1. Ngumiphi imigomo lesingatibekela yona ekukhonteni Nkulunkulu?

 NJENGOBE singemaKhristu eliciniso, simtsandza kakhulu Jehova futsi sifuna kumentela lokuncono kakhulu. Kodvwa nasifuna kwenta loko, kufanele sitibekele imigomo ekukhonteni Nkulunkulu lenjengekuba nebuntfu bebuKhristu, kufundza emakhono lalusito, nekubuka tindlela lesingasita ngayo labanye. *

2. Yini leyenta kudzingeke kutsi sitibekele imigomo ekukhonteni Nkulunkulu futsi setame kamatima kuyifinyelela?

² Yini lesenta sifune kutfutfuka endleleni lesikhonta ngayo Jehova? Sizatfu lesiyinhloko kutsi sifuna kujabulisa Babe wetfu wasezulwini lositsandzako. Jehova uyajabula nakasibona sisebentisa emakhono etfu kuze sente lokunyenti emsebentini wakhe. Ngetulu kwaloko, sifuna kutfutfuka endleleni lesikhonta ngayo Jehova kuze sitawukhona kubasita kakhudlwana bazalwane betfu nabodzadze. (1 Thes. 4:9, 10) Ngisho nobe sesikhonte Jehova sikhatsi lesidze kanganani, sonkhe singatfutfuka ekumkhonteni. Asesibone kutsi singakwenta njani loku.

3. Njengobe kubhalwe ku-1 KuThimothi 4:12-16, yini umphostoli Pawula lakhutsata Thimothi kutsi ayente?

³ Ngesikhatsi umphostoli Pawula abhalela Thimothi incwadzi yekucala, Thimothi besekanesikhatsi angulomdzala welibandla.  Nobe kunjalo, Pawula wamkhutsata kutsi achubeke atfutfuka ekukhonteni Nkulunkulu. (Fundza 1 KuThimothi 4:12-16.) Njengobe ucabanga ngalamavi aPawula, utawunaka kutsi bekafuna Thimothi atfutfuke nganati tindlela letimbili: ngekutsi atfutfukise buntfu bakhe bebuKhristu lobufaka ekhatsi lutsandvo, kukholwa, kuba msulwa kanye nekutfutfukisa likhono lakhe lekufundzela linyenti, lekukhutsata labanye nelekufundzisa. Sinesibonelo saThimothi engcondvweni, asesibone kutsi singatibekela njani imigomo lesingakhona kuyifinyelela lengasisita kutsi sitfutfuke ekukhonteni Nkulunkulu. Sitawubese sicoca ngaletinye tindlela letingasisita kutsi sente lokunyenti emsebentini wekushumayela.

4. Ngekusho kwembhalo waKubaseFiliphi 2:19-22, yini leyenta Thimothi waba sikhonti saJehova lesilusito?

⁴ Yini leyasita Thimothi waba sikhonti saJehova lesilusito? Buntfu bakhe lobuhle bebuKhristu. (Fundza KubaseFiliphi 2:19-22.) Kuloko Pawula lakusho ngaThimothi siyabona kutsi Thimothi bekatfobekile, etsembekile, akhutsele futsi nalabanye bebangametsemba. Bekabatsandza bazalwane bakhe nabodzadze futsi anendzaba nabo. Ngenca yaloko, Pawula bekamtsandza Thimothi futsi bekangangabati kumnika imisebenti lelukhuni. (1 Khor. 4:17) Ngendlela lefanako, nangabe natsi setama kuba nebuntfu lobuhle, Jehova utasitsandza futsi sitawuba lusito kakhulu kubazalwane betfu nakubodzadze.—Hla. 25:9; 138:6.

5. (a) Yini longayenta kuze utibekele umgomo longakusita kutsi utfutfukise buntfu bebuKhristu? (b) Njengobe kuvetwe kulesitfombe, yini leyentiwa ngulodzadze losemusha kuze afinyelele umgomo wekuba neluvelo kakhudlwana?

⁵ Tibekele umgomo lotsite. Thantaza futsi ucabange ngekutsi yini lofuna kuyitfutfukisa ebuntfwini bakho. Khetsa buntfu lofuna kubutfutfukisa. Nasi sibonelo, ungetama yini kuba neluvelo kakhudlwana nobe ube nesifiso lesikhulu sekusekela bazalwane bakho nabodzadze? Nobe ungetama yini kwakha kuthula kakhudlwana nalabanye futsi ubacolele kakhudlwana? Kungakusita kubuta umngani lometsembako kutsi ungatfutfukisa kuphi.—Taga 27:6.

