1. Yini leyenta siphendvule emihlanganweni?

 YINI leyenta sibe khona emihlanganweni yelibandla? Ngalokuyinhloko, kuze sidvumise Jehova. (Hla. 26:12; 111:1) Siphindze sibe khona emihlanganweni kuze sikhutsatane kuletikhatsi letimatima. (1 Thes. 5:11) Nasiphakamisa sandla futsi siphendvula, sisuke sidvumisa Jehova futsi sikhutsatana.

2. Ngumaphi ematfuba lesinawo ekuphendvula emihlanganweni yetfu?

² Njalo ngeliviki, sinematfuba ekuphendvula emihlanganweni yetfu. Sibonelo nje, ngetimphelasontfo singaphendvula eSifundvweni se-Sicongosekulindza. Emihlanganweni lesemkhatsini weliviki, singaphendvula encenyeni letsi Umcebo LoseVini laNkulunkulu, eSifundvweni SeliBhayibheli Selibandla nakuletinye tincenye letinetincociswane.

3. Ngutiphi tinkinga lesingabhekana nato, futsi umbhalo waKumaHebheru 10:24, 25 ungasisita njani?

³ Sonkhe sifuna kudvumisa Jehova futsi sikhutsate bazalwane betfu nabodzadze. Kodvwa kunetintfo letingenta kube matima kuphendvula. Kungenteka sesabe kuphendvula nobe kungenteka sifune kuphendvula kodvwa utfole kutsi asikhonjwa tikhatsi lesifisa kukhonjwa ngato. Yini lengasisita nasibhekene naletimo? Imphendvulo siyitfola kuloko lokwashiwo ngumphostoli Pawula nakabhalela emaHebheru. Ngesikhatsi akhuluma ngekubaluleka kwekutsi sihlangane ndzawonye, watsi kufanele sinake kakhulu ‘kukhutsatana.’ (Fundza KumaHebheru 10:24, 25.) Nangabe sibona kutsi labo labasemihlanganweni  bangakhutsatwa yimphendvulo lemelula leveta kukholwa kwetfu, angeke sikwesabe kakhulu kuphendvula. Nangabe singakhonjwa tikhatsi lesifise kukhonjwa ngato, singajabula ngekutsi labanye ebandleni batawutfola litfuba lekuphendvula.​—1 Phet. 3:8.

4. Ngumaphi emaphuzu lamatsatfu lesitawucoca ngawo kulesihloko?

⁴ Kulesihloko, sitawucale sicoce ngekutsi singabakhutsata njani labanye ebandleni lelincane lapho babancane khona labaphendvulako. Sitawubese sicoca ngekutsi singabakhutsata njani labanye ebandleni lelikhulu, lapho babanyenti khona labaphakamisako. Ekugcineni, sitawucoca ngekutsi singabakhutsata njani labanye ngaloko lesikushoko nasiphendvula.

5. Singakhutsatana njani ebandleni lelincane?

⁵ Ebandleni lelincane nobe ecenjini, baba bancane labaphendvulako. Ngaletinye tikhatsi, lochubako kudzingeka kutsi eme sikhatsi ngaphambi kwekutsi kube nalotsite lophakamisa sandla. Lomhlangano ungabonakala udvonsa futsi loko kungacedzana emandla. Yini longayenta? Yetama kuphakamisa emahlandla lamanyenti. Nawenta njalo, ungakhutsata nalabanye kutsi nabo bente lokufanako.

6-7. Yini lesingayenta kuze singakhatsateki kakhulu nasiphendvula?

⁶ Yini longayenta nangabe wesaba kuphendvula? Labanyenti betfu bayesaba kuphendvula. Nobe kunjalo, kuze ukhutsate bazalwane bakho nabodzadze, ungabuka tindlela longakunciphisa ngayo kwesaba kuphendvula. Ungakwenta njani loko?

⁷ Kungakusita kubuka lokunye lokwashiwo kubomagazini be-Sicongosekulindza labendlulile. b Sibonelo nje, lungiselela kahle. (Taga 21:5) Nangabe uyicondza indzaba lefundvwako, kutawuba melula kutsi uphakamise sandla. Lokunye longakwenta kutsi usho imphendvulo lemfisha. (Taga 15:23; 17:27) Angeke ukhatsateke kakhulu nangabe imphendvulo yakho iyimfisha. Imphendvulo lemfisha lengaba ngumusho munye nobe lemibili ingenta kube melula ngebazalwane bakho nabodzadze kutsi bayicondze kunemphendvulo lendze lenemaphuzu lamanyenti. Nangabe usho imphendvulo lemfisha ngemavi akho, utawube uyakhombisa kutsi ulungiselele kahle nekutsi uyicondza kahle indzaba lefundvwako.

