“LaboFakazi bebangagcini nje ngekuba nemusa kubantfu, kodvwa bebanemusa nakuletinja tami. Ngalelinye lilanga, Elaine, lebekeme eceleni kwalencola wapha letinja tami ema-biscuits. Ngemuva kwaloko, njalo nasisondzela ngakulencola, letinja tami betiya kulaboFakazi kuze tiyotfola ema-biscuits.

“Kwendlula tinyanga solo kwenteka loku. Letinja betiwatsandza lama-biscuits kantsi nami bengikutsandza kucoca kafishane nalaboFakazi. Kodvwa bengingafuni kucoca nabo sikhatsi lesidze. Bengineminyaka lengetulu kwalengu-70 futsi bengingatati kahle tinkholelo tabo. Ngenca yekutsi bengidvunyatwe kakhulu ngemasontfo emaPhrothestani, besengincume kutsi ngidadishe liBhayibheli ngingedvwa.

“Ngaleso sikhatsi, ngabona nalabanye boFakazi etincenyeni letehlukene talelidolobha beme eceleni kwetincola tabo. Nabo bebahlale banebungani. Bebahlale bayiphendvula ngeliBhayibheli imibuto yami futsi loko kwangenta ngabetsemba kakhulu.

“Ngalelinye lilanga, Elaine wangibuta watsi: ‘Uyakholelwa yini kutsi tilwane tisipho lesivela kuNkulunkulu?’ Ngamphendvula ngatsi: ‘Yebo!’ Elaine wabese ungifundzela Isaya 11:6-9. Kusukela lapho, ngafuna kufundza lokunyenti ngeliBhayibheli kodvwa bengisolo ngingatifuni tincwadzi taboFakazi.

“Ngemuva kwaloko, mine na-Elaine nendvodza yakhe, Brent, besicoca kafishane ngetindzaba lebetingisita. Bangikhutsata kutsi ngifundze incwadzi yaMatewu kuya encwadzini Yemisebenti kuze ngibone kutsi kusho kutsini kulingisa Khristu. Ngakwenta loko. Ngemuva kwaloko, ngavuma kudadisha liBhayibheli naBrent na-Elaine. Lapho bekusemkhatsini wa-2016.

“Bengihlale ngikubuke ngalabovu kudadisha nabo liBhayibheli njalo ngeliviki nekuya emihlanganweni eHholweni leMbuso. Bengijabule kakhulu ngekufundza loko lokushiwo liBhayibheli. Ngemuva kwemnyaka, ngabhajatiswa. Nyalo ngineminyaka lengu-79, futsi ngibonga kakhulu kutsi ngiyitfolile inkholo yeliciniso. Jehova ungibusise kakhulu ngekungenta lilunga lemndeni wakhe.”