1. Chaza loko lokwenteka ngesikhatsi Jesu enta simangaliso sakhe sekucala.

 CABANGA ngaloko lokwenteka ngasekupheleni kwa-29 C.E., ngesikhatsi Jesu acala umsebenti wakhe wekushumayela. Jesu namake wakhe, lokunguMariya, kanye nalabanye bafundzi bakhe, bebamenywe emshadweni lobewuseKhana, lokuyindzawo lesenyakatfo neNazaretha, lidolobha Jesu lakhulela kulo. Mariya ungumngani walomndeni futsi kungenteka bekanakekela labo labete kulomshado. Kodvwa njengobe lomshado usachubeka, kwavela inkinga lokungenteka beyitawuhlaza lomndeni kanye nalabo labashadako. Kwabese kuphela liwayini. b Kungenteka labo labete kulomshado besebabanyenti kunalabo lebebabalindzele. Ngekushesha Mariya waya endvodzaneni yakhe futsi wafike watsi kuyo: “Sebete liwayini.” (Joh. 2:1-3) Yini Jesu layenta? Wenta intfo lemangalisako, washintja emanti aba “liwayini lelimnandzi.”​—Joh. 2:9, 10.

2-3. (a) Ngutiphi timangaliso letentiwa nguJesu? (b) Kutasisita njani kucoca ngetimangaliso letentiwa nguJesu?

² Jesu wenta naletinye timangaliso letinyenti ngesikhatsi enta umsebenti wekushumayela. c Wasebentisa emandla akhe lamakhulu kuze ente timangaliso letasita tinkhulungwane tebantfu. Sibonelo nje, kuletimbili latenta, wapha emadvodza langu-5 000 kudla, futsi ngekuhamba kwesikhatsi wapha langu-4  000. Kungenteka labantfu bebangetulu kwa-27 000 nasibala bafati nebantfwana lebebakhona lapho. (Mat. 14:15-21; 15:32-38) Kuto totimbili letikhatsi, Jesu waphindze welapha labanyenti lebebagula. (Mat. 14:14; 15:30, 31) Cabanga nje kutsi labantfu bebamangele kangakanani ngekutsi Jesu bekabelaphile futsi wabapha kudla ngalokusimangaliso!

³ Kunyenti lesingakufundza kuletimangaliso letentiwa nguJesu. Kulesihloko, sitawucoca ngaletinye tifundvo leticinisa kukholwa lesitifundza kuletimangaliso. Jesu wakhombisa kutsi utfobekile futsi uneluvelo ngesikhatsi enta letimangaliso. Ngako sitawucoca ngekutsi singamlingisa njani.

4. Timangaliso letentiwa nguJesu tisifundzisa tifundvo leticinisa kukholwa ngabobani?

⁴ Timangaliso letentiwa nguJesu atigcini nje ngekusifundzisa tifundvo leticinisa kukholwa letimayelana naye kodvwa tiphindze tisifundzise ngaBabe wakhe. Loku kungenca yekutsi Jehova bekunguye uMtfombo wemandla lasetjentiswa nguJesu kuze ente letimangaliso. Imisebenti 10:38 itsi: “Nkulunkulu wamgcoba ngemoya longcwele, wamnika nemandla, futsi wahamba kuto tonkhe tindzawo enta lokulungile, aphilisa bonkhe lebebacindzetelwe nguDeveli, ngenca yekutsi Nkulunkulu bekanaye.” Khumbula nekutsi tonkhe tintfo Jesu latisho nalatenta, lokufaka ekhatsi timangaliso latenta, tayiveta kahle indlela Babe wakhe lacabanga ngayo nalativa ngayo. (Joh. 14:9) Asesicoce ngetifundvo letintsatfu lesingatifundza kuletimangaliso letentiwa nguJesu.

5. Yini leyenta Jesu wenta timangaliso? (Matewu 20:30-34)

⁵ Kwekucala, Jesu naBabe wakhe basitsandza kakhulu. Ngesikhatsi alana emhlabeni, Jesu wakhombisa kutsi ubatsandza kakhulu bantfu ngekutsi asebentise emandla akhe lamakhulu ekwenta timangaliso kuze asite labo lebebahlupheka. Ngalelinye lilanga, lamanye emadvodza lamabili langaboni emehlweni amncenga kutsi awasite. (Fundza Matewu 20:30-34.) Naka kutsi Jesu “wawahawukela” lamadvodza, wabese uyawelapha. Ligama lesiGriki lelisetjentisiwe lelihunyushwe ngekutsi “wawahawukela” lisho luvelo lolusuka ngekhatsi kumuntfu. Loluhlobo lolu lweluvelo lukhombisa indlela Jesu lebekabatsandza ngayo bantfu futsi ngilo lelenta wondla bantfu lebebalambile, waphindze welapha umuntfu lebekanebulephelo. (Mat. 15:32; Mak. 1:41) Siyaciniseka kutsi Jehova longuNkulunkulu ‘lonemusa,’ kanye neNdvodzana yakhe basitsandza kakhulu futsi beva buhlungu nasihlupheka. (Luk. 1:78; 1 Phet. 5:7) Bakubuke ngalabovu kususa tonkhe tinkinga tebantfu!

