1-2. Yini lokudzingeka siyente njengobe sisemele live lelisha?

 SILIGUGU kitsi setsembiso saJehova sekutsi lelive lelibi litawuphela bese kufika live lelisha lekulunga. (2 Phet. 3:13) Nanobe singati kutsi live lelisha litawufika nini, kodvwa tintfo letentekako tiyakhombisa kutsi selitawufika.—Mat. 24:32-34, 36; Imis. 1:7.

² Nanobe kunjalo, ngisho nobe sesinesikhatsi lesingakanani sisecinisweni, sonkhe kufanele sente lokutsite kuze sisetsembe kakhulu lesetsembiso. Leni? Ngobe ngisho nekukholwa lokucinile kungaba butsakatsaka. Ecinisweni, umphostoli Pawula watsi kuba bete kukholwa ‘kusono lesisigigela kamelula.’ (Heb. 12:1) Kuze kukholwa kwetfu kungabi butsakatsaka, kudzingeka sihlale sifuna bufakazi bekutsi live lelisha litawufika ngekushesha.—Heb. 11:1.

3. Sitawucoca ngani kulesihloko?

³ Kulesihloko, sitawucoca nganati tintfo letintsatfu lesingatenta kuze sisetsembe kakhulu setsembiso saJehova selive lelisha: (1) kucabangisisa ngenhlawulo, (2) kucabanga ngemandla aJehova, kanye (3) nekutiniketa sikhatsi sekwenta tintfo letitasisondzeta kuJehova. Sitawubese sicoca ngekutsi umlayeto Jehova lawuniketa Habakhuki ungakucinisa njani kukholwa kwetfu lamuhla. Kodvwa asesicale sicoce ngetimo lokungenteka sibhekene nato nyalo letidzinga sisetsembe kakhulu setsembiso selive lelisha.

 TIMO LETIDZINGA SIBE NEKUKHOLWA LOKUCINILE

4. Ngutiphi tincumo letidzinga kukholwa lokucinile?

⁴ Onkhe malanga senta tincumo letidzinga kutsi sibe nekukholwa lokucinile. Sibonelo nje, senta tincumo letifaka ekhatsi kutsi sitawutihlanganisa nabobani, loko lesitawutijabulisa ngako, imfundvo, umshado, bantfwana kanye nemsebenti wekutiphilisa. Senta kahle nasitibuta nayi imibuto: ‘Tincumo tami tiyakhombisa yini kutsi ngiyaciniseka kutsi lelive liyendlula futsi esikhundleni salo kutawuba nelive lelisha laNkulunkulu? Tintfo lengitentako tiyafana yini naleto letentiwa bantfu labangakholelwa kutsi bangaphila kuze kube phakadze?’ (Mat. 6:19, 20; Luk. 12:16-21) Sitawenta tincumo letikahle nangabe sitawenta lokutsite kuze setsembe kakhulu kutsi live lelisha selisemnyango.

5-6. Yini leyenta sidzinge kukholwa lokucinile nasibhekene netikhatsi letimatima? Fanekisa.

⁵ Siphindze sibhekane netinkinga letidzinga sibe nekukholwa lokucinile. Singahle siphatfwe kabi, sigule kakhulu, nobe sibhekane naletinye timo letingasenta sidvumateke. Ekucaleni singahle sibone ngatsi siyakhona kubeketelela letinkinga. Kodvwa nangabe titsatsa sikhatsi lesidze, njengobe tivame kwenta, singabese sidzinga kukholwa lokucinile kuze sikhone kutibeketelela futsi sichubeke sikhonta Jehova sijabulile.​—Rom. 12:12; 1 Phet. 1:6, 7.

⁶ Nasibhekene nenkinga letsite, singeva shengatsi live lelisha laJehova aliyuze lifike. Loku kusho kutsi kukholwa kwetfu kubutsakatsaka yini? Cha. Cabanga nganaku: Nasisekhatsi nekhatsi nebusika lobushubisa umnkantja, singahle sive shengatsi lihlobo ngeke lize lifike. Kodvwa liyefika. Ngendlela lefanako, nangabe sicindzeteleke kakhulu singahle sive shengatsi live lelisha angeke lize lifike. Kodvwa nangabe kukholwa kwetfu kucinile, siyati kutsi tetsembiso taNkulunkulu titawugcwaliseka. (Hla. 94:3, 14, 15; Heb. 6:17-19) Nasiciniseka ngaloku, singachubeka senta kukhonta Jehova kute kucala ekuphileni kwetfu.