6. Yini longayenta kuze ukhone kuba nebuntfu lobutsite?

⁶ Yenta lokutsite kuze ufinyelele lomgomo wakho. Ungakwenta njani loko? Lenye  indlela kutsi ufundze ngalobuntfu lofuna kubutfutfukisa. Asesitsi ufuna kubacolela kakhudlwana labanye. Ungacala ngekufundza ngetibonelo letiseBhayibhelini talabo lababacolela labanye nalabo labangazange babacolele futsi uzindle ngato. Cabanga ngesibonelo saJesu. Wabacolela labanye. (Luk. 7:47, 48) Bekangawanaki emaphutsa abo kodvwa bekanaka loko labangakhona kukwenta. Ngalokwehlukile, baFarisi bangesikhatsi saJesu ‘bebababukela phansi labanye bantfu.’ (Luk. 18:9) Ngemuva kwekucabanga ngaletibonelo, tibute: ‘Yini lengiyibona kulabanye? Ngubuphi buntfu babo lengivame kubunaka?’ Nangabe ukutfola kumatima kucolela lotsite, yetama kubhala luhla lwebuntfu bakhe lobuhle. Ngemuva kwaloko tibute: ‘Yini Jesu layibonako nakabuka lomuntfu? Angamcolela yini?’ Nasenta njalo, ingashintja indlela lesicabanga ngayo. Ekucaleni kungahle kube matima kucolela umuntfu losiphetse kabi. Kodvwa nasichubeka setama, singagcina simcolele.

7. Ngekuvumelana neTaga 22:29, Jehova utisebentisa njani tisebenti letinelikhono lamuhla?

⁷ Lomunye umgomo longatibekela wona kufundza likhono lelilusito. Cabanga kutsi kudzingeka tisebenti letinyenti kanganani kuze kwakhiwe takhiwo taseBethel, emaHholwa eMhlangano nemaHholwa eMbuso. Linyenti laletisebenti lifundze lamakhono ngekusebenta nebazalwane lasebanesikhatsi benta lomsebenti. Njengobe kuvetwe kulesitfombe, labazalwane nalabodzadze bafundza emakhono ladzingekako kuze banakekele emaHholwa eMhlangano nemaHholwa eMbuso. Jehova Nkulunkulu, ‘loyiNkhosi yaphakadze’ naKhristu Jesu, ‘loyiNkhosi . . . yemakhosi,’ bafeza lokunyenti ngaletindlela kanye naletinye basebentisa tisebenti letinelikhono. (1 Thim. 1:17; 6:15; fundza Taga 22:29.) Sifuna kusebenta kamatima futsi sisebentise emakhono etfu kuze sidvumise Jehova hhayi kutsi sitifunele tsine ludvumo.—Joh. 8:54.

8. Ungabona njani kutsi nguliphi likhono longalifundza?

⁸ Tibekele umgomo lotsite. Nguliphi likhono longalifundza? Ungabuta labadzala belibandla labasebandleni lokulo nobe umbonisi wesigodzi lokuso kutsi nguliphi likhono longalifundza. Nangabe batsi ungatfutfukisa likhono lakho lekukhuluma nelekufundzisa, bacele basho ngalokucondzile kutsi ngukuphi lakufanele utfutfukise khona. Ngemuva kwaloko, yetama kamatima kuze utfutfukise. Ungakwenta njani loko?

9. Yini longayenta kuze ufinyelele umgomo wakho wekufundza likhono lelitsite?

⁹ Yenta lokutsite kuze ufinyelele lomgomo wakho. Ase sitsi ufuna kutfutfukisa likhono lakho lekufundzisa. Ungadadisha bhukwana lotsi Timisele Ekufundzeni Nasekufundziseni. Nawunenkhulumo emhlanganweni losekhatsi neliviki, ungacela umzalwane lonelikhono kutsi alalele lenkhulumo yakho ngaphambi kwekutsi uyibeke futsi asho lapho ungatfutfukisa khona. Ungagcini nje ngekwatiwa ngekutsi unelikhono, kodvwa yatiwa nangekutsi uyatimisela nekutsi labanye bangakwetsemba.—Taga 21:5; 2 Khor. 8:22.