6. Nkulunkulu unikete Jesu emandla ekwentani?

⁶ Kwesibili, Nkulunkulu unikete Jesu emandla ekucedza tonkhe tinkinga tebantfu. Ngesikhatsi Jesu enta timangaliso, bekakhombisa kutsi angaticedza tonkhe tinkinga lesingeke sikhone kuticedza. Sibonelo nje, unemandla ekusikhulula kuloko lokusibangela tinkinga, lokusono lesasitfola kubokhokho betfu kanye nako konkhe lokubangelwa sono, lokufaka ekhatsi kugula nekufa. (Mat. 9:1-6; Rom. 5:12, 18, 19) Timangaliso latenta tikhombisa kutsi angakwelapha “konkhe kugula” futsi avuse nalabafile. (Mat. 4:23; Joh. 11:43, 44) Ngetulu kwaloko, unemandla ekulawula umoya lomkhulu kanye nekukhulula bantfu emadimonini. (Mak. 4:37-39; Luk. 8:2) Kuyasijabulisa kwati kutsi Jehova unikete iNdvodzana yakhe emandla ekwenta loku!

7-8. (a) Timangaliso letentiwa nguJesu tisicinisekisa ngani? (b) Ngusiphi simangaliso losibuke ngalabovu eveni lelisha?

 ⁷ Kwesitsatfu, singaciniseka kutsi tibusiso letitawuletfwa nguMbuso waNkulunkulu titawuba khona. Timangaliso letentiwa nguJesu ngesikhatsi angumuntfu tisifundzisa ngaloko latakwenta emhlabeni njengobe ayiNkhosi yeMbuso waNkulunkulu losezulwini. Cabanga nganaku latakwenta ngekushesha nasekabusa umhlaba. Sitawuphila saka, ngenca yekutsi utawucedza konkhe kugula nako konkhe kukhubateka lokuhlasele bantfu. (Isa. 33:24; 35:5, 6; Semb. 21:3, 4) Angeke kwenteke silambe nobe sibhekane nemiphumela yetinhlekele temvelo. (Isa. 25:6; Mak. 4:41) Sitawujabula kakhulu nasemukela tihlobo tetfu letiphuma ‘emathuneni.’ (Joh. 5:28, 29) Ngusiphi simangaliso losibuke ngalabovu eveni lelisha?

⁸ Ngesikhatsi Jesu enta timangaliso, bekakhombisa kutsi utfobekile nekutsi uneluvelo. Lobuntfu natsi kufanele sibulingise. Asesicoce ngetibonelo letimbili, sitawucala ngaloko lokwenteka edzilini lemshado lobewuseKhana.

9. Yini Jesu layenta edzilini lemshado? (Johane 2:6-10)

⁹ Fundza Johane 2:6-10. Ngesikhatsi kuphela liwayini kulelidzili lemshado, bekufanele yini vele kutsi Jesu ente lokutsite? Cha. Bekute siphrofetho lebesitsi Mesiya bekatawenta liwayini ngalokusimangaliso. Kodvwa  asewucabange nje kutsi ungativa njani nakungaphela tinatfo emshadweni wakho. Kungenteka Jesu wawuvela lomndeni, ikakhulukati lomkhwenyane namakoti futsi bekangafuni bahlazeke. Ngako, njengobe kuvetiwe ekucaleni, wenta simangaliso. Washintja emanti langaba ngemalitha langu-390 aba liwayini lelimnandzi. Kusenekwenteka wenta liwayini lelinengi kuze lelitawusala lisebente esikhatsini lesitako nobe kuze laba labashadako balitsengise batfole imali. Siyaciniseka kutsi labo lebebashada bajabula kakhulu!

