1. Yini lesiciniseka ngayo?

 NJENGOBE sibantfu baJehova, siyati kutsi uyasitsandza futsi ufuna sijabule. (Rom. 8:35-39) Siyaciniseka nekutsi timiso teliBhayibheli tihlale tisisita nangabe sitisebentisa. (Isa. 48:17, 18) Kodvwa yini lesingayenta nasibhekana netinkinga lesingakatilindzeli?

2. Ngutiphi tinkinga lesingahle sibe nato, futsi yini lesingahle sitibute yona?

² Bonkhe bantfu baJehova babhekana netinkinga. Sibonelo nje, lilunga lemndeni lingahle lisidvumate. Singahle siphatfwe kugula lokwenta singasakhoni kwentela Jehova loko lesifise kumentela kona. Singahle sibhekane nemiphumela lebuhlungu yetehlakalo temvelo. Nobe singahle siphatfwe kabi ngenca yekukholwa kwetfu. Nakuvela tinkinga letinjalo, singahle sitibute: ‘Kwentiwa yini kutsi loku kwenteke kimi? Kunalokubi lengikwentile yini? Loku kusho kutsi Jehova akangibusisi yini?’ Ukile yini wativa ngalendlela? Nangabe kunjalo, ungadvumateki. Bantfu baJehova labanyenti labetsembekile bakile bativa ngalendlela.​—Hla. 22:1, 2; Hab. 1:2, 3.

3. Yini lesingayifundza kuTihlabelelo 34:19?

³ Fundza Tihlabelelo 34:19. Naka emaphuzu lamabili lamcoka kulesihlabelelo: (1) Bantfu labalungile baba nato tinkinga. (2) Jehova uyasikhulula etinkingeni tetfu. Usikhulula njani? Lenye indlela kusisita kutsi sibe nembono lokahle ngekuphila kulelive. Nanobe Jehova asetsembisa kutsi sitawujabula nasimkhonta, kodvwa akasho kutsi angeke sibe nato tinkinga. (Isa. 66:14) Usikhutsata kutsi sinake kakhulu likusasa  lapho khona sitawuphila imphilo lafuna siyiphile kuze kube phakadze. (2 Khor. 4:16-18) Kwanyalo, uyasisita kutsi sichubeke simkhonta lilanga nelilanga.​—Sil. 3:22-24.

4. Yini lesitawucoca ngayo kulesihloko?

⁴ Asesicoce ngekutsi yini lesingayifundza etikhontini taJehova letetsembekile tangesikhatsi sekubhalwa kweliBhayibheli netalamuhla. Njengobe sitawubona, singahle sibe netinkinga lesingakatilindzeli. Kodvwa nasetsembele kuJehova, utawuhlale asisita. (Hla. 55:22) Njengobe sitawube sicoca ngaletibonelo, tibute: ‘Kube bengisesimeni lesifanako bengingenta njani? Letibonelo tingisita njani kutsi ngimetsembe kakhulu Jehova? Ngutiphi tifundvo lengingatisebentisa ekuphileni kwami?’

5. Ngutiphi tinkinga Jakobe laba nato letabangelwa nguLabani? (Buka sitfombe lesisekhasini lekucala.)

⁵ Bantfu baJehova bangetikhatsi tekubhalwa kweliBhayibheli baba netinkinga labangakatilindzeli. Cabanga ngaJakobe. Babe wakhe wamtjela kutsi atsatse umfati emadvodzakatini aLabani, lebekasihlobo lesikhonta Jehova, futsi wamcinisekisa kutsi Jehova bekatambusisa kakhulu. (Gen. 28:1-4) Ngako Jakobe walalela. Watsatsa luhambo loludze esuka eKhenani waya ekhaya laLabani, lobekanemadvodzakati lamabili, lokunguLeya naRakheli. Jakobe watsandza Rakheli, indvodzakati yaLabani lencane, futsi wavuma kusebentela babe wakhe iminyaka lengu-7 kuze ashade naye. (Gen. 29:18) Kodvwa tintfo atizange tihambe ngendlela lebekacabanga ngayo. Labani wamkhohlisa futsi watikhandza sekashade nendvodzakati yakhe lendzala, lokunguLeya. Labani wavuma kutsi Jakobe ashade naRakheli ngemuva kweliviki, kodvwa nangabe nje atawusebenta leminye iminyaka lengu-7. (Gen. 29:25-27) Labani akazange atsembeke kuJakobe. Ngetulu kwako konkhe, wamphatsa kabi iminyaka lengu-20!​—Gen. 31:41, 42.