7. Nguyiphi indlela yekucabanga lokufanele siyigweme?

⁷ Siphindze sikudzinge kukholwa lokucinile kuze sente umsebenti wekushumayela. Bantfu labanyenti lesibashumayelako bacabanga kutsi ‘tindzaba letimnandzi’ letimayelana nelive lelisha laNkulunkulu lelitako tiliphupho. (Mat. 24:14; Hez. 33:32) Asifuni kucabanga ngendlela labacabanga ngayo. Kuze loku kungenteki kitsi, kufanele sichubeke sicinisa kukholwa kwetfu. Asesicoce ngetindlela letintsatfu lesingakwenta ngayo loku.

CABANGISISA NGENHLAWULO

8-9. Kucabangisisa ngenhlawulo kungasisita njani sicinise kukholwa kwetfu?

⁸ Lenye indlela lesingakucinisa ngayo kukholwa kwetfu kutsi sicabangisise ngenhlawulo. Inhlawulo isicinisekisa ngekutsi tetsembiso taNkulunkulu titawugcwaliseka. Nasicabangisisa ngekutsi yini leyenta Jehova wasilungiselela inhlawulo, nekutsi walahlekelwa kangakanani, loko kusisita kutsi setsembe kakhulu kutsi setsembiso saNkulunkulu sekutsi sitawuphila phakadze eveni lelihle sitawugcwaliseka nakanjani. Yini leyenta sisho njalo?

⁹ Yini leyenteka kuze sigcine sinenhlawulo? Jehova watfumela iNdvodzana yakhe lelitibulo futsi layitsandzako, lebeyisondzelene kakhulu naye isuka ezulwini kuze italwe emhlabeni. Ngesikhatsi Jesu alamhlabeni, wabeketelela tinkinga letinyenti. Wabese  uyahlupheka futsi wafa kabuhlungu. Leli bekulinani lelikhulu Jehova lalikhipha! Nkulunkulu wetfu lositsandzako bekangeke avume kutsi iNdvodzana yakhe layitsandzako ihlupheke futsi ife kuze nje sibe nemphilo lencono sikhashana. (Joh. 3:16; 1 Phet. 1:18, 19) Ngenca yekutsi Jehova wanikela ngeNdvodzana yakhe leligugu kuze asisite, utawuciniseka kutsi siphila phakadze eveni lelisha.

CABANGA NGEMANDLA AJEHOVA

10. Ngekusho kwembhalo waKubase-Efesu 3:20, yini Jehova lakhona kuyenta?

¹⁰ Indlela yesibili lesingakucinisa ngayo kukholwa kwetfu kutsi sicabange ngemandla aJehova. Unemandla ekwenta konkhe letsembisa kukwenta. Kuliciniso kutsi bantfu labanyenti lamuhla kungenteka bacabange kutsi angeke kwenteke siphile phakadze eveni lelisha. Kodvwa Jehova uhlale etsembisa kwenta tintfo labangeke bakhone kutenta bantfu. Loko ukwenta kufanele ngobe unguNkulunkulu Somandla. (Jobe 42:2; Mak. 10:27) Ngako asimangali nakasetsembisa tintfo letibonakala tingeke tenteke!​—Fundza Kubase-Efesu 3:20.

11. Niketa sibonelo sesetsembiso saNkulunkulu lebesibonakala singeke sifezeke. (Buka libhokisi lelitsi “ Letinye Tetsembiso Letafezeka Lebetibonakala Ngatsi Ngeke Tifezeke.”)

