹⁵ Bangani lesitawuba nabo batasisekela nangabe sinetinkinga futsi batasisita sihlale sinekuthula. Elihu walalela ngesikhatsi Jobe akhuluma ngetilingo labehlangabetana nato. Ngendlela lefanako bangani betfu bayasisita nangabe basilalela ngesineke nasibachazela indlela lesitiva ngayo. (Jobe 32:4) Akukafaneli silindzele kutsi bangani betfu basentele tincumo, kunaloko sitawukhombisa kutsi sihlakaniphile ngekutsi silalele teluleko tabo letisekelwe  eBhayibhelini. (Taga 15:22) Njengobe iNkhosi Davide yatitfoba futsi yemukela lusito lwebangani bayo, natsi akukafaneli sitikhukhumete futsi singalwemukeli lusito lesilunikwa bangani betfu nangabe siludzinga. (2 Sam. 17:27-29) Ecinisweni bangani labanjalo batipho lesitiphiwe nguJehova.—Jak. 1:17.

16. Ngekusho kwembhalo waFiliphi 4:6, 7, nguyiphi indlela lekuphela kwayo yekutfola kuthula? Chaza.

¹⁶ Fundza Filiphi 4:6, 7. Kungani Jehova asitjela kutsi singaba nekuthula lasinika kona “ngaKhristu Jesu”? Kungoba lokuthula lokuhlala njalo singatfola nangabe sinekucondza futsi siyetsemba indzima letawudlalwa nguJesu ekufezeni intsandvo yaNkulunkulu. Nasi sibonelo, tono tetfu tingatsetselelwa ngenca yesisekelo senhlawulo yaJesu Khristu. (1 Joh. 2:12) Loko kusenta sidvudvuteke. NjengeNkhosi yeMbuso waNkulunkulu, Jesu utawulungisa wonkhe umonakalo lobangelwe nguSathane kanye nalelive lelibi. (Isa. 65:17; 1 Joh. 3:8; Semb. 21:3, 4) Lelo litsemba lelihle lesilibuke ngalabovu. Nanobe Jesu asinikete umsebenti lomatima, unatsi, futsi uyasisekela kulamalanga ekugcina. (Mat. 28:19, 20) Loko kusicinisa kakhulu! Injabulo, litsemba, kanye nesindzi kungasisita sibe nekuthula kwengcondvo.

17. (a) Yini lengasita umKhristu ahlale anekuthula? (b) UmBhalo waJohane 16:33, utsi yini lesitawukhona kuyenta?

¹⁷ Ungahlala njani unekuthula kwengcondvo ngisho noma unetinkinga letimatima? Ngekutsi wente tintfo Jesu bekatenta. Kwekucala, thantaza, futsi uphikelele emthantazweni ngisho noma kungentekani. Kwesibili, lalela Jehova, uphindze ushumayele ngemdlandla ngisho noma kulukhuni kwenta njalo. Kwesitsatfu, nangabe ubhekene netinkinga, lwemukele lusito lolutfola kubangani labakahle. Kuthula kwaNkulunkulu kutawubese kulondza ingcondvo kanye nenhlitiyo yakho. NjengaJesu, utatincoba tonkhe tilingo longahlangabetana nato.—Fundza Johane 16:33.