6. Ngutiphi letinye tinkinga lokwadzingeka Jakobe atibeketelele?

⁶ Jakobe wabeketelela letinye tinkinga. Bekanemndeni lomkhulu, futsi emadvodzana akhe bekahle angevani. Aze atsengisa ngisho nemnakabo, lokunguJosefa kutsi abe sigcili. Emadvodzana aJakobe lamabili, lokunguSimeyoni naLevi, awuhlaza kakhulu lomndeni, ahlaza nelibito laJehova. Ngetulu kwaloko, umfati waJakobe lebekamtsandza, lokunguRakheli, washona ngesikhatsi abeleka umntfwana wabo wesibili. Ngenca yendlala lenkhulu lebeyikhona kulelive, kwadzingeka kutsi Jakobe lebesekakhulile atfutsele eGibhithe.​—Gen. 34:30; 35:16-19; 37:28; 45:9-11, 28.

7. Jehova wakhombisa njani kutsi uyamemukela Jakobe?

⁷ Nanobe Jakobe abhekana nato tonkhe letinkinga, wachubeka ametsemba Jehova netetsembiso takhe. Ngenca yaloko, Jehova wamkhombisa kutsi uyamemukela. Sibonelo nje, nanobe Labani amphatsa kabi Jakobe, kodvwa Jehova wambusisa ngetintfo letinyenti. Cabanga futsi kutsi wambonga kanganani Jehova ngesikhatsi aphindze abona Josefa lebekacabanga kutsi kadze afa! Buhlobo lobuhle Jakobe lebekanabo naJehova bamsita kutsi akhone kubeketelela tinkinga takhe. (Gen. 30:43; 32:9, 10; 46:28-30) Nangabe natsi sihlale sinebuhlobo lobuhle naJehova, singakhona kubhekana nanobe ngutiphi tinkinga lesingakatilindzeli.

8. Yini iNkhosi Davide lebeyifuna kuyenta?

⁸ INkhosi Davide ayizange ikhone kwenta konkhe lebeyifuna kumentela kona Jehova. Sibonelo nje, Davide bekanesifiso lesikhulu  sekwakhela Nkulunkulu wakhe lithempeli. Watjela umphrofethi Nathani loko bekafuna kukwenta. Nathani waphendvula watsi: “Yenta noma ngabe yini lesenhlitiyweni yakho ngobe Nkulunkulu weliciniso unawe.” (1 Khr. 17:1, 2) Kusenekwenteka lamavi amkhutsata Davide. Mhlawumbe ngekushesha nje wacala kulungiselela kwenta lomsebenti lomkhulu.

9. Davide wenta njani nakatfola umlayeto lodvumatako?

⁹ Kodvwa ngekushesha, umphrofethi waJehova wabuya nemlayeto lodvumatako. “Ngabo lobo busuku,” Jehova watjela Nathani kutsi Davide bekangeke amakhele lelithempeli, kodvwa belitawakhiwa ngulenye yemadvodzana akhe. (1 Khr. 17:3, 4, 11, 12) Davide wenta njani nakatfola lomlayeto? Washintja umgomo wakhe. Wabese ucongelela imali kanye netintfo lebetitawudzingwa yindvodzana yakhe Solomoni nayakha lelithempeli.​—1 Khr. 29:1-5.

10. Jehova wambusisa njani Davide?

¹⁰ Ngekushesha nje ngemuva kwekutjela Davide kutsi akusuye lobekatawakha lithempeli, Jehova wenta sivumelwane naye. Jehova wametsembisa kutsi lomunye lovela esitukulwaneni sakhe bekatawubusa kuze kube phakadze. (2 Sam. 7:16) Emhlabeni lomusha, ngesikhatsi Sekubusa Kweminyaka Leyinkhulungwane, Davide utawujabula kakhulu ngekuva kutsi Jesu loyiNkhosi uvela esitukulwaneni sakhe! Lendzaba isisita sibone kutsi ngisho nobe singahle singakhoni kwentela Jehova konkhe lebesifise kumentela kona, kodvwa Nkulunkulu wetfu angahle asibusise ngaletinye tintfo lebesingakatilindzeli.