10. Shano sibonelo lesikhombisa kutsi ungalifundza njani likhono lelitsite.

¹⁰ Kutsiwani nangabe lelikhono lofuna kuba nalo ute ngekwemvelo? Ungapheli emandla! Lomunye umzalwane lokutsiwa nguGarry bekangakhoni kufundza kahle. Utsi bekahlazeka nakafundza emihlanganweni yelibandla kodvwa wachubeka etama kutfutfuka. Nyalo utsi ngenca yekuceceshwa lakutfola, sewuyakhona  kubeka tinkhulumo emaHholweni eMbuso, emihlanganweni yesigodzi neyesifundza!

11. NjengaThimothi, yini lengasisita kutsi sikhone kwenta naleminye imisebenti?

¹¹ Thimothi waba sikhulumi lesihle yini nobe waba ngumfundzisi lonelikhono? LiBhayibheli alisho. Kodvwa siyaciniseka kutsi Thimothi watfutfuka emsebentini laniketwa wona njengobe bekalalela seluleko saPawula. (2 Thim. 3:10) Ngendlela lefanako, nangabe setama kutfutfukisa emakhono etfu, sitawukhona kwenta naleminye imisebenti.

12. Bakusite njani labanye?

¹² Sonkhe iyasisita imisebenti leyentiwa ngulabanye. Nasisetibhedlela, siyajabula nasivakashelwa bazalwane labangemalunga eKomidi Yekubonisana Netibhedlela nobe labangemalunga eLicembu Lalabo Labavakashela Tigulane. Nasibhekene nesimo lesimatima, siyajabula nangabe lomdzala welibandla asilalela futsi asidvudvuta. Nasiyodadisha liBhayibheli nalotsite futsi sidzinga lusito, siyajabula nangabe lihlahlandlela leselinesikhatsi livuma kuba khona futsi lisho lapho singatfutfukisa khona. Bonkhe labazalwane nabodzadze bayajabula nabasisita. Natsi singayitfola lenjabulo nasitinika sikhatsi sekusita bazalwane betfu nabodzadze. Jesu watsi: “Kunenjabulo lenkhulu ekupheni kunasekwemukeleni.” (Imis. 20:35) Yini lengakusita ufinyelele imigomo yakho nangabe ufuna kwenta lokunyenti kulemisebenti nobe kuleminye?

13. Yini lokufanele siyikhumbule nasitibekela umgomo?

¹³ Ungatibekeli umgomo longacaci kahle. Sibonelo nje, ungahle utsi: ‘Ngifuna kwenta lokunyenti ebandleni.’ Kungahle kube matima kubona kutsi ungawufinyelela njani lomgomo wakho nekubona ngisho sewuwufinyelele. Ngako tibekele umgomo locacile. Ungaze uwubhale phasi lomgomo wakho nekutsi utawufinyelela njani.

14. Ngusiphi sizatfu lesenta silungele nobe yini nasitibekela imigomo?

¹⁴ Kufanele silungele nobe yini nasitibekela imigomo. Leni? Ngobe angeke sikhone kutilawula ngalokuphelele timo tetfu. Nasi sibonelo, umphostoli Pawula wasita ekusunguleni libandla eThesalonika. Siyaciniseka kutsi bekungumgomo wakhe kuhlala lapho futsi  asite lamaKhristu lebekasemasha. Kodvwa labo labaphikisako baphocelela Pawula kutsi ahambe kulelidolobha. (Imis. 17:1-5, 10) Kube wahlala, bekatawubeka bazalwane bakhe engotini, kodvwa akazange aphele emandla. Kunaloko wavumelana nalesimo. Ngekuhamba kwesikhatsi, watfumela Thimothi kutsi ayosita lamaKhristu lebekasemasha aseThesalonika kutsi abe nekukholwa lokucinile. (1 Thes. 3:1-3) LamaKhristu ajabula kakhulu ngekutsi Thimothi bekakulungele kuya nobe ngukuphi lapho bekunesidzingo khona!