¹¹ Cabanga ngaletinye tintfo Jehova latetsembisa bantfu bakhe esikhatsini lesendlulile lebetibonakala tingeke tenteke. Watjela Abrahama naSara kutsi batawuba nendvodzana sebakhulile. (Gen. 17:15-17) Waphindze watjela Abrahama kutsi situkulwane sakhe besitawunikwa live laseKhenani. Kuleminyaka leminyenti situkulwane sa-Abramama, lokungema-Israyeli, sigcilatwe eGibhithe, bekubonakala ngatsi lesetsembiso ngeke sifezeke. Kodvwa safezeka. Ngekuhamba kwesikhatsi, Jehova watsi Elizabethe losakhulile bekatawuba nemntfwana. Jehova waphindze watjela Mariya, lobekayintfombi ntfo kutsi utawutala iNdvodzana yakhe, loku bekutawufeza setsembiso lebekasente ensimini yase-Edeni etinkhulungwaneni teminyaka ngaphambili!​—Gen. 3:15.

12. Umbhalo waJoshuwa 23:14 newa-Isaya 55:10, 11 usicinisekisa ngani ngemandla aJehova?

¹² Nasicabanga ngato tonkhe tetsembiso letentiwe nguJehova nendlela latifeze ngayo, siyacondza kutsi unemandla lamakhulu. Loko kusenta sisetsembe kakhulu setsembiso selive lelisha. (Fundza Joshuwa 23:14; Isaya 55:10, 11.) Kuphindze kusente sikulungele kusita labanye bacondze kutsi setsembiso selive lelisha asisilo liphupho. Jehova nakakhuluma ngemazulu lamasha nemhlaba lomusha watsi: “Lamavi etsembekile futsi aliciniso.”​—Semb. 21:1, 5.

YENTA TINTFO LETITAKUSONDZETA KUJEHOVA

13. Imihlangano yelibandla ingakucinisa njani kukholwa kwetfu? Chaza.

¹³ Indlela yesitsatfu lesingakucinisa ngayo kukholwa kwetfu kutsi sente tintfo letitasisondzeta kuJehova. Cabanga nje kutsi sizuza kangakanani nasisemihlanganweni yelibandla. Anna, losekaneminyaka asemsebentini wasikhatsi sonkhe utsi: “Imihlangano iyangisita kuze ngihlale nginekukholwa lokucinile. Ngisho nobe sikhulumi site kahle likhono lekufundzisa nobe singakhulumi intfo lensha, ngivame kuva lokutsite lokungisita kutsi ngilicondze kancono liBhayibheli, futsi loko kuyakucinisa kukholwa kwami.” b Kukholwa kwetfu kungaphindze kucine nasilalela timphendvulo tebazalwane betfu nabodzadze emihlanganweni.—Rom. 1:11, 12; 10:17.

14. Umsebenti wekushumayela ukucinisa njani kukholwa kwetfu?

 ¹⁴ Siphindze sikucinise kukholwa kwetfu nasenta umsebenti wekushumayela. (Heb. 10:23) Barbara, losekakhonte Jehova iminyaka lengetulu kwalengu-70, utsi: “Umsebenti wekushumayela bewusolo ukucinisa kukholwa kwami. Nangikhuluma nebantfu labanyenti ngetetsembiso letinhle taJehova, kukholwa kwami kucina kakhulu.”

15. Kutidadishela liBhayibheli kukucinisa njani kukholwa kwetfu? (Buka netitfombe.)

¹⁵ Kunalokunye lokungacinisa kukholwa kwetfu: kutidadishela liBhayibheli. Susan utsi kuyamsita kuba neluhlelo lwekudadisha. Utsi: “NgeLisontfo ngidadisha Sifundvo se-Sicongosekulindza seliviki lelitako. NgeMsombuluko nangaLesibili ngilungiselela imihlangano lesekhatsi neliviki. Kulalamanye emalanga ngitidadishela liBhayibheli.” Ngenca yekutsi Susan uhlale anamatsela kuloluhlelo lwekudadisha, uyachubeka acinisa kukholwa kwakhe. Irene, losekaneminyaka akhonta endlunkhulu utsi kudadisha tiphrofetho letiseBhayibhelini kuyakucinisa kukholwa kwakhe. Utsi: “Kuyangimangalisa kutsi tiphrofetho taJehova tiyafezeka, kufezeke ngisho nentfo lencane lekuleso siphrofetho.” c

“NAKANJANI UTAWUGCWALISEKA”

