KUKHATSATEKA kuyayicindzetela inhlitiyo yemuntfu. (Taga 12:25) Uke wabhekana yini nesimo lesikukhatsatako? Uke weva yini ngatsi simo lesitsite lobhekene naso singetulu kwemandla? Nangabe kunjalo, awusiwedvwa. Labanyenti betfu bacindzetelekile futsi bakhatsatekile ngenca yetizatfu letehlukene. Sibonelo nje, labanye bebanakekela lilunga lemndeni leligulako, labanye bashonelwe ngumuntfu labamtsandzako kantsi labanye babhekene nenhlekelele yemvelo. Kodvwa yini lengasisita kuze sibhekane nekukhatsateka? *

Kunyenti lesingakufundza esibonelweni seNkhosi Davide lokungasisita sibhekane nekukhatsateka. Yabhekana netinkinga letinyenti letimatima, futsi kuphila kwayo bekuhle kuba sengotini. (1 Sam. 17:34, 35; 18:10, 11) Yini leyasita Davide kutsi abhekane nekukhatsateka? Singasilingisa njani sibonelo sakhe?

Davide wabhekana netinkinga letinyenti ngasikhatsi sinye. Cabanga nje ngaloko lokwenteka ngesikhatsi iNkhosi Sawula ifuna kumbulala. Ngesikhatsi Davide nemadvodza lebekanawo abuya kuyokulwa bamangala kukhandza sitsa sabo sebe tintfo tabo, sashisa emakhaya abo, saphindze satfumba nemindeni yabo. Wenta njani Davide? “Davide nalamadvodza labehamba nawo bacala kudzindza sililo, baze baphelelwa ngemandla ekukhala.” Lokwenta Davide wacindzeteleka kakhulu kutsi lamadvodza bekawetsemba “abefuna kumgcoba ngematje.” (1 Sam. 30:1-6) Nyalo Davide abebhekene netinkinga letintsatfu letinkhulu ngasikhatsi sinye: Umndeni wakhe bewusengotini, bekangati kutsi lamadvodza atambulala mbamba yini, futsi iNkhosi Sawula beyimcosha. Cabanga kutsi Davide abekhatsateke kangakanani!

Yini Davide labese uyayenta? Ngekushesha “watfola emandla ngekusitwa nguJehova Nkulunkulu wakhe.” Kwenteka njani loko? Davide abevame kuthantaza kuJehova kuze acele lusito futsi abezindla ngendlela Jehova abemsite ngayo esikhatsini lesendlulile. (1 Sam. 17:37; Hla. 18:2, 6) Davide wabona kutsi kufanele acele sicondziso lesivela kuJehova, ngako wacela umphristi Abhiyatha kutsi ‘amnikete sidziya’ kuze Davide atobuta Jehova kutsi ente njani. * Ngemuva kwekutfola sicondziso lesivela kuJehova, Davide wasisebentisa ngekushesha. Umphumela waloko waba kutsi Jehova abusise yena nemadvodza lebekahamba nawo futsi bakhulula imindeni yabo, babuya netintfo tabo. (1 Sam. 30:7-9, 18, 19) Utinakile yini tintfo letintsatfu Davide latenta? Wathantaza kuJehova wacela kutsi amsite, wacabangisisa ngaloko Jehova bekamentele kona esikhatsini lesendlulile, futsi wenta lokutsite kuze alalele sicondziso saJehova. Singamlingisa njani Davide? Asesicoce ngetindlela letintsatfu.

1. Thantaza. Ngaso sonkhe sikhatsi nasikhatsatekile singathantaza kuJehova simcele asisite futsi asiphe nekuhlakanipha. Kuthantaza kuJehova simtjele konkhe lokusenhlitiyweni yetfu kungasisita sitive sincono. Singasho umthantazo lomfisha ngenhlitiyo nangabe nguloko lesikukhonako ngaleso sikhatsi. Ngaso sonkhe sikhatsi nasetsembela kuJehova kutsi asisite, sisuke silingisa Davide lowatsi:  “Jehova ulidvwala lami nendzawo yami yekukhosela futsi nguye longisindzisako. Nkulunkulu wami ulidvwala lami, ngikhosela kuye.” (Hla. 18:2) Kuyasita yini vele kuthantaza? Lomunye dzadze lolihlahlandlela lokutsiwa nguKahlia utsi: “Ngemuva kwekuthantaza, ngitiva nginekuthula. Umthantazo uyangisita kutsi ngicabange ngendlela Jehova lacabanga ngayo, futsi ngimetsembe kakhulu.” Ngako siyabona kutsi umthantazo usipho lesinemandla lesivela kuNkulunkulu lesisisita sibhekane nekukhatsateka.

2. Cabangisisa. Nawucabanga ngaloko lokwentile ekuphileni kwakho, tikhona yini tinkinga lokhonile kutibeketelela ngenca yekusitwa nguJehova? Nasicabangisisa ngendlela Jehova latisite ngayo tikhonti takhe tangesikhatsi lesendlulile, nalasisite ngayo lamuhla loko kuyasisita kutsi sibe nekuthula futsi simetsembe kakhulu. (Hla. 18:17-19) Lomunye lomdzala welibandla lokutsiwa nguJoshua utsi: “Ngineluhla lwetintfo lengatithantazela futsi taphendvulwa nguNkulunkulu. Loko kungisite ngakhumbula tikhatsi lapho khona ngacela lokutsite kuJehova futsi wanginiketa loko bengikudzinga.” Nasicabangisisa ngaloko Jehova lasentele kona esikhatsini lesendlulile sitfola emandla ekubeketelela kukhatsateka.

3. Yenta lokutsite. Ngaphambi kwekutsi sincume kutsi yini lesitayenta esimeni lesitsite, singafuna sicondziso lesingasetsemba eVini laNkulunkulu. (Hla. 19:7, 11) Labanye batfola kutsi nabacwaninga ngelivesi lelitsite, basheshe babone kutsi lisebenta njani ekuphileni kwabo. Lomunye lomdzala welibandla lokutsiwa nguJarrod utsi: “Kucwaninga kungisita ngifundze lokunyenti ngelivesi lelitsite futsi kungenta ngikucondze naloko Jehova langitjela kona. Loko kungisita kutsi ngikwetsembe kakhulu loko lengikufundzako futsi ngilalele nesicondziso sakhe.” Nasifuna sicondziso saJehova emiBhalweni futsi sisisebentisa, sitawukhona kubhekana nekukhatsateka.

Davide wabona kutsi kuze akhone kubhekana nekukhatsateka, bekakudzinga kusitwa nguJehova. Wajabula kakhulu ngekutsi Jehova bekamsita. Waze watsi: “Ngingakhona kucanca lubondza ngemandla lavela kuNkulunkulu. Nkulunkulu weliciniso nguye longinika emandla.” (Hla. 18:29, 32) Singahle sibone ngatsi tinkinga tetfu tinkhulu kakhulu kutsi singatibeketelela. Kodvwa ngelusito lwaJehova, singabeketelela nobe ngabe nguyiphi inkinga lematima! Nasithantaza kuJehova sicela kutsi asisite, sicabangisisa ngako konkhe lasentele kona esikhatsini lesendlulile, futsi sisebentisa sicondziso sakhe, singaciniseka kutsi utawusipha emandla lesiwadzingako kanye nekuhlakanipha kuze sikhone kubeketelela kukhatsateka lesibhekana nako!