8. Jehova utiva njani ngaloko lokusemandleni akho lokhona kukwenta?

⁸ Kutsiwani nangabe ukwetama loku kodvwa uchubeke wesaba kuphendvula tikhatsi letinyentana? Ciniseka kutsi Jehova utawujabula ngako konkhe lowetama kukwenta. (Luk. 21:1-4) Jehova akakuceli kutsi wente intfo longeke ukhone kuyenta. (Fil. 4:5) Buka kutsi yini longakhona kuyenta, utibekele umgomo wekukwenta bese uthantazela kuba nesibindzi. Ungacale utibekele umgomo wekusho imphendvulo yinye lemfisha.

9. Nguyiphi inkinga lengavela emabandleni lamakhulu?

⁹ Nangabe libandla lokulo linebamemeteli labanyenti, kungenteka ube nenkinga leyehlukile. Kungenteka banyenti bazalwane nabodzadze labaphakamisako kangangekutsi uhle ungakhonjwa. Sibonelo nje, Danielle  uyakutsandza kuphendvula. c Ukutsatsa njengendlela yekukhonta Jehova, yekukhutsata labanye neyekunamatselisa emaciniso eliBhayibheli engcondvweni yakhe. Kodvwa watsi nakatfutsela ebandleni lelikhulu, besekakhonjwa kancane, ngalesinye sikhatsi bekangakhonjwa ngisho kanye uze uphele umhlangano. Utsi: “Ngakhatsateka, bengiva ngatsi ngilahlekelwa litfuba lelihle. Nakwenteka emahlandla lamanyenti, ubese uyatibuta kutsi awukhonjwa ngemabomu yini.”

10. Yini lesingayenta kuze sikhulise ematfuba ekuphendvula?

¹⁰ Ukile yini wativa ngendlela Danielle lativa ngayo? Nangabe kunjalo, kungenteka ulingeke kutsi ungasaphakamisi, ulalele nje uze uyophela umhlangano. Kodvwa ungayekeli kwetama kuphendvula. Yini longayenta? Kungakusita kulungiselela timphendvulo letinyentana njalo nawuya emihlanganweni. Nangabe ungakhonjwa ngasekucaleni kwesifundvo, utawube solo usenawo ematfuba ekuphendvula njengobe umhlangano uchubeka. Nawulungiselela Sifundvo se-Sicongosekulindza, cabanga ngekutsi sigaba ngasinye sihlangana njani nesihloko lokufundvwa ngaso. Nawenta njalo, utawuba nalokutsite longakusho njengobe lesifundvo sichubeka. Ngetulu kwaloko, lungiselela timphendvulo tetigaba letinemaciniso lajulile lokumatima kuwachaza. (1 Khor. 2:10) Leni? Ngobe kungenteka batawuba bancane labatawufuna kuphendvula kuleto tigaba. Kutsiwani nangabe kuphela emaviki utetama letindlela kodvwa solo ungakhonjwa? Ungaya kumchubi ngaphambi kwemihlangano futsi umtjele ngesigaba longatsandza kuphendvula kuso.

11. Umbhalo waKubaseFiliphi 2:4 usikhutsata kutsi senteni?

¹¹ Fundza KubaseFiliphi 2:4. Aphefumulelwe, umphostoli Pawula wakhutsata emaKhristu kutsi acabangele nalabanye. Singasisebentisa njani leseluleko nasisemihlanganweni? Ngekutsi sikhumbule kutsi nalabanye bayafuna kuphendvula.

12. Nguyiphi indlela lencono yekukhutsata labanye emihlanganweni? (Buka nesitfombe.)

¹² Yicabange ngalendlela lendzaba. Nangabe  ucoca nebangani bakho, ungakhuluma kakhulu yini baze babe bete litfuba lekukhuluma? Cha! Uyafuna kutsi nabo bacoce. Ngendlela lefanako, nasisemihlanganweni sifuna kuvumela nalabanye kutsi baphendvule. Ecinisweni, lenye indlela yekukhutsata bazalwane betfu nabodzadze kutsi sibanikete litfuba lekutsi bavete kukholwa kwabo. (1 Khor. 10:24) Ase sicoce ngekutsi singakwenta njani loko.

13. Yini longayenta kuze nalabanye baphendvule?

¹³ Lenye indlela kutsi sisho timphendvulo letimfisha, ngaleyondlela sitawube sivumela nalabanye kutsi baphendvule. Labadzala belibandla kanye nebamemeteli lasebanesikhatsi bakhonta Jehova bangabeka sibonelo kuloku. Ngisho nobe usho imphendvulo lemfisha, kubalekele kukhuluma ngemaphuzu lamanyenti. Nangabe usho konkhe lokusesigabeni, kutawuba kuncane lokusele lokungashiwo ngulabanye. Sibonelo nje, kulesigaba kuvetwe tintfo letimbili, kusho imphendvulo lemfisha nekubalekela kukhuluma emaphuzu lamanyenti. Nangabe ukhonjwe kucala kulesigaba, yetama kukhuluma ngeliphuzu linye.