10. Ngutiphi letinye tintfo letibalulekile letikulendzaba lekuJohane sehluko 2? (Buka nesitfombe.)

¹⁰ Cabanga nganati letinye tintfo letibalulekile letikulendzaba lekuJohane sehluko 2. Unakile yini kutsi Jesu akazange agcwalise letimbita ngemanti? Kunekutsi ente bantfu banake yena, watjela letisebenti kutsi tigcwalise emanti kuletimbita. (Vesi 6, 7) Ngemuva kwekutsi sekagucule lamanti aba liwayini, Jesu akazange atsatse leliwayini alimikise kumcondzisi walelidzili. Kunaloko, watjela letisebenti kutsi timikise leliwayini kulomcondzisi. (Vesi 8) Jesu akazange atsatse indzebe yeliwayini, aliphakamise embikwalabo lebebete kulelidzili, bese uyatigabatisa utsi: ‘Asenive nali liwayini lengilentile!’

11. Yini lesingayifundza kulesimangaliso saJesu?

¹¹ Yini lesingayifundza kulesimangaliso lesentiwa nguJesu sekugucula emanti abe liwayini? Sitfola sifundvo lesimayelana nekutfobeka. Jesu akazange atigcabhe ngalesimangaliso; ecinisweni, akazange atigcabhe nganobe yini laphumelela kuyifeza. Kunaloko bekatfobekile futsi bekahlale anika Babe wakhe lonkhe ludvumo. (Joh. 5:19, 30; 8:28) Nangabe silingisa kutfobeka kwaJesu angeke sitigcabhe nganobe yini lesiphumelela kuyifeza. Kunobe yini lesikhona kuyenta emsebentini waJehova, nasitigcabha kufanele sitigcabhe ngaNkulunkulu wetfu lomuhle lesimkhontako. (Jer. 9:23, 24) Kufanele simnike ludvumo lolumfanele. Ngetulu kwako konkhe, kute ngisho nakunye lebesingakhona kukufeza kube besingasitwa nguJehova.​—1 Khor. 1:26-31.

12. Nguyiphi lenye indlela lesingakulingisa ngayo kutfobeka kwaJesu? Shano sibonelo.

¹² Cabanga nganayi lenye indlela lesingakulingisa ngayo kutfobeka kwaJesu. Asesitsi lomdzala welibandla ucitsa sikhatsi sakhe lesinyenti asita umzalwane losemusha loyinceku lesebentako kutsi alungiselele inkhulumo yakhe yekucala yelinyenti. Ngenca yekusitwa ngulomzalwane longulomdzala welibandla, lomzalwane losemusha ubeka inkhulumo lemnandzi futsi libandla liyajabula ngayo. Ngemuva kwemhlangano, lotsite uya kulomzalwane longulomdzala welibandla futsi afike atsi: ‘Uvile yini kutsi lenkhulumo beyimnandzi?’ Lolomdzala welibandla angasho yini kutsi: ‘Yebo. Ngicitse sikhatsi sami lesinyenti ngimsita.’ Nobe ngekutfobeka angatsi: ‘Yebo, beyimnandzi. Ngiyatigcabha ngaye.’ Nangabe sitfobekile, angeke sitishaye sifuba ngetintfo letinhle lesitentela labanye. Kutasenetisa kwati kutsi Jehova uyakubona loko lesikwentako nekutsi uyajabula ngako. (Catsanisa naMatewu 6:2-4; Heb. 13:16) Sisuke sijabulisa Jehova nangabe silingisa Jesu ngekutsi sitfobeke.​—1 Phet. 5:6.

13. Yini Jesu layibona edvute nelidolobha laseNayini, futsi yini labese uyayenta? (Lukha 7:11-15)

¹³ Fundza Lukha 7:11-15. Cabanga ngaloko lokwenteka ngesikhatsi Jesu enta umsebenti wakhe wekushumayela. Bekaye eNayini, lokulidolobha laseGalile, lelisedvute naseShunemu, lapho khona umphrofethi Elisha  avusa indvodzana yalomunye umfati eminyakeni lengaba ngu-900 ngaphambili. (2 Khos. 4:32-37) Njengobe Jesu asondzela egedeni lalelidolobha, wabona sicumbi sebantfu site emngcwabeni siphuma kulelidolobha. Lesimo besibuhlungu kakhulu, lomfelokati bekashonelwe ngumntfwana lokukuphela kwakhe. Kodvwa bekangasiyedvwa, bekunesicumbi lesikhulu sebantfu siphuma edolobheni sikanye naye. Jesu wamisa lesicumbi wabese wenta intfo leyammangalisa kakhulu lomake lobekaselusizini, wavusa indvodzana yakhe lebeyifile! Lona bekungumuntfu wekucala kulabatsatfu labavuswa nguJesu lokukhulunywa ngabo emaVangelini.