11. EmaKhristu ekucala abusiswa njani nanobe uMbuso waNkulunkulu ungazange ufike ngesikhatsi lebekawulindzele ngaso? (Imisebenti 6:7)

¹¹ EmaKhristu ekucala aba netinkinga langakatilindzeli. Sibonelo nje, bekakulangatelela kufika kweMbuso waNkulunkulu, kodvwa bekangati kutsi utawufika nini. (Imis. 1:6, 7) Ngako yini layenta? Achubeka amatasatasa emsebentini wekushumayela. Njengobe tindzaba letimnandzi betandza, abona ngalokucacile kutsi Jehova bekawabusisa.​—Fundza Imisebenti 6:7.

12. Yini emaKhristu ekucala layenta ngesikhatsi kunendlala?

¹² Ngalesinye sikhatsi, kwaba nendlala lenkhulu “emhlabeni wonkhe.” (Imis. 11:28) NemaKhristu ekucala ahlaselwa ngulendlala. Cabanga nje kutsi lokweswelakala kwekudla kwawatsintsa njani? Siyaciniseka kutsi tinhloko temindeni betikhatsateka ngekutsi titayondla njani imindeni yato. Yini leyenteka ngebantfu labasha lebebahlele kwenta lokunyenti emsebentini wekushumayela? Kusenekwenteka yini kutsi batitjela kutsi asebeme kancane size sibe ncono lesimo? Kunobe ngusiphi simo lebekakuso, lamaKhristu akhona kuvumelana naso. Achubeka ashumayela nganobe nguyiphi indlela lebekangakhona ngayo futsi bekakujabulela kuhlephulelana nebazalwane bawo nabodzadze baseJudiya loko lebekanako.​—Imis. 11:29, 30.

13. Abusiswa njani emaKhristu ngesikhatsi kunendlala?

¹³ EmaKhristu abusiswa njani ngesikhatsi kunendlala? Lawo lemukela tintfo lebekatidzinga abona kutsi Jehova bekawasita. (Mat. 6:31-33) Kusenekwenteka ativa asondzelene kakhulu nebazalwane bawo nabodzadze labawasita. Ngetulu kwaloko, lawo lanikela nobe lasita nangaletinye tindlela aba nenjabulo letfolakala ngekupha. (Imis. 20:35) Jehova wawabusisa onkhe lamaKhristu ngenca yekutsi avumelana netimo lebetishintja.

14. Yini leyenteka kuBhanabasi nakumphostoli Pawula, futsi waba yini umphumela? (Imisebenti 14:21, 22)

¹⁴ EmaKhristu ekucala bekavame kuphatfwa  kabi, ngaletinye tikhatsi loko bekwenteka angakakulindzeli. Cabanga ngalokwenteka kuBhanabasi nakumphostoli Pawula ngesikhatsi bashumayela eListra. Ekucaleni, labo lebebabalalela babemukela kahle. Kodvwa ngekuhamba kwesikhatsi, baphikisi ‘bagcugcutela sicumbi sebantfu’ futsi labanye kuso bagcoba Pawula ngematje futsi bamshiya bacabanga kutsi sewufile. (Imis. 14:19) Kodvwa Pawula naBhanabasi bachubeka nekushumayela kulenye indzawo. Waba yini umphumela? Bantfu ‘labanyenti baba bafundzi,’ futsi loko labakusho nesibonelo sabo sacinisa bazalwane babo nabodzadze. (Fundza Imisebenti 14:21, 22.) Bantfu labanyenti basitakala ngenca yekutsi Bhanabasi naPawula abazange bayekele kushumayela nanobe bebaphatfwa kabi. Natsi nangabe sitawuchubeka senta umsebenti waJehova, sitawubusiswa.