15. Imigomo yetfu ingashintja njani nakushintja timo tetfu? Shano sibonelo.

¹⁵ Singafundza lokutsite kuloko lokwenteka kuPawula eThesalonika. Kungenteka sitibekele umgomo lotsite, kodvwa timo letingetulu kwemandla etfu tiyasivimbela kutsi siwufinyelele. (Shu. 9:11) Nangabe usesimeni lesinjalo, tibekele lomunye umgomo longakhona kuwufinyelela. Nguloko lokwentiwa ngulabanye labashadene lokutsiwa nguTed naHiedi. Ngenca yekugula, kwadzingeka bahambe eBethel. Ngenca yekutsi bebamtsandza Jehova, bafuna letinye tindlela tekwenta lokunyenti emsebentini wakhe. Bacale baba ngemahlahlandlela lavamile. Ngekuhamba kwesikhatsi, baba ngemahlahlandlela lakhetsekile, futsi Ted waceceshelwa kutsi abambele umbonisi wesigodzi. Ngemuva kwaloko, yashintja iminyaka lefunekako yalabo labangaba babonisi betigodzi. BoTed naHiedi babona kutsi bebangeke basachubeka benta lomsebenti. Nanobe badvumateka, kodvwa bebati kutsi ikhona leminye imisebenti lebebangamentela yona Jehova. Ted utsi: “Sabona kutsi singamkhonta Jehova nangaletinye tindlela.”

16. Yini lesiyifundza KubaseGalathiya 6:4?

¹⁶ Angeke sikulawule konkhe lokwentekako ekuphileni kwetfu. Ngako kubaluleka kwetfu akukafaneli sikukale ngemisebenti lesiyentela Jehova nobe siyicatsanise naleyo leyentiwa ngulabanye. Hiedi utsi: “Ngeke ujabule nawucatsanisa imphilo yakho neyalabanye.” (Fundza KubaseGalathiya 6:4.) Kubalulekile kutsi sibuke tindlela lesingabasita ngato labanye. *

17. Yini longayenta kuze ufaneleke kwenta leminye imisebenti?

¹⁷ Utawukhona kwenta umsebenti lovelako nangabe wenta kuphila kwakho kube melula futsi ugweme netikweleti. Tibekele imigomo lemincane letakusita kutsi ufinyelele imigomo lemikhulu. Sibonelo nje, nangabe  unemgomo wekuba lihlahlandlela lelivamile, ungaba yini lihlahlandlela lelisitako lelichubekako nyalo? Nangabe utibekele umgomo wekuba yinceku lesebentako, ungacitsa sikhatsi lesinyenti yini emsebentini wekushumayela, futsi uvakashele labagulako nalabakhulile labasebandleni lokulo? Emakhono lotawatfola manje angakusita esikhatsini lesitako kutsi wente leminye imisebenti. Timisele kutsi wente konkhe lokusemandleni akho nawunikwa nobe ngumuphi umsebenti.—Rom. 12:11.

18. Njengobe kuvetwe kulesitfombe, yini lesingayifundza esibonelweni saBeverley?

¹⁸ Kukhula ngeminyaka akusho kutsi ngeke sikhone kutibekela imigomo ekukhonteni Nkulunkulu futsi siyifinyelele. Cabanga ngesibonelo sadzadze lokutsiwa nguBeverley loneminyaka lengu-75. Bekagula kakhulu futsi angakhoni kuhamba. Kodvwa bekafuna kwenta lokunyenti emkhankasweni weSikhumbuto. Ngako watibekela imigomo lecacile. Beverley wajabula kakhulu nakayifinyelela lemigomo. Loko lakwenta kwakhutsata nalabanye kutsi batimisele emsebentini wekushumayela. Jehova ujabula kakhulu ngemsebenti lowentiwa bazalwane nabodzadze lasebakhulile, ngisho nobe timo tingasabavumeli kutsi bente lokunyenti.—Hla. 71:17, 18.

19. Ngumiphi leminye imigomo lesingatibekela yona ekukhonteni Nkulunkulu?

¹⁹ Tibekele imigomo longakhona kuyifinyelela. Yetama kuba nebuntfu lobutawujabulisa Jehova. Fundza emakhono latakwenta ube lusito kuNkulunkulu wetfu nasenhlanganweni yakhe. Buka tindlela longaba lusito ngato kakhudlwana kubazalwane bakho nakubodzadze. * NjengaThimothi, Jehova angakusita kutsi ‘intfutfuko yakho ibonakale kahle kubo bonkhe bantfu.’—1 Thim. 4:15.