16. Sisho ngani kutsi loko Jehova lakutjela Habakhuki kuyasisita natsi lamuhla? (KumaHebheru 10:36, 37)

¹⁶ Sekuphele sikhatsi lesidze letinye tikhonti taJehova tilindzele kuphela kwalelive lelibi. Ngekubuka kwemuntfu, kungabonakala shengatsi sekwephutile kugcwaliseka kwalesetsembiso saNkulunkulu. Kodvwa Jehova uyati kutsi tikhonti takhe titiva njani. Ecinisweni, wacinisekisa umphrofethi Habakhuki watsi: “Kunesikhatsi lesibekiwe salombono kutsi ugcwaliseke, lesikhatsi sitawufika  ngekushesha, futsi lombono angeke ube ngemanga. Ngisho nobe ungephuta, chubeka uwulindzele! Ngobe nakanjani utawugcwaliseka. Angeke wephute!” (Hab. 2:3) Loko Nkulunkulu lakutjela Habakhuki kwasita yena kuphela yini? Nobe lamavi aNkulunkulu asho lokutsite kitsi lamuhla? Aphefumulelwe, umphostoli Pawula wasebentisa lamavi kumaKhristu lakulindzele ngalabovu kufika kwelive lelisha. (Fundza KumaHebheru 10:36, 37.) Ngako, singaciniseka kutsi ngisho nobe kungabonakala ngatsi sekwephutile kukhululwa kwetfu, kodvwa nakanjani kutawenteka. ‘Angeke kwephute!’

17. Lomunye dzadze wasisebentisa njani seluleko Jehova lasinika Habakhuki?

¹⁷ Sekuphele iminyaka tikhonti taJehova letinyenti tisebentisa seluleko saJehova lesitsi: “Chubeka uwulindzele.” Sibonelo nje, Louise, wacala kukhonta Jehova nga-1939. Utsi: “Ngaleso sikhatsi, bengicabanga kutsi i-Amagedoni itawufika ngisengakasicedzi sikolwa. Kodvwa loko akuzange kwenteke. Kuyo yonkhe leminyaka, kufundza tindzaba letiseBhayibhelini letimayelana nalabo labalindzela Jehova kutsi afeze tetsembiso takhe kungisitile kutsi ngilindzele Jehova kutsi afeze tetsembiso takhe. Ngifundza ngaNowa, nga-Abrahama, ngaJosefa kanye nalabanye lokwadzingeka balindze sikhatsi lesidze ngaphambi kwekutsi batfole loko Nkulunkulu lebekakwetsembisile. Kuhlale wetsemba kutsi tetsembiso titawufezeka kusite mine kanye nalabanye kutsi siciniseke kutsi live lelisha selisedvute kakhulu.” Tikhonti taJehova letinyenti tiyavumelana naloku!

18. Kubuka indalo kungasenta njani setsembe kakhulu kutsi live lelisha litawufika?

¹⁸ Kuliciniso kutsi live lelisha lisengakefiki. Kodvwa cabanga ngaletinye tintfo letikhona, letifaka ekhatsi tinkhanyeti, tihlahla, tilwane kanye nalabanye bantfu. Kute longabatako kutsi letintfo tikhona mbamba, ngisho nobe kwake kwaba nesikhatsi lapho betingekho khona. Lokwenta tibe khona kutsi tadalwa nguJehova. (Gen. 1:1, 26, 27) Nkulunkulu wetfu wetsembise nekutsi utawenta live lelisha. Utasifeza lesetsembiso. Eveni lelisha, bantfu batawujabulela kuphila phakadze futsi babe baphile saka! Siyaciniseka kutsi live lelisha litawufika ngesikhatsi saNkulunkulu lesifanele, silibone njengobe nje sibona yonkhe indalo lesitungeletile.​—Isa. 65:17; Semb. 21:3, 4.

19. Ungakucinisa njani kukholwa kwakho?

¹⁹ Kwanyalo, sebentisa onkhe ematfuba lonawo kuze ucinise kukholwa kwakho. Hlale ubonga ngenhlawulo. Cabanga ngemandla aJehova. Yenta tintfo letitakusondzeta kuJehova. Nawenta njalo, utawuba semkhatsini ‘walabo labatfola letetsembiso ngekukholwa nangekubeketela.’​—Heb. 6:11, 12; Rom. 5:5.