15. Yini loyifundza esibonelweni seMzalwane A. H. Macmillan?

¹⁵ Ngaphambi kwa-1914, bantfu baJehova bebalindzele kutsi kwenteke letinye tintfo. Cabanga ngesibonelo seMzalwane A. H. Macmillan. Njengalabanye labanyenti ngaleso sikhatsi, uMzalwane Macmillan bekacabanga kutsi utawutfola umvuzo wakhe wekuphila ezulwini ngekushesha. Enkhulumeni yakhe layibeka ngaSeptember 1914, watsi: “Kusenekwenteka lena yinkhulumo yami yekugcina.” Kodvwa liciniso likutsi leyo bekungasiyo inkhulumo yakhe yekugcina. Ngekuhamba kwesikhatsi uMzalwane Macmillan wabhala watsi: “Mhlawumbe labanye betfu basheshe bacabanga kutsi sitawuya ezulwini ngekushesha.” Wengeta watsi: “Intfo lokufanele siyente kuhlala simatasatasa emsebentini weNkhosi.” UMzalwane Macmillan wahlala amatasatasa futsi bekakhutsele emsebentini wekushumayela. Wakhutsata bazalwane nabodzadze labanyenti lebebasemajele ngenca yekungatingeneli timphi. Ngetulu kwaloko bekachubeka aba khona njalo emihlanganweni yelibandla ngisho nangesikhatsi sekakhule kakhulu ngeminyaka. UMzalwane Macmillan kwamsita njani kuchubeka amatasatasa akhonta Jehova ngesikhatsi alindzele umvuzo wakhe? Ngaphambi nje kwekutsi afe nga-1966, wabhala watsi: “Lamuhla kukholwa kwami kucine ngendlela bekucine ngayo ngaphambili.” Leso simo sengcondvo lesihle sonkhe lokufanele sibe naso, ikakhulukati nangabe tinkinga lesibhekene nato titsatsa sikhatsi lesidze kunaleso besisilindzele!​—Heb. 13:7.

16. Ngusiphi simo lesingakalindzeleki labhekana naso Herbert Jennings nemkakhe? (Jakobe 4:14)

¹⁶ Bantfu baJehova labanyenti bahlaselwe kugula lebebangakakulindzeli. Sibonelo nje, uMzalwane Herbert Jennings b wasicocela endzabeni yemlandvo wakhe wekuphila kutsi yena nemkakhe bebajabulile esabelweni sabo sekuba titfunywa telivangeli eGhana. Kodvwa ngekuhamba kwesikhatsi, kwatfolakala kutsi unesifo lesimatima sekushintjashintja kwendlela lativa ngayo. UMzalwane Jennings wacaphuna umbhalo waJakobe 4:14, futsi wachaza lesimo sakhe lesisha ngekutsi “‘likusasa’ lebesingakalilindzeli.” (Fundza.) Wabhala watsi: “Kwadzingeka kutsi sibuke tintfo njengobe tinjalo, ngako sahlela kuhamba eGhana sishiye bangani betfu labanyenti futsi sibuyele eCanada.” Jehova wamsita umzalwane Jennings nemkakhe kutsi bachubeke bamkhonta ngekwetsembeka nanobe bebabhekene netinkinga.

17. Sibonelo seMzalwane Jennings sibasite njani labanye?

 ¹⁷ Loko lokwashiwo nguMzalwane Jennings kwabasita kakhulu labanye. Lomunye dzadze wabhala watsi: “Kufundza ngalendzaba kungitsintse ngendlela lengingakake ngitsintseke ngayo.  . . Kufundza ngekutsi uMzalwane Jennings kwadzingeka ashiye sabelo sakhe kuze anake kugula kwakhe kwangisita kutsi ngibe nembono lokahle ngesimo lengikuso.” Ngendlela lefanako, lomunye umzalwane wabhala watsi: “Ngemuva kwekuba ngulomdzala welibandla iminyaka lengu-10, kwadzingeka ngiyekele kuba ngulomdzala welibandla ngenca yesifo lesitsintsa ingcondvo. Kutiva ngisehluleki bekungenta ngicindzeteleke kakhulu kutsi ngingafundza imilandvo yekuphila yalabanye. . . . Kodvwa kubeketela kweMzalwane Jennings kungikhutsatile.” Loku kusikhumbuta kutsi nasibeketelela tinkinga letingakalindzeleki, singabakhutsata labanye. Ngisho nobe tintfo tingahambi ngendlela besicabanga ngayo, kodvwa nangabe sichubeka siba nekukholwa futsi sicinisela singaba sibonelo lesihle kulabanye.​—1 Phet. 5:9.