14. Yini lengasisita sincume kutsi sitawuphakamisa kangakhi? (Buka nesitfombe.)

¹⁴ Sebentisa kuhlakanipha nawuncuma kutsi utawuphakamisa kangakhi. Nangabe siphakamisa tikhatsi letinyenti singahle sente umchubi ative acindzetelekile kutsi asikhombe tikhatsi letinyenti ngisho nobe labanye basengakalitfoli litfuba lekuphendvula. Loku kungenta labanye kutsi bangasaphakamisi.​—Shu. 3:7.

15. (a) Yini lokufanele siyente nangabe singakhonjwa? (b) Bachubi bangakhombisa njani kutsi bayacabangela? (Buka libhokisi lelitsi “ Nangabe Uchuba.”)

¹⁵ Nangabe babanyenti bamemeteli labaphakamisile nakuchubeka sifundvo, kungenteka singakhoni kuphendvula kanyenti njengobe sifisile. Ngaletinye tikhatsi, umchubi  kungenteka angasikhombi kwasanhlobo. Loko kungasidvumata, kodvwa kufanele setame kutsi singakufaki enhlitiyweni.​—Shu. 7:9.

16. Singabakhutsata njani labaphendvulako?

¹⁶ Nangabe ungakhoni kuphendvula kanyenti njengobe ufisile, ungabalalelisisa labanye nabaphendvula bese ngemuva kwemihlangano uyababonga ngetimphendvulo tabo. Loko kungabakhutsata bazalwane bakho nabodzadze njengobe betitabakhutsata netimphendvulo takho kube ulitfolile litfuba lekutisho. (Taga 10:21) Kubonga labanye kungulenye indlela lesikhutsatana ngayo.

17. (a) Batali bangabasita njani bantfwana babo kutsi balungiselele timphendvulo? (b) Ngekusho kwale-video, ngutiphi tintfo letine letingentiwa nakulungiselelwa imphendvulo? (Buka nembhalo longentasi.)

¹⁷ Ngutiphi letinye tindlela lesingakhutsatana ngato emihlanganweni yelibandla? Nangabe ungumtali, sita bantfwana bakho kutsi balungiselele timphendvulo letingangabo. (Mat. 21:16) Ngaletinye tikhatsi kuyenteka sifundze ngetindzaba letimatima, njengetinkinga letisemishadweni nobe tindzaba tekutiphatsa, nanobe kunjalo singaba khona sigaba nobe timbili umntfwana langaphendvula kuso. Ngetulu kwaloko, sita bantfwana  bakho babone kutsi yini lengenta bahle bangakhonjwa nabaphakamisile. Kubachazela loko kungabenta bangadvumateki nangabe kukhonjwa labanye esikhundleni sabo.​—1 Thim. 6:18. d

18. Yini longayenta kuze ugweme kutsi kunakwe wena nawuphendvula? (Taga 27:2)

¹⁸ Sonkhe singalungiselela timphendvulo letitawudvumisa Jehova naletitawukhutsata bazalwane betfu nabodzadze. (Taga 25:11) Nanobe ungasho imphendvulo lemfishane lemayelana nalokwenteke kuwe, kufanele ukubalekele kukhuluma kakhulu ngawe. (Fundza Taga 27:2; 2 Khor. 10:18) Kufanele sinake Jehova, liVi lakhe kanye nebantfu bakhe. (Semb. 4:11) Nangabe imphendvulo yembuto ifuna sisho indlela lesitiva ngayo, kukahle kutsi sente njalo. Sibonelo saloku sitasibona esigabeni lesilandzelako.

19. (a) Utawuba yini umphumela nangabe sicabangelana? (KubaseRoma 1:11, 12) (b) Yini loyijabulelako ngekuphendvula emihlanganweni yelibandla?

¹⁹ Nanobe kute imitsetfo lecinile lemayelana nekutsi kufanele siphendvule kanjani, sonkhe singetama kukhutsatana. Loku kungasho kuphendvula kanyentana. Nobe kungasho kwenetiseka ngematfuba lowatfolile ekuphendvula futsi ujabule ngekutsi nalabanye bawatfolile ematfuba ekuphendvula. Nangabe sicabangela labanye nasisemihlanganweni yelibandla, sonkhe ‘singakhutsatana.’​—Fundza KubaseRoma 1:11, 12.