14. Ngutiphi letinye tintfo letibalulekile letikulendzaba lekuLukha sehluko 7? (Buka nesitfombe.)

¹⁴ Cabanga ngaletinye tintfo letibalulekile letikulendzaba lekuLukha sehluko 7. Unakile yini kutsi Jesu ‘wabona’ lomake aselusizini wabese ‘uyamhawukela’? (Vesi 13) Ngako, wabona kutsi lomake bekakhala njengobe ahamba embikwesidvumbu sendvodzana yakhe futsi loko kwamenta wamvela kakhulu. Jesu akazange nje agcine ngekumhawukela lomake; kodvwa wakhombisa kutsi uyamvela. Wakhuluma naye ngelivi lelipholile watsi: “Ungakhali.” Ngemuva kwaloko wenta lokutsite kuze amsite. Wavusa indvodzana yakhe lebeyifile futsi ‘wayibuyisela kumake wayo.’​—Vesi 14, 15.

15. Yini lesingayifundza kulesimangaliso lesentiwa nguJesu?

¹⁵ Yini lesingayifundza kulesimangaliso saJesu sekuvusa indvodzana yemfelokati? Sifundza kutsi kufanele sibakhombise luvelo labo labaselusizini lwekushonelwa. Kuliciniso kutsi angeke sikhone kuvusa labafile njengaJesu. Kodvwa njengaye, singabakhombisa luvelo labo labaselusizini lwekushonelwa ngekutsi sibanake. Loko singakwenta ngekutsi sisho tintfo letitawubadvudvuta futsi sente nobe yini kuze sibasite. d (Taga 17:17; 2 Khor. 1:3, 4; 1 Phet. 3:8) Emavi lambalwa kanye nekubentela tintfo letincane kungabakhutsata futsi kubadvudvute.

16. Njengobe kukhonjisiwe kulesitfombe, yini loyifundza kulokwenteka kulomunye dzadze lobekasandza kushonelwa ngumntfwanakhe?

 ¹⁶ Cabanga nganaku lokwenteka. Eminyakeni leyendlulile, lomunye dzadze wabona lomunye dzadze akhala njengobe kuhlatjelwa ingoma emhlanganweni welibandla. Lengoma beyikhuluma ngekuvuswa kwalabafile, futsi lodzadze bekasandza kushonelwa yintfombatanyana yakhe. Ngenca yekutsi lodzadze bekakwati loko, ngekushesha wahamba wayokuma eceleni kwakhe, wabeka sandla sakhe emahlombe akhe futsi wahlabela naye yaze yayophela lengoma. Lodzadze lobekashonelwe utsi: “Ngativa ngibatsandza kakhulu bazalwane bami nabodzadze.” Wajabula kakhulu ngekutsi waya emihlanganweni yelibandla ngalelolanga. Utsi: “EHholweni leMbuso, kulapho sisitakala khona.” Singaciniseka kutsi Jehova uyajabula futsi uyakubona loko lesikwentako kuze sikhombise luvelo kulabo labaselusizini lwekushonelwa futsi “labephuke emoyeni.”​—Hla. 34:18.

17. Yini lesiyifundze kulesihloko?

¹⁷ Singakhutsateka kakhulu nasingadadisha tindzaba letiseBhayibhelini letimayelana netimangaliso letentiwa nguJesu. Tisifundzisa kutsi Jehova naJesu basitsandza kakhulu, kutsi Jesu unemandla ekucedza tonkhe tinkinga tebantfu, nekutsi singaciniseka kutsi tetsembiso tesikhatsi lesitako titawugcwaliseka ngekushesha nasekubusa uMbuso waNkulunkulu lamhlabeni. Nasicabanga ngaletindzaba letiseBhayibhelini, singacabangisisa ngekutsi singabulingisa njani buntfu baJesu. Mhlawumbe ungahlela kutsi esifundvweni lotichubela sona nobe eKukhonteni Kwemndeni ufundze ngaletinye timangaliso letentiwa nguJesu. Buka kutsi ngutiphi tifundvo lotitfolako, bese ucocela labanye loko lokufundzako. Nawenta njalo, ungaba netincociswano letakhako nalabanye!​—Rom. 1:11, 12.

18. Yini lesitawucoca ngayo esihlokweni lesilandzelako?

¹⁸ Ngasekupheleni kwemsebenti wakhe wekushumayela, Jesu wavusa umuntfu wesitsatfu futsi bekawekugcina kulabo labavusa lokukhulunywa ngabo eBhayibhelini. Kodvwa lona bekehlukile, bekangumngani wakhe lomkhulu, futsi wamvusa ngephansi kwetimo letingakavami. Ngutiphi tifundvo lesingatifundza kulendzaba lemayelana nalesimangaliso? Yini lesingayenta kuze licine litsemba letfu lelimayelana nekuvuswa kwalabafile? Sihloko lesilandzelako sitayiphendvula lemibuto.