18. Njengobe kuvetiwe kuletitfombe, yini loyifundza kulomfelokati waseNigeria?

¹⁸ Tehlakalo letinjenge-COVID-19 titsintse bantfu baJehova labanyenti. Sibonelo nje, lomunye umfelokati waseNigeria besekasele nekudla lokuncane kanye nemali lencane. Ngalelinye lilanga ekuseni, indvodzakati yakhe yambuta kutsi bebatawudlani nasekuphele le-rice yekugcina. Lodzadze watjela lendvodzakati yakhe kutsi besebete imali nobe kudla kodvwa bekufanele balingise sibonelo semfelokati waseSarefathi, lowalungisa kudla kwekugcina wabese wetsembela ngalokuphelele kuJehova. (1 Khos. 17:8-16) Batsi basengakacabangi nekucabanga kutsi batawudlani emini ngalelolanga, batfola  sikhwama lesinekudla lesibuya kubazalwane babo nabodzadze. Lesikhwama besinekudla lobekungabachuba sikhatsi lesingetulu kwemaviki lamabili. Lodzadze utsi bekangati kutsi Jehova bekakulalele loko lakutjela indvodzakati yakhe. Nangabe setsembele kuJehova, tinkinga letivela singakatilindzeli tingasisondzeta kakhulu kuye.​—1 Phet. 5:6, 7.

19. Ngukuphi kuphatfwa kabi lokwabeketelelwa ngu-Aleksey Yershov?

¹⁹ Eminyakeni yakamuva, bazalwane betfu nabodzadze labanyenti babeketelele kuphatfwa kabi lokungenteka bebangakakulindzeli. Cabanga ngeMzalwane Aleksey Yershov lohlala eRussia. Bantfu baJehova kulelive bebakhululekile ngesikhatsi uMzalwane Yershov abhajatiswa nga-1994. Kodvwa eminyakeni yakamuva, simo sishintjile eRussia. Nga-2020, tiphatsimandla tangena ekhaya leMzalwane Yershov tafike taphikitha futsi tatsatsa tintfo takhe letinyenti. Ngemuva kwetinyanga, hulumende wambeka emacala. Lokubuhlungu kakhulu kutsi lamacala bekasekelwe ku-video leyatsetjulwa ngulomunye umuntfu lokwaphela sikhatsi lesingetulu kwemnyaka enta shengatsi uyakutsandza kudadisha liBhayibheli. Cabanga nje kukhohliswa kabuhlungu ngalendlela!

20. Yini leyentiwa nguMzalwane Yershov kuze acinise buhlobo bakhe naJehova?

²⁰ Kuphatfwa kabi kweMzalwane Yershov kube nayo yini imiphumela lemihle? Yebo. Buhlobo bakhe naJehova sebucine kakhulu. Utsi: “Mine nemkami sithantaza ndzawonye tikhatsi letinyenti. Ngiyabona kutsi angeke ngize ngikhone kubeketelela lesimo ngaphandle kwekusitwa nguJehova.” Uchubeka utsi: “Kutidadishela liBhayibheli kuyangisita kutsi ngilwisane nekudvumateka. Ngicabangisisa ngetibonelo tetikhonti taJehova letetsembekile tasesikhatsini lesendlulile. Tinyenti tindzaba letiseBhayibhelini letiveta kutsi kubalulekile kwehlisa umoya futsi setsembele kuJehova.”

21. Yini lesiyifundzile kulesihloko?

²¹ Yini lesiyifundzile kulesihloko? Ngaletinye tikhatsi sibhekana netinkinga lesingakatilindzeli kulelive. Nanobe kunjalo, Jehova uhlale abasita bantfu bakhe nabetsembela kuye. Umbhalo lokusekelwe kuwo lesihloko utsi: “Tinyenti tinhlupheko letehlela lolungile, kodvwa Jehova umkhulula kuto tonkhe.” (Hla. 34:19) Shengatsi singachubeka setsembela emandleni aJehova, singatinaki tinkinga lesibhekana nato. Njengemphostoli Pawula, natsi singalisho ligcwale umlomo sitsi: “Nginemandla ekwenta tonkhe tintfo ngenca yaloyo longipha emandla.”​—Fil. 4:13.