Esimeni lesinjalo, libandla litawutsatsa lomshado wakhe lomdzala ngekutsi waphela ngesikhatsi ashada nalomunye, futsi litawutsatsa lona lomusha njengemshado losewusebenta. Kuze sicondze sizatfu lesisenta sisho njalo, asesicoce ngaloko Jesu lakusho mayelana nedivosi nekuphindze ushade.

KuMatewu 19:9, Jesu washo sizatfu lokukuphela kwaso lesivunyelwa liBhayibheli lesingenta bantfu badivose. Watsi: “Nangabe indvodza idivosa umfati wayo, abe lomfati angakagwadli bese ishada nalomunye, iyaphinga.” Kuloku lokwashiwo nguJesu, siyafundza kutsi (1) kugwadla kuphela kwesizatfu lesisekelwe emiBhalweni lesingenta labashadile kutsi badivose, nekutsi (2) indvodza ledivosa umkayo ngaphandle kwalesizatfu lesivunyelwa yimiBhalo futsi ishade nalomunye, iyaphinga. *

Lamavi aJesu asho kutsi imiBhalo iyayivumela yini indvodza lephingile yabese idivosa umkayo kutsi ingaphindze ishade? Cha. Nangabe indvodza iphingile, ngumfati wayo lote licala lotawuncuma kutsi uyayicolela yini nobe cha. Nangabe angayicoleli futsi nedivosi yabo seyifike esiphetfweni, bobabili bakhululekile kushada.

Nobe kunjalo, lomfati angancuma kuchubeka ahlale nendvodza yakhe futsi avete sifiso sakhe sekuyicolela. Kodvwa kutsiwani nangabe lendvodza ingakwemukeli loko futsi imdivose nanobe lomfati angavumelani naloko? Ngenca yekutsi umkayo umcolele futsi wavuma kutsi bachubeke nalomshado, imiBhalo ayivumi kutsi iphindze ishade. Kodvwa nangabe ingakunaki loko lokushiwo yimiBhalo futsi ishade nalomunye umuntfu, itawube iphindze iyaphinga ngako kutawudzingeka kutsi ivele ekomidini yekwehlulela kuze kukhulunywe indzaba yayo.—1 Khor. 5:1, 2; 6:9, 10.

Nangabe lendvodza iphindze ishada ngisho nobe imiBhalo ingayivumeli, libandla liwutsatsa njani lomshado lomdzala nalona lomusha? Lomshado lomdzala uchubeka ungumshado mbamba yini ngekusho kweliBhayibheli? Lomfati lote licala usengancuma yini kuyicolela nobe kungayicoleli lendvodza bekashade nayo? Lendvodza nalomfati wayo lomusha kutawutsatfwa ngekutsi bayaphinga yini?

Esikhatsini lesendlulile, libandla belitsatsa ngekutsi lendvodza nalomfati wayo lomusha bayaphinga, yingci nje nangabe lomfati lemdivosile asaphila, angakashadi futsi angakagwadli. Nobe kunjalo, Jesu akazange akhulume ngalona lote licala ngesikhatsi akhuluma ngekudivosa nekuphindze ushade. Kunaloko, watsi indvodza ledivosa umkayo ngaphandle kwesizatfu lesivunyelwa yimiBhalo futsi ishade nalomunye, iyaphinga.  Kuleso simo, kudivosa kwalendvodza nekuphindze ishade, Jesu watsi kufana ncamashi nekuphinga, futsi kuyawucedza lomshado lomdzala.

Nangabe indvodza idivosa umkayo futsi ishade nalomunye, akusasebenti kutsi lomfati lote licala uyayicolela yini nobe cha, nobe kutsi uyayemukela yini nobe cha. Ngako sekute sidzingo sekutsi lomfati ancume kutsi uyayicolela yini lendvodza bekashade nayo nobe cha. Ngetulu kwaloko, indlela libandla lelitsatsa ngayo lomshado lomusha ayiyi ngekutsi lomfati lote licala washona yini, nobe waphindze washada nobe wagwadla. *

Kulesibonelo lesicoce ngaso, lendvodza iphingile yabese iyadivosa. Kutsiwani nangabe lendvodza ingakaphingi kodvwa yadivosa yaphindze yashada? Nobe kutsiwani nangabe lendvodza idivose ingakatiphatsi kabi ngekwelicansi, kodvwa yabese itiphatsa kabi ngekwelicansi ngemuva kwekudivosa futsi yaphindze yashada nanobe lomfati wayo bekanesifiso sekumcolela? Kuto tonkhe letibonelo, lokudivosa nekuphindze ishade, kukuphinga, kuyawucedza lomshado lomdzala. Lomshado lomusha sengiwo losemtsetfweni. Sicongosekulindza saNovember 15, 1979, ekhasini 32, satsi “nyalo seyisemshadweni lomusha futsi angeke imane nje iwucedze bese ibuyela kulomfati wayo leyamdivosa; lomshado wayo lomdzala waphela ngesikhatsi idivosa, iphinga futsi iphindze ishada.”

Lenchazelo lensha ayilehlisi lizinga lekuba ngcwele kwemshado nobe kutsi kuphinga akusiso sono lesikhulu. Indvodza ledivosa umkayo ngaphandle kwesizatfu lesisemiBhalweni futsi ishade nalomunye nanobe imiBhalo ingayivumeli kutsi yente njalo, kutawudzingeka ibonane nekomidi yekwehlulela ngobe inelicala lekuphinga. (Nangabe lomfati leshade naye angumKhristu, naye kutawudzingeka abonane nekomidi yekwehlulela abekwe licala lekuphinga.) Nanobe lendvodza nemfati wayo lomusha bangeke batsatfwe ngekutsi bayaphinga, kodvwa kutawuphela iminyaka leminyenti ingakufanelekeli kwenta imisebenti lekhetsekile ebandleni kuze kube ngulapho labanye sebacolile ngalentfo lembi leyayenta nobe sebayekele kuva shengatsi ayikufaneli kuhlonishwa. Ngaphambi kwekutsi inikwe leminye imisebenti ebandleni, labadzala batawucabanga nangetimo talomfati wayo lokungenteka yamdivosa ngebucili kanye nebantfwana labancane lokungenteka yabashiya.—Mal. 2:14-16.

Njengobe sesicoce ngemiphumela lematima yekudivosa nekuphindze ushade ngaphandle kwesizatfu lesivunyelwa yimiBhalo, emaKhristu enta kahle ngekuba nembono waJehova futsi atsatse umshado ngekutsi ungcwele.—Shu. 5:4, 5; Heb